Медәтнр чаңһ-чиирг болхар шунна

Насн ирәд күн медәрхлә махмуд шарклад, көл-һар өвдәд олн зүсн гем һарад көндрх дурн уга болна. Тегәд көгшрв чигн эрүл-менд бәәхин төлә спортар соньмсҗ эс гиҗ өдр болһн йовһар йовҗ цогц-махмудан батрулх кергтә гиҗ эмчнр келнә. Тегәд медәтнрт дөң болхин, эдн сул цаган сергмҗтәһәр болн тустаһар давулхин төлә әмтнә социальн теткврин комплексн төвмүдин (КЦСОН) улд эрүл-мендин клубмуд секгдв. Тиим клуб Городовиковск районд бас үүлдҗәнә.

Района әмтнә социальн теткврин комплексн төвин һардач Любовь Хавлякован келсәр, эрүл-мендин клуб пандемий эклхәс урд секгдсн билә, тегәд эпидемиологическ бәәдләс иштә цаг зуур тер үүлдсн уга. Ода таңһчд бәәдл ясрад, 65 нас һарсн улст олна керг-үүлдврт орлцх зөв өггдснәс иштә медәтнр клубин занятьст шунмһаһар орлцдг болв. Долан хонг болһн эдн спортивн талвңд цуглрҗ, цогц-махмудан батрулна, паркд болхла йовһар йовҗ цевр аһар киилнә. Социальн көдләч Оксана Дредунова күн болһна арһ-чидлиг болн эрүл-мендин бәәдлиг учртан авч шишлң даалһвр өгнә.

– Мана районд «Балһсна сән кец-таал тогталһн» гидг төсвин медлд өдгә цага спортивн комплексмуд, амрлһна паркс секгдҗ әмтнд сән таал тогтав. Тегәд тенд әмтн өрк-бүләрн ирҗ спортар соньмсна, цаган тустаһар давулна. Эрүл-мендин клубд ордг медәтнр хамдан цаган давулхдан дурта, эдн таньл-үзл улсла харһҗ сүл зәңгсәрн хувалцна, өдр-бүрин төрмүдәр күүнднә. Эдн һаза углҗ тәвгдсн тренажермудт цогц-махмудан батрулна. Лазаревский, Виноградное селәдт бәәдг медәтнр бас эрүл-мендән батрулҗ скандинавск йовһар йовлһна занятьст орна. Иим харһлтс медәтә улст кергтә, эдн уудьвран һарһҗ сергмҗтәһәр амрна, эннь эднд ик омг болн урмд өгнә, – гиҗ Любовь Хапуровна келв.

Вера Савинская, Антонина Халявкина, Татьяна Цветкова, Лариса Каджинова, Вера Манжикова, Нина Чурюмова, Людмила Полякова болн нань чигн медәтнр клубин шунмһа орлцачнр болна. Залу улс Олег Карасёв болн Виктор Зубцов бас чик авг-бәрцәр бәәхәр шунна. Района медәтнр эрүл-мендән батруллһна клубд ямр кевәр цаган давулҗахиг олнд медүлхәр флешмоб белдҗәнә. Теңгрин бәәдл ясрад, нарта өдрмүд зогсхла эдн аэробикин занятьс давулдг болхмн.

Любовь Хапуровнан келсәр, комплексн төвд литературн клуб бас үүлддг болхмн. Медәтнр дунд шүлг бичдг, үүдәгч кевәр үүлддг улс баһ биш бәәнә. Үлгүрнь, урднь социальн көдләч болҗ олн җилдән көдлҗ йовсн Александра Кущ шүлг бичхдән дурта. Виноградное селәнд бәәдг Татьяна Казаченко бас билгтә, олна керг-үүлдврмүдт орлцҗ эврә шүлгүдән умшна. Района ветеранмудын хүүвин улд медәтнр олн зүсн харһлтс давулҗ, цәәһән ууҗ седклин күр давулна. Района КЦСОН-а көдләчнр медәтнрин төлә экскурсь чигн бүрдәхәр зуралҗана, тегәд эдн хамдан хам-хоша бәәдг Сарпуль одхар бәәнә. Астраханск мүҗд бәәдг Богдо уулд чигн күрхәр санҗана.

– Мана наснд күрсн улст көндрәд, цогц-махмудан батрулх кергтә. Гертән суухин ормд мана зергләнд орҗ, маднла хамдан цаган сергмҗтәһәр болн тустаһар давултн, - гиҗ эрүл-мендин клубд ордг медәтнр бәәрн улст дуудвр кеҗәнә.

ДООҖАН Наталья