Сурһульчнриг шимтә хотар теткхәр

05-05-2022, 12:39 | Общество, Таңһчин зәңгс

Әрәсән Президент Владимир Путин 2020-ч җилд Федеральн Хургт кесн Илгәврт эклц классмудын сурһульчнриг өңгәр халун хотар тетклһнә туст даалһвр өгсн билә. Эн кергт федеральн бюджетәс регионмудт мөңгн йилһгднә. Эн җил эклц классмудын сурһульчнриг халун хотар тетклһнд федеральн бюджетд 63 җува арслң батлгдсмн. Сүл кесн то-дигәр мана орн-нутгт 7,5 сай сурһульч халун хотар теткгднә.

Сурһульчнриг халун хотар тетклһнә төр Хальмг Таңһчин правительствин бүртклһнд бәәнә. Мана таңһчд 148 сурһуль-эрдмин бүрдәцд эклц классмудт сурчадг 14 миңһн һар сурһульч халун хотар теткгдҗәнә. 2022-ч җилд эн кергт таңһчин бюджетд 170 сай асрлң батлгдсмн. Келхд, муниципальн бүрдәц болһн сурһульчнриг дөңнлһнә халхар немр керг-үүлдврмүд батлгдна. Тиигәд, Элст балһснла хам-хоша бәәдг Лола, Максимовка, Салын, «Элеватор» болн «Северный» гидг гер-бүүрмүдин кварталмудт бәәдг җирһлин күнд таалд туссн өрк-бүлмүдин бичкдүдиг халун хотар тетклһнә төр хаһлгдв. Нег сурһульчиг үдин хотар тетклһнд 85 арслң өдрт йилһгднә.

Одахн бидн Көтчнрә района Шемнрә дунд сурһульд одсн биләвидн. Эндр энд 17 сурһульч сурчана, цуһар эдн халун хот ууна. Эклц классмудын сурһульчнр өңгәр теткгддг болхла, наадк күүкд-көвүдин эк-эцкнр һаруһинь даана. Эклц классмудын сурһульчнрин үдин хотн өдрт 100 асрлң, наадк сурһульчнрин төлә 60 арслң күрнә. Замч Айса Малаева күүкд-көвүдин төлә олн зүсн хот белднә. Эн сурһульчнрин тааслт учртан авч, теднд таасгддг шимтә хот болһхар шунна. Көтчнр селәнд бәәдг онц эзнә лавкд хулдҗ авсн хот-хол, темсн болн нань чигн эдл-ууш сән чинртә болна, юңгад гихлә терүнд «Меркурий» гидг бүртклһнә сертификат бәәнә. Дәкәд Роспотребнадзорин заллтын мергҗлтнр болн эк-эцкнр дару-дарунь ирҗ хот-хоолын чинр бүртклһнә керг-үүлдврмүд күцәнә.

Хальмг Таңһчин социальн делгрлтин, күч-көлснә болн көдлмшәр тетклһнә министерствин то-дигәр, 2021-2022-ч сурһулин җилд 4 миңһн олн үртә өрк-бүләс 6459 сурһульчд халун хотд социальн демин мөңгн сар болһн өггдҗәнә. Социальн демин мөңгнә кемҗән сар болһн 1 миңһн арслң тогтана.

Темдглхәс, эклц классмудын сурһульчнрас нань гемтә-шалтгта бичкдүд бас өңгәр халун хотар теткгднә. Тиигчкәд, эдн өдрт хойр дәкҗ халун хот уух зөвтә болна. Моһа сард Әрәсән орн-нутгин Хүүвин депутатнр гемтә-шалтгта бичкдүдиг хойр дәкҗ халун хотар тетклһнә закана төсв хәләсн билә. Зәрм регионмудт гер деерән сурдг эрмдгтә бичкдүдт халун хотар тетклһнә ормд демин мөңгн өггднә, наадк регионмудт болхла хот-хол йилһгднә. Тегәд эн төриг негн деернь һарһх кергтә гиҗ «Негдсн Әрәсә» партин фракц закана төсв белдҗ седвәр татв. 2019-ч җилд Элст балһсна Хургин депутатнр эрмдгтә бичкдүдиг халун хотар өдрт хойр дәкҗ тетклһнә туст шиидвр батлсн билә. Эн чинртә төр гемтә-шалтгта бичкдүдин эк-эцкнрин олна ниицәнә седвәрәр болн некврәр хаһлгдв.

ДООҖАН Наталья