Байр үүдәсн «Байруш» ансамбль

Шидр Көтчнрә района бичкдүдин билг-эрдмин сурһулин «Байруш» ансамбль Дагестанд Кизилюрт балһснд болсн «Красота души Кавказа» гидг II-ч Нарт-делкән фестивальд орлцв. Ансамблин уйн наста домбрчнр билг-эрдмәрн ончрад, һурвн гран-при болн һурвн 1-ч орм эзлв. Күүкд-көвүд домбр цокҗ, хальмг олн-әмтнә айс болн шавашмуд жюрин оньгт тусхав.

– Эн фестивалиг үүдәгч төсвсин «БлагоДа» болн «Золотые россыпи талантов» сойлын-гегәрлтин төвмүд бүрдәҗ давулна. Бидн эднә фестивальмудт болн марһаст урднь чигн орлцсн биләвидн. Марһанд Ар Кавказин, Краснодарск крайин элчнр орлцад, билг-эрдмән үзүлв. Түрүн өдр бидн Махачкала балһснд сәәхн һазр һәәхәд, зоопаркд одад, келн-улсин сенр хот амсад, Көк теңгсин көвәд бәәдг гиичлүрт бәәввидн. Бәәрн улс мадниг хам-хоша бәәдг Хальмг Таңһчас ирсиг медәд, күндтә гиичнр мет бүләнәр тосв. Тенд йир дулан, теңгрин бәәдл сәәхн, зәрмснь нам теңгст өөмнә, көвәд кесгнь спортар соньмсҗ цогц-махмудан батрулҗахнь үзгднә. Хойрдгч өдртнь марһан болв, бичкдүд олн зүсн зевсгүд татв, ду дуулв, чееҗәр айслулҗ шүлгүд умшв, би биилв. Тегәд марһана йовудт олн келн-улсин сойлын байрин концерт болв. Асхар дииләчнриг йөрәв, – гиҗ «Байруш» ансамблин һардач Гилян Тикеева келнә.

«Байруш» ансамбль хальмг көгҗмин композиц наадад, гран-при шүүв. Саша Манжеев домбр цокад шаваш келв, Айса Баркуева хальмг олн-әмтнә айсмудын композиц наадв. Эдн бас гран-при шүүҗ авв. Келхд, Саша Айса хойр кесг марһасин дииләчнр болна. Булгун Семенова нертә домбрч Булһн Манджуракован композиц болн Алтана Кандуева хальмг айсмудын композиц наадад, 1-ч орм эзлв. Тер мет домбрчнрин септет (долан күн) бас 1-ч ормд һарв. «Байруш» һурвн гран-при шүүҗ авсн төләд ансамблин һардач Гилян Тикеева «Сән гисн багш» гидг номинацд ачлгдв.

«Байруш» ансамбль йисн җилдән үүлдҗәнә. Эн җилмүдин эргцд күүкд-көвүд района болн таңһчин бәәтхә, Цугәрәсән болн Нарт-делкән фестивальмудт, марһаст диилвр бәрҗ, нер һарч йовна. Көтчнр селәнә күүкд-көвүд домбр цокдгиг дасч, өвкнриннь сойл хадһлҗ, хальмг улсин айс холд туурулҗана. Ансамблин һардач Гилян Тикеева бичкдүдт килмҗән тусхаҗ, эднә билг-эрдм делгрүлҗ, седклән өгч көдлҗәх багш мөн. Ансамблин ханьд 16 күүкн-көвүн орлцна, эдн сурһулин хөөн билг-эрдмин сурһульд болх кичәлмүдтән адһна. Эдн нертә артистнр болҗ өсшго болв чигн өсәд-босхларн сурһуль сурч эс гиҗ көдлҗ йовх һазртан домбран һартан авч, хальмг сәәхн айсар чикнә хуҗр хаңһаҗ байр үүдәхнь лавта.

Нарт-делкән марһанд орлцхин төлә күүкд-көвүдин эк-эцкнр демән күргв, тегәд Гиляна Алексеевна эднд ханлтан өргҗәнә. Бичкдүд хойр өдртән Дагестана ке-сәәхн һазр һәәхәд, билг-эрдмән үзүләд, ик күцәмҗ бәрҗ хәрҗ ирв. Нарт-делкән марһанд диилвр бәрсн ансамбльд Аһш болн Буденновск балһсдт болх фестивальмудт орлцх үрвр кегдв. «Байруш» ансамблин бичкдүд эрк биш терүнд орлцҗ бас диилвр бәрҗ ирхнь маһд уга.


ДАВАН Наталья