Таңһчд экологическ бәәдлиг ясрулхин төлә

Таңһчин Толһач Хаска Бату Әрәсән Өмн үзгин бәәрн һазрт экологическ әәмшг уга теткврин сурврмудар болсн селвлцәнд орлцв. Әрәсән әәмшг уга Советин сегләтр Николай Патрушев энүг һардҗ давулсмн.
Эн туст хамдан негдҗ, 2030-ч җил күртл Хальмгин урһа модна тоог 0,5 процентд икдүлх кергтә, эннь һанцхн таңһчд бәәтхә өөрхн регионмудын экологическ бәәдл ясрхднь бас туслхмн, гиҗ Бату Сергеевич темдглв.
Энүнә келсәр, сүл хойр җилин эргцд элснә шуурһн шуурад, һазр көдәрәд бәәнә, эннь таңһчин экологическ бәәдлд харшлтан күргҗәнә. Талдан регионмудла дүңцүлхлә, хамгин икәр элсн мана һазрт бәәдгнь нууц биш.
Һазр бичә көдәртхә гиһәд моддыг олар суулһх кергтә. Советин йосна цагт урһа модн Хальмгт зуг 2 процент һазрт бәәдг билә, ода болхла 0,2 процент күртл баһрв. Һундл төрхд, эннь ЮФО-д хамгин баһ кемҗән болна. Цуг эн бәәдл ясрулхин төлә таңһчин зура белн бәәнә, зуг федеральн дөң бас кергтә, гиҗ Хаска Бату келв.
Дәкәд немхд, таңһчиг усар тетклһнә төр селвлцәнә йовудт бас хәләгдв. Әрәсән тосхлһна министерствин мергҗлтнр «Цевр усн» төсвин туст кегдсн көдлмшиг темдглсмн. Бату Сергеевичин келсәр, Троицкое Цаһан Амн хойр селәнд усар тетклһнә объектсин тосхлт эклв болв талдан кесг төсв күцәлһнә туст эв-арһ хәәгдҗәнә.
Таңһчин Толһачин темдглсәр, Чоһран усна тогталһна төр селвлцәнә шиидврт орулгдхмн. Левокумск усиг цеврләд, селәнә эдл-ахуд олзлхин туст бас Әрәсән һардврас даалһвр өггдхмн, гиҗ белдгдҗәнә.
Мана зәңгч