Нертә эмчнр дамшлтарн хувалцв

26-04-2022, 10:41 | Общество, Таңһчин зәңгс

Одахн Көтчнрә района эмнлһнә улд Әрәсән нүүрлгч эмчнр семинар давулҗ, месллһ келһнд олзлгддг өдгә цага эв-арһсин тускар келҗ өгв. Района эмнлһнә ах эмч Бадм-Һәрән Очрин седвәрәр урднь иим керг-үүлдврмүд җилд хойр дәкҗ давулгддг бәәсмн. Болв пандемий учрснас авн иим харһлтс давулх арһ уга болв.

Тиигәд, РУДН-а медицинск күрәлңгин тиңкмин һардач, медицинск номин доктор Андрей Протасов, И.Мечниковин нертә Ар-барун үзгин шаңһа медицинск ик сурһулин профессор, медицинск номин доктор Владимир Акимов, Әәдрхнә медуниверситетин олна хирургийин тиңкмин һардач, медицинск номин доктор Михаил Топчиев болн доцент, медицинск номин кандидат Дмитрий Паршин семинарт орлцв.

Района эмнлһнә ах эмч Бадм-Һәрән Очр ирсн гиичнр хирургийин халхд олзлгдҗах шин эв-арһсин тускар хувалцхиг темдглв. Урднь района эмнлһнә улд Әрәсән нүүрлгч хирургудын конференцст чинртә төрмүд хәләгдсн деерән өөдән чинртә месллһ кедг бәәсиг Очр Владимирович тодлв. Селәнә эрүл-менд харлһн өдгә цага некврлә ирлцҗ делгрх, тегәд энд көдлҗәх эмчнр нүүрлгч эв-арһс бас олзлҗ гемтә улс дарунь эдгхд туслдг месллһ кедгиг дасч авх зөвтә гиҗ эн тоолҗана. Семинарт орлцҗах эмчнр цуһар гилтә медицинск номин доктормуд болна, эдн месллһ келһнд бийснь үүдәҗ һарһсн эв-арһс олзлна, эдн эврәннь халхдан нүүрлгч мергҗлтнр болҗахиг Очр Владимирович темдгләд, эднд ханлтан өргв.

Дарунь семинар эклв, гиичнр дамшлтарн хувалцҗ, месллһ кесн улс дарунь эдгхин туст ямаран шинрлтс олзлҗахин тускар келҗ өгв. Тиигәд, медицинск номин доктор Андрей Протасов месллһ кеснә хөөн имрһ (грыжа) һарсн цагт ботокс олзллһна тускар келснь соньн болв. Ода деерән мана орн-нутгт тиим эв-арһар 15 месллһ кегдв, гемтә улс дарунь эдгв. Санкт-Петербургас ирсн профессор Владимир Акимов түрүләд ик сурһулин тууҗин тускар келв. Эн гесн-һолһад цусн һарсн цагт терүг зогсалһна төлә ямаран эв-арһс олзлдган цәәлһв. Владимир Павлович «Руководство по эндовидеохирургии» гидг дегтр Очр Владимировичд белгләд, одахн болсн өөнләнь йөрәв. Эн дегтрт нүүрлгч хирургудын үүдәҗ һарһсн эв-арһсин тускар келгдҗәнә, тегәд олн халхин эмчнрт көдлмштнь кергтә болн туста болх гиҗ гиич келв.

Әәдрхнә медуниверситетин олна хирургийин тиңкмин һардач, медицинск номин доктор Михаил Топчиевин келсәр, эдн урднь җил болһн хаврар болн намрар нааран ирҗ, хирургийин халхд ямаран шинрлтс һарсна тускар хувалцдг билә. Хазн, Рязань, Москва, Санкт-Петербург балһсдас профессормуд ирҗ номин-дамшлтын конференц давулхар зуралҗасн биләвидн, болв зәрм учрар терүг күцәҗ чадсн угавидн. Тегәд бидн семинар давулхар шиидвидн. Иим керг-үүлдврмүд кергтә, энтн мергҗлт өөдлүллһнд туста. Көтчнрә района эмнлһнә ах эмч Бадм-Һәрән Очр седвәртә, өдгә цага некврлә ирлцҗ көдлдг һардач болна, тегәд бидн җил болһн нааран ирхәр адһнавидн, гиҗ Михаил Андреевич келв.

Района эмнлһнә көдләчнрт шин медрл туста болҗ, эдн мергҗлтән өөдлүлснь маһд уга. Семинарин чилгчәр эмчнр бәәрн улсин эрүл-мендин бәәдл шинҗлҗ, эмнлһнә туст сүв-селвг өгв.

ДООҖАН Наталья

Видео