Медрлинь гүүдүлх күслтәһәр

Сегодня, 14:10 | Общество, Таңһчин зәңгс, Зіњг

Шидр партин олна дөңнлтин штабд «Медрл» гидг Әрәсән ниицәнә «Медрл.Гегәрлт» төсвин йовудт соньн харһлт болв. Тууҗин номин кандидат, Элст балһсна толһачин дарук, «Медрл. Лектор-2025» марһана ашлгч девсңд орлцач Довгопола Дмитрий олна ниицәнә лектормудын төлә лекц умшв. Оютнр, Хальмг ик сурһулин багшнр болн сурһуль-эрдмин бүрдәцсин һардачнр харһлтд орлцад, «Пушкин болн хальмгуд» гидг төрәр болсн лекц соңсад, Элст балһснд шинрүлгдсн Пушкинә бумблв босхлһна тускар медҗ авв.
«Медрл» гидг Әрәсән ниицәнә таңһчд үүлддг әңгин һардач Манҗин Элеоноран келсәр, «Медрл.Гегәрлт» төсвин йовудт лектормудын медрл гүүдүлхин төлә сурһулин керг-үүлдврмүд бүрдәгднә. Тер мет лектормуд театрт одад, хамдан цаган сергмҗтәһәр давулна. Тиигәд, одахн эдн Орс театрт экскурсьт одв. Лектормуд талдан әмтнд олн төрәр лекцс умшдг деерән медрлән гүүдүлҗ, дамшлтан хоршаҗ, дару-дарунь гегәрлтин-сурһмҗин керг-үүлдврмүдт орлцх зөвтә гиҗ Элеонора Сангаджиевна келв.
Мана орн-нутгт бәәдг олн келн-улс дундас алдр шүлгч Александр Пушкин зуг хальмгудт шүлгән нерәдсмн, энүнә үүдәврмүдт хальмг гисн үг 23 дәкҗ харһна. Нидн Элст балһсна төвд ясврин көдлмш эклхлә, нертә хальмг шүлгч Хоньна Михаил орчулсн «Бумб» гидг шүлгинь болн Москваһас Арзрум күртл зуульчлсна зург шүлгчин бумблвд барлсмн. Мана таңһчин гиичнр, баһчуд нертә шүлгчин үүдәврмүд хальмг келнд орчулгдсиг медтхә гиһәд шин бумб босхгдсмн. Ясврин көдлмшин хөөн дүрсләч Нарн Эледжиевин кевлсн бумбиг шинрүлҗ нертә зурач Гарри Рокчинскийин «Прощай, любезная калмычка» гидг зургар дахулҗ шин бумб босхх шиидвр авгдв.
- Шин бумбиг баахн дүрсләч Артем Сюлев кеҗ һарһв. Давсн җилин лу сард көдлмшән экләд, шар-шаҗна нарт-делкән ик хург эклхин өмн терүг углҗ тәвсмн. Эн бумбд хальмг ээҗ болн бичкн көвүн һол орм эзлнә, эннь гүн учр-утхта мөн. Ээҗин болн хальмг күүкнә дүр кевлсн цагтан дүрсләч «Хальмг хувцна хураңһу» гидг дегтр умшад, махлад болн бүшмүдт хуучн цага зег орулҗ кеерүлв. Манҗин Аркадин «Ээҗ мини» гисн ду соңснь дүрсләчд туслсн болдг. Көвүнә чирә-зүсинь болхла Очра Номтын бичкндк цага зургар дамҗад кевлҗ. Александр Пушкинә хувцна товчсинь оньган өгәд хәләхлә, терүнд бамб цецгүдәр «Э» үзг кегдснь үзгднә. Эннь Элст балһсна паркст болн хаша-хаацд олзлгдсн темдгин үзг мөн, - гиҗ Довгопола Дмитрий цәәлһв.
Лекц харһлтд орлцачнрт соньн болад, эдн Дмитрий Сергеевичд кесг сурвр өгв, бумбин тууҗ эдниг йосндан өврүлв.
ДООҖАН Наталья

Видео