Улсин ниицлт – Әрәсән күчн

Сегодня, 14:18 | Общество, Таңһчин зәңгс, Зіњг

Эн долан хонгт Элст балһснд Әрәсән күүкд улсин ниицәнә Хальмг Таңһчд үүлддг әңгин седвәрәр «Мана ниицлтд - Әрәсән күчн» гиҗ нерәдгдсн регионмуд хоорндк ик хург болв. Хальмг Таңһчин, Әәдрхнә, Аһшин болн Ростовин мүҗсин, Карачаево-Черкесин болн Луганск Улсин Республикин Антрацит балһсна күүкд улсин олна ниицәнә элчнр терүнд орлцв.

Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан илгәсн йөрәлин бичгиг министерствин әңгин һардачин дарук Ольга Лебедева хургт орлцачнрт соңсхад, Әрәсән улсин ниицлтин җилд иим хург болҗахнь мана орн-нутгт олн келн-улс ниитә бәәхиг герчлҗәнә гиҗ темдглв. Хальмг Таңһчин Толһачин һардврин ахлачин дарук Шипин Екатерина иим керг-үүлдврмүд нег-негнәннь авъяс-сойлла таньлдҗ, бат залһлда батруллһнд туслна гив. Күндтә гиичнр бас тәәз деер һарч, Хальмг һазрт эдниг бүләнәр тосснд ханлтан өргҗ, нег-негндән гиичлҗ одад, эрк биш хамцу керг-үүлдврмүд давулхмн гисн дуудвр кев.
Әрәсән күүкд улсин ниицәнә таңһчд үүлддг әңгин ахлач Кинзән Киштән үүлдвриннь тускар ахрар келәд, дорас өсч йовдг баһ үйд төрскнч сурһмҗ өглһнә, орн-нутгиннь тууҗиг хадһллһна, седвәртә күүкд улсиг хамцуллһна, келн-улсин ниицлт батруллһна, цергә шишлң керг-үүлдврт орлцачнриг дөңнлһнә халхар ямаран көдлмш күцәгдҗәхин тускар тодрхаһар келв. Фашистнрәс харслһна хүүвин күүкд улсин әңг эн җил 85 җилин өөнән темдглҗәнә. Терүг һардҗ йовсн Советин Союзин Баатр, нертә нисәч Валентина Гризодубован санлд нерәдгдсн керг-үүлдврмүд болҗана. Төрскән харсгч Алдр дәәнд орлцсн күүкд улсин зургуд, бәрмт цаасд цуглулҗ хөөннь өдгә цага эв-арһ олзлҗ олнд Диилврин музейд үзүлхмн. Тегәд дәәнә цагт тылд көдлҗ, фронтд тусан күргҗ йовсн ээҗнриннь туск зәңгәр хувалцтн гиҗ Киштән Ивановна сурв. Таңһчин әңг Төрскән харсгч Алдр дәәнд, Афганистанд, Чечняд, цергә шишлң керг-үүлдврт орлцсн нег һазра улсин санл мөңкрүллһнә туст аһу ик көдлмш күцәҗәнә. Дәәнд орлцачнрин туск фильмс цокч авгдсмн, шүлгүдин хураңһу барлгдв, сурһульчнрла залу-зөрмгин кичәлмүд давулгдна гиҗ Хальмг әңгин ахлач күцәҗәдг көдлмшән цәәлһв.
Эндр мана таңһчд олн келн-улс нег-негнәннь сойл-тууҗ күндлҗ, ниитә бәәнә. Тедн дунд корей келн-улсин ниицән төрскн сойлан хадһлҗ, таңһчин олна бәәдл-җирһлд шунмһаһар орлцна. Эн ниицәнә үүлдврпин тускар ахлачнь Улана Наталья гиичнрт келҗ өгв. Байрин концертд «Джунгария» бииһин ансамблин күүкд корей келн-улсин би биилснь олн-әмтиг байрлулв. Хальмг улсин дууч Очкан Аннан, таңһчин ачта артист Һәрән Лиҗин дуулсн дуд күн болһна седкл байсав.
Ирсн гиичнрән хальмг улсин сойлла болн авъясмудла өөрхнәр таньлдулҗ А.Амр-Санана нертә дегтрин саңд соньн керг-үүлдврмүд болв. Күүкд улсин таңһчин әңгин гешүн Карун Майя хальмг цә яһҗ чандгиг болн боорцг яһҗ шардгиг, хальмг урчнрин ниицәнә һардач Адьяна Екатерина болхла ишкә яһҗ цокдгиг үзүлв. Элст балһсна 24-ч тойгта бичкдүдин садын сурһмҗлач Балакан Екатерина өрк-бүлд сурһмҗ өглһнә тускар келҗ өгв. Үдин хөөн гиичнр Приютна районд одад, теегт урһҗадг ке-сәәхн бамб цецгүд һәәхв.

БАТАН Сәәхлә

Видео