Мал асрҗадг баахн фермер

Хальмгуд кезәнәс авн малын ард йовад бичкнәсн авн эн көдлмшиг меддг бәәсмн. Теегт малан хәрүлҗ, үвлд теҗәлинь белдҗ, өрк-бүл болһнд үрдән эн көдлмшт орлцулдг билә.

Бадмин Арслң ода һучн йистә. Эн баахн малч, олн үртә эцк мөн. Арслң Приютна района Первомайский поселкд өсч-боссн көвүн. 1999-ч җилд дунд сурһулян төгсәһәд, Хальмг ик сурһулин оютн болсмн. Хату цаасан авад төрскн поселкдан ирҗ, дунд сурһульд цогц батруллһна багшар болн бөк бәрлдәнә дамшачар көдлв. 2005-ч җилд баахн багш өрк-бүлән өндәлһв. Келхәс, Герлә авальтаһан ик сурһульд нег дацңд сурад таньлдв. Дунд сурһульд кесг җилдән көдлҗ, Арслң аав-эцкиннь үлгүрәр мал асрсна амн тоста гиҗ хошт көдлхәр шиидв. Энүнә аавнь малын эмчәр олн җилдән көдлсмн, эцкнь бас селәнә малын ах эмчәр үүлдлә. Тегәд мал өсклһнә көдлмшиг Арслң бичкнәсн авн үзҗ медҗ йовла. Аав эцк хойрин кергиг цааранднь делгрүлх санатаһар эн седклән тәвҗ көдлсмн.

Селәнә эдл-ахун халхар көдлсн кен-негнднь эврә махн, үсн-тосн бәәдг. Үрдән асрхин төлә Бадмин Арслң багшин көдлмшән оркад, хошт ирҗ көдлв. Тиим кевәр 2015-ч җилд Арслң крестьянск-фермерск эдл-аху бүрдәв. Района болн селәнә һардвр энүнд түрүн дөңгән күргв. Дорҗ Данир хойр көвүнь эцкдән даңгин нөкд болна. Эдн хө хәрүлнә, машиһән залҗ ус зөөнә. Баахн малчин келсәр, үвлзлһнә кем гем угаһар давв, мал чигн бүрн-бүтн һарв. Өдгә цагт төл авлһна көдлмш гүргүдән орчксн бәәнә. Селәнә эдл-ахуд өдр болһн өрүн эртәс авн асхн ора күртл көдлх кергтә болна. Эндр Бадмин Арслңгин КФХ-д 300 шаху хөн, такас болн немш такас бәәнә.

Герин эзн күүкд күн Герлә сенр шимтә хот чанад, авалян, хойр көвүһән тосна. Тавта Альмина, җил күрәд уга Эңкр хойр күүкнь экиннь өөр бәәнә. Альмина эврән бичкн болвчн дү күүкән хәләҗ экдән нөкд болна.

Бадмин Арслңгин келсәр, өдгә цагт баһчуд малд көдлхәр седхш, ик зунь Әрәсән балһсдар йовҗ көдлнә. Тегәд төрскн һазртан кен көдлхмн гисн сурвр энүг үүмүлнә. Дурта көдлмш бәәхлә гертән чигн көдлҗ болҗана, гиҗ Арслң Николаевич тоолврарн хувалцна. Тер мет өдгә цагт хошт көдлдг улсиг урмдулҗ мөңгнә дем, субсидь һарһҗ өгнә. Эннь йир сән дөң болна. Малч күүнд амрдг цол уга, малын арднь орад асрад завср угаһар көдлх кергтә болна.

Тегәд Бадмаевихнә өрк-бүл дөрвн хәәртә үрән өскҗ, чик хаалһд орулҗ, көдлмшән даавртаһар күцәҗ, малыннь тооһинь икдүлҗ, таңһчин селәнә эдл-ахун делгрлтд баһ биш тәвцән орулҗ көдлх гисн ицл бәәнә.

КАРСАНА Евгения