Бурятин ахнр-дүүнртән дөңгән күргв

Хальмг Таңһчин эрүл-менд харлһна көдләчнрин баг бүкл сара коронавирусн гемәс хөрлһнә халхд хаслһна чаңһ диг-даран зарлгдсн кемд Бурятьд көдлв. Гемтә улсин то кесг холванд өсәд, гем икәр түгҗәсн цагт бәәрн эмчнрт дөң кергтә болҗахиг медәд, Хальмгин эмчнрин баг хойрдад тиигәрән одв. Бурятин ахнр-дүүнртән эн хальдврта болн әәмшгтә гемәс хөрлһнд нөкд болхар эмчнр Бакуша Игорь болн Мантыша Александр, дунд медицинск көдләчнр Оксана Зубенко болн Һәрән Елена һарч йовв. Хальмгин делегациг дамшлтта эмч Бакуша Игорь һардв. Шидр бидн Игорь Николаевичлә күүндвидн.
– Мадниг Улан-Удэ балһснур нисҗ ирхд дигтә чаңһ хаслһн зарлгдсн билә. Таңһчд эпидемиологическ бәәдл йир нәрн бәәсмн, тенд 3 миңһн һар орм госпитальмудт бүрдәгдсн билә. Гем дарунь түгәд, әмтн өрк-бүлмүдәрн гемтҗ, ик-бичкн угад медицинск дөң кергтә болв. Таңһчин бичкдүдин клиническ эмнлһнә улд секгдсн госпитальд реанимацин әңгд бидн көдлвидн. Гемтсн улс дунд нурһлҗ энткгин штамм илдкгддг билә, тегәд гемнь йир күнд кевәр давдг бәәсмн. Реанимацин әңгд күнд гемтә улст дөң күргсн деерән бидн талдан әңгүдт гемтә улсиг бас эмнвидн. Бәәрн эмчнр маднла селвлцҗ, ямр нег төр учрхла мана сүв-селвг болн ухан-тоолвр сурҗ хамцу үүлдвидн. Таңһчин бичкдүдин эмнлһнә ах эмч Анатолий Дмитриевин һардврт госпиталин үүлдвр өөдән кемҗәнд бүрдәгдсиг темдглх кергтә. Эмнлһнд кергтә кергсл бәәнә, гемтә улсиг эмәр сәәнәр теткнә, – гиҗ Игорь Николаевич келв.
Ода Бурятьд эпидемиологическ бәәдл ясрҗана. Госпитальмудт секгдсн һурвн миңһн һар ормас миңһн ормнь хасгдв. Бәәрн эмчнр болн эгл улс Хальмг Таңһчас ирсн эрүл-менд харлһна көдләчнрт ик ханлтан өргҗ, күнд цагла дөңгән күргхәр ирснь ахнр-дүүнрин залһлдан бат болҗахиг темдглв. Игорь Николаевичин келсәр, эдн нәәмн частан селгәһәр көдлдг билә. Зәрмдән нам харһҗ күүндх саам чигн учрдго бәәсмн. Болв эдгәд хәрҗәх улс, хамдан көдлсн үүрмүд баахн эмч Мантыша Александрин, медицинск эгчнр Зубенко Оксанан болн Һәрән Еленан тускар буульмҗта болн ханлтта үгмүд келҗ, эднә мергҗлт өөдән болҗахиг темдглв, гиҗ Бакуша Игорь хувалцв.
Бийнь эн пандемий эклсн цагас авн госпитальмудт көдлҗ, эн хальдврта гемәр гемтсн улст түргн дөң күрглһнә туст байн дамшлт хоршав. Үстин, Яшкулин болн Сарпан райодын эмнлһсин, Деед Яшкулин санаторн сурһулин улд үүлдсн госпитальмудт Бакуша Игорь көдлв. Эн эрүл-менд харлһна халхд һучн дөрвн җилдән көдлҗәнә. Үстин района эмнлһнд эн эмч-анестезиолог болна, дигтә кинь давхцҗах, эрүл-менднь дор унсн, күнд бәәдлд туссн, месллһ кесн улст эн дөңгән күргнә. Тегәд коронавирусн гем учрсн цагас авн эн түрүн зергләнд госпитальд көдлдг болв. Эн җилин эклцәр эн коронавирусн гемәс саглулгч тәрлһ кев. Гемтә улсла көдлҗәх күүнд бийиннь эрүл-мендин тускар ухалх кергтәг эн медҗәнә.
Бакуша Игорь Үстин района Харба селәнд өсәд-боссн күн болна. Эмчин эрдм шүүҗ авхднь эк-эцкнь шиидвринь дөңнҗ, цуг халхар дөң күргв. Авһнь Иван Кумарович Бокшев Харба селәнд эмчәр көдлдг бәәсмн, тегәд ач көвүнь терүнә үлгүрәр эн эрдм шүүҗ авснь лавта. Күсдундур җилдән бидн пандемийин таалд бәәнәвидн, эрүл-менд харлһна көдләчнр күнд таалд көдлҗәнә, гемтә улсин әм аврхин төлә цугинь кеҗәнә. Нег үлү һаң халун кемд шишлң хувц-хунр өмсҗ нәәмн частан көдлхд зөвәр күнд болна.
– Бурятин үүрмүд мадниг йир сәәнәр тосв, маднд сән таал тогтахар шунв. Нег өдр Иволгинск дацңд күргв, тенд бидн хамбо лам Дамба Аюшеевла харһвидн. Мадниг хәрхин өмн таңһчин бичкдүдин клиническ эмнлһнә ах эч Анатолий Дмитриев маднд Ханлтын бичг бәрүлҗ өгәд, мана ач-тус темдглҗ, күнд цагла ирҗ дөңнснд бүлән үгән нерәдв, – гиҗ Игорь Николаевич келв.
ДАВАН Наталья
ЗУРГТ: Хальмгин эмчнр Мантыша Александр болн
Бакуша Игорь хамбо лам Дамба Аюшеевла харһсн кем