Бурхн Багшин әрүн үүлдврт нерәдсн мөргүл

Бурхн Багшин Алтн сүмд шаҗна дарани нег ик байрт нерәдсн мөргүл болсмн. Эн җил хулһн сарин 27-д шаҗна чинртә ик үүлдвр - Бурхн Багш һучн һурвн бурхдын теңгрин таралңгас бууҗ ирсн өдр темдглгдв. Дәкәд болхла Зунква гегәнә әрүн чинртә нег судрнь Хальмгт авч иргдсн байрта йовдл болв. Шар шаҗнд шүтдг хальмгудт эн өдр шаҗн лам Тэло Тулку ринпоче төрҗ һарсарн темдгтә болна.
Шаҗнд шүтдг улс эн өдриг өрүн эрт Махаянан нәәмн самнр авч эклсмн. Гевш Джанчубин һардврт самнр авсн әмтн бүкл хонгтан күүнә әмнд күршго, худл келшго, хулха кешго, әрк уушго, ут тоодан нәәмн үүл күцәшго бәәсмн.
Эн өдр юн учрар мөргүл болдгинь әмтнд тодлулна. Кезәнәс авн келгдҗ йовх домгар эн өдр Бурхн Багш һучн һурвн бурхдын теңгрәс бууҗ ирсн өдр болҗ темдглгднә. Тенд теңгрин таралңгин орнд Бурхн Багш экдән Махамайяд номин цәәлһвр өгсмн. Тегәд эн әрүн өдриг экән күндллһнә өдр гиҗ цугтан тоолна. Бурхн-шаҗна номар сансрин эрглтд төрсн әмтә тоот болһн күүнә эк чигн болад бәәхмн.
Байрин мөргүлин өмнк өдр хурлын гелңгүд болн волонтермуд хурлын мөргүл болдг ик хораг цеврлҗ кеерүләд, деедс бурхдт нерәдсн бәрцинь диглҗ белдв. Дәкәд болхла җирһлин му бәәдлд туссн әмтнд болн өрк-бүлмүдт дөң болх хот-хол белдҗ, теднд күргҗ буйнч керг күцәсмн.
Эн җил шаҗна ик байр Тэло Тулку ринпоче һарсн өдрлә ирлцснь сән евәлтә йовдл болв. Шаҗнд шүтдг әмтн, хурлын гелңгүд Хальмгин Шаҗн ламиг үнн седкләсн йөрәҗ, ут нас наслҗ, олн җилдән әмтнд номин цәәлһвр өгч йовтха гиҗ дурдв. Хальмгин Шаҗн ламин җирһлин һучн җилнь таңһчд шар шаҗиг босхҗ авлһна үүлдврлә өөрхн залһлдата. Хальмгин хойр ик хурлас нань, һучн шаху суврһ болн мөргүлин гер Хальмгт ода церглҗәнә. Бурхн Багшин номиг Хальмгт болн цуг Әрәсәд тархалһнд ик тәвцән орулҗах Дала Ламин күндтә элчд, Хальмгин шаҗн ламд хурлын гелңгүд мандл бәрүлҗ өгв. Шаҗна «цог» гидг шишлң йосрхл шаҗн ламин һарсн өдрт нерәдҗ кесн «Тилопа» шаҗна төвин элчнр чигн Шаҗн ламиг йөрәв.
Бурхн Багшин Алтн сүмд нерәдҗ, «Билгин Дала» гидг саңгин элчнр Зунква гегәнә «Ламрим ченмо» («Серглтин хаалһин девсңгүдин ик һардвр») номин үүдәврин нег һарцинь белглв. Моңһлас авч ирсн әрүн номин эн үүдәвр даруһас өдгә цага хальмг келнд орчулгдҗ, цуг әмтнә оньгт тусхагдхмн.


УШКАНА Сувсн