Сурһулин җилд белдҗәнә

10-08-2021, 15:39 | Общество, Сурєуль-эрдм

Сурһульчнрин зуни амрлһн төгсхдән өөрдҗ йовна. Сүл амрлһна ноха сард эк-эцкнр үрдтән шин хувц болн дунд сурһульд кергтә кергсл хулдҗ авхар шунна. Хувцн, девтрмүд, харндас, дорвас болн нань чигн тоот хулдҗ авх кергтә. Дунд сурһульд түрүн болҗ орҗадг көвүд-күүкдин эк-эцкнр онц кевәр белднә. Эднд багшнрнь сурһульд кергтә юмсин тускар эртәснь бичәд өгнә. Сүл җилмүдт мана таӊһчин сурһулин бүрдәцст негдгч классмудын сурһульчнрт әдл өӊгтә хувц уйдг болв, эннь сән, юӊгад гихлә хувц авлһнд кесг цаг кергтә болна. Кесгнь мана таӊһчла хам-хоша бәәдг балһсдур йовҗ, тенд эд-тавр хулдҗ авна. Ик зунь болхла, гертән бәәсн лавкст, базрт цугтаһинь олна.
Хойр үртә эк Һәрән Надеждан келсәр, җил болһн эднә өрк-бүл Аһш балһснур йовҗ, дунд сурһульд кергтә тоотан авна. Тенд хулдлһна цутхлӊд дала лавксар йовад, эд-таврин үнинь дүӊцүләд, аштнь кергтә юмсан кимдәр хулдҗ авна. Зәрм лавкст олн әмтиг орлцулхин төлә эд-таврин үнинь невчк баһрулна. Әрәсән Президент Владимир Путинә Зәрлгәр орн-нутгин сурһульч болһнд арвн миӊһн арслӊ өггдв. Эннь йир сән дөӊ, мел кергтә тоот авлһнд туслҗана гиҗ Надежда темдглнә.
Олн үртә эк Бадмин Булһна хувалцсар болхла, эн үрдтән Элстд бәәдг лавкст эд-тавр авч шин сурһулин җилд белднә. Энүнә келсәр, өөрхн балһсдт йовхин төлә эврә көлгн уга, дәкәд болхла хаалһднь һарсн мөӊгнь бас бичкн биш, тегәд гертән хулд кехд амр болҗана.
Мана балһснд кесг ормст бәәдг лавкст эк-эцкнр сурһулин шин җилд эд-тавран хулдҗ авна. Үлгүрлхд, балһсна барун үзгт Ленинә нертә уульнцар бәәдг хулдлһна базрт сурhулин хувц-хунр болн канцелярск эд-тавр чигн олҗ болхмн. Энд балһсна цутхлӊд бәәдг лавксла дүӊцүлхлә невчк кимд болна. Эд-тавр өӊгәрн болн чинрәрн олн-зүсн бәәнә, тегәд күн болһн эврә дурарн энүг шүүҗ авна.

КАРСАНА Евгения

Видео