Нарт-делкәд нерән туурулсн Боднин Людмила

24-08-2021, 14:53 | Спорт

Одахн Токиод төгссн зуни Олимпиадт гандболар Әрәсән күүкд улсин хамцу команд хойрдгч орм эзләд цаһан мөңгн медаләр ачлгдв. Эн ик күцәмҗд хальмг күүкн Боднин Людмилан тәвц бас бәәхнь маһд уга, юңгад гихлә эн ах тренерин нөкд билә.
Боднин Людмилан тускар хамгин түрүнд 2001-ч җилд «Вечерняя Элиста» гидг газет бичсмн. Тиигхд би эн газетиг толһалҗалав. Ода нертә гандболистиг яһҗ олҗ авсна тускар келхлә, дала үг һархмн. Болв күсдудур сар давсна хөөн эн мана редакцд ирәд, маднла хамдан боорцгта хальмг цә ууһад, эврәннь бәәдл-җирһлин тускар келҗ өглә.
Гандболд Боднин Людмила дәврәчәр наадла. Хальмг күүкн Европин чемпионатд дөрвн дәкҗ дарандан, нарт-делкән чемпионатд болхла – хойр дәкҗ хамгин сән гисн дәврәчд шиидгдлә. Ташр 2005-ч җилд Санкт-Петербург балһснд болсн нарт-делкән чемпионатд эн хамгин сән гисн наадачд шиидгдсмн.
Наадан төгсәһәд Боднин Людмила ода Әрәсән Федерацин гандболын исполкомд көдлҗәнә, мана орн-нутгиг Европин болн нарт-делкән марһаст элчлнә.
Людан эк-эцк хойр бас спортар соньсмдг улс мөн. Эцкнь – футболар, экнь – баскетболар. Келхд, эдн ик сурһульд сурчахдан спортын марһанд таньлдсмн. Люда һархла эдн хоюрн күүкән бичкнәснь авн спортар соньмсулад, олн зүсн марһанд бийләһн авад, спортд дурта бол гиҗ селвлцдмн. Энүнәс көлтә Люда эк-эцкәсн үлгүр авад, теднән дураһад, спортар соньмсдг болв.
Людмила бичкндән гандболар соньмсҗахд түүнә сурһмҗлач Левон Оганесович Акопян мадн тал «Луч» гидг команд ирв, одад Наталья Дерюгинан наадыг хәлә гиҗ күүкнд келсмн. Тегәд бичкнәсн авн Боднин Люда Дерюгинас үлгүр авад, алдр эн наадач кевтә наадхар седлә.
Люда Аһшин «Аква» гидг бөдүн күүкд улсин командт ирхлә хамгин баһ наста бәәсмн, тиигхд эн зуг 9-ч класст сурчала. Зуг өөрнь бәәсн гандболистнр шиңкән ирсн күүкнд оньган өгәд, уха зааһад, дамшлтарн элвгәр хувалцсмн. Людмила Валерьевна ода күртл эн туст келхләрн кезәд чигн бүләрн тер цага үр күүкдән санна, нег үлү Татьяна Чернышоваг болн Алла Плоховаг.
Теднә нилчәр ахр цагин болзгт Люда командын хамгин сән гисн наадачнрин зергләнд орад 19-тәдән болхла түрүн болҗ Әрәсән хамцу командт орла.
Әрәсән болн Аһшин командсин төлә арвн һар җилин туршт наадсна хөөн Людмила Словеньд нүүһәд тер орн-нутгин «Крим» гидг командын төлә бас арвн шаху җилин туршт наадсмн. Яһад тиигәрән одсмн гихлә, тиигхд «Крим» команд Европд хамгин чидлтә гисн командт тоолгдла. Ташр хальмг күүкнд Балкана ө-шуһута, теңгстә орн-нутг болн түүнә теңгр бәәдл таасгдна.
Боднин Людмила йоста төрскнч хальмг күүкд күн мөн. Эн кезәд чигн эврәннь төрскн һазран мартхш. Сочин Олимпиадын өмн өргнд Боднин Людмила Хальмг Таңһчин һазрар Олимпиадын һалыг бәрәд гүүсмн. Люда ода күртл Хальмг Таңһчдан дурта. Түүнә эк-эцк Аһш балһсур нүүхләрн эн 6-та билә. Зуг теднә элгн-саднь ода күртл Элстд бәәнә. Тегәд Боднин Люда дару-дарунь тедн талан ирәд төрскн һазртан гиичләд амрна.

БЕМБИН Очр

Видео