Билгтә болн ниитә бүлмүдин күцәмҗ

24-05-2022, 11:14 | Общество, Таңһчин зәңгс

Одахн Элстд «2022 җилин сән гисн өрк-бүл» гидг Цугәрәсән марһана региональн девсңд диилвр бәрсн өрк-бүлмүдиг йөрәв. Байрин керг-үүлдврт Хальмг Таңһчин правительствин Ахлачин дарук Ивана Светлана, таңһчин Улсин Хуралын (Парламентин) депутат, «Негдсн Әрәсә» партин «Бат өрк-бүл» гидг төсвин региональн зүүцүләч Бадм-Хаалһин Ольга, таңһчин социальн делгрлтин, күч-көлснә болн көдлмшәр тетклһнә министр Өлзәтин Марина болн жюрин гешүд орлцад, өрк-бүлмүдиг диилвр бәрснләнь йөрәҗ белг бәрүлҗ өгв. Келхд, региональн марһанд ямр нег номинацд диилвр бәрсн өрк-бүл 50 миңһн арслңга сертификатар ачлгдв. Гран-при шүүсн өрк-бүлд немр 100 миңһн арслң өггдв.

Байрин керг-үүлдвр үр-иньгин таалд давв гиҗ келх кергтә. Түрүләд өрк-бүл болһна презентац үзүлгдв. Марһанд орлцхин төлә эдн бәәдл-җирһлиннь, тааста кергиннь болн күцәмҗин тускар видео цокч авч, билг-эрдмән үзүлв. Өрк-бүл болһн билгтә, һартан өөтә болсн деерән өвкнриннь авъяс хадһлҗ ниитә, ямаран чигн төриг хамдан хаһлҗ бәәдгнь медгдв. Байрин керг-үүлдврин йовудт эк-эцкнр күүкдтәһән ду-би үзүлҗ, билг-эрдмәрн седкл байсав.

Министрин келсәр, эн марһан 2016-ч җиләс авн давулгдҗана. Терүг җирһлин күнд таалд туссн бичкдүдиг дөңнлһнә саң бүрдәнә. Эн җилмүдин эргцд мана таңһчд ут тоодан 200 өрк-бүл орлцв. Эн җил марһанд орлцхар 23 өрк-бүл эрлһән орулв, теднәснь 18-нь финалд орлцх зөв авв. Диилвр бәрсн өрк-бүлмүд эк-эцкин дааврин үлгүр болдг, цаһан седклтә, билгтә болн үрдтән чик сурһмҗ өгхәр зүткдг улс болна. Эдн олн дунд тоомсрта болн күндтә улс болдгнь темдгтә. Эн җил марһана номинац болһнд селән һазрт бәәдг өрк-бүлмүд диилвр бәрв гиҗ Марина Петровна заав. Цуһар эдн диилвр бәрснь хара биш, юңгад гихлә эдн чик хәләцтә, билгтә, олнд үлгүр-үзмҗ болдг өрк-бүлмүд мөн.

«Селән һазрт бәәдг өрк-бүл» номинацд Баһ Дөрвдә района элчнр Санл болн Баира Зверевихн, Целинн районас олн үртә Санл болн Любовь Кадаевихн, баһ наста Эрнцн болн Саглр Кегдышевихн Үстин районас болн авъяс хадһлдг Алексей болн Айса Лисицынихнә өрк-бүлмүд ончрв. Жюрин шиидврәр Яшкуль селәнд бәәдг Цаһан болн Александр Лиджиевихнә өрк-бүл онц мөрәһәр ачлгдв. Өнр-өсклң Кадаевихн таңһчин нер харсч Цугәрәсән марһанд орлцхмн.

ДООҖАН Наталья