Сән гисн дууч болв

Эн марһаг «Әрәсән медицинск сестрасин ассоциац» гидг олна бүрдәц давулв. Пандемий учрснас иштә эн онлайн кевәр болв. Терүнд орлцачнр ду дуулҗахин видео илгәх зөвтә бәәсмн. Алдр Диилврин 75 җилин өөнд нерәдгдҗ эн җил марһанд дәәнә цагин дуд дуулх кергтә бәәсмн. Марһана ашар Александра Утикешевад лауреатын диплом бәрүлҗ өггдв.
Хамдан көдлҗәх үүрмүднь Александран тускар бүлән үг келҗ, эн еңсг сәәхн дуулна, олн зүсн марһанд шунмһаһар орлцна гиҗ темдглнә. Урднь эн «Мисс и мистер медицины» марһанд диилвр бәрсмн гиҗ үүрмүднь энүнә күцәмҗин тускар келнә. Төвин ах медсестра Динкин Ольга энүнд эн марһанд орлцх селвг өгсмн. «Мана төвин көдләч Цугәрәсән марһанд ончрснь ик байр-бахмҗ үүдәв. Александра еңсг сәәхн дуута, билгтә күүкд күн болна. Энүнәс даву марһанд орлцҗ диилвр бәрҗ йовтха», – гиҗ үүрмүднь дурдҗана.
Даван Наталья