Җирһлин күнд таалынь ясрулхар зүткнә

31-05-2022, 11:27 | Общество, Таңһчин зәңгс

Сүл җилмүдт мана орн-нутгт ах үйин улст, олн үртә өрк-бүлмүдт дөң күрглһнә, теднә социальн тетквр яслһна төрмүдт ик оньг өггдҗәнә. Нег үлү җирһлин күнд таалд туссн, һанцарн бәәдг улст килмҗ тусхагдҗ, ямр нег төринь хаһлхд дөң-тус күргнә. Шидр бидн Ик Буурла района әмтнә социальн теткврин комплексн төвд (КЦСОН) одад, эднә өдр-бүрин йовудар соньмсвидн.

Даавртаһар көдлнә
Төвин һардач Самхан Светланан келсәр, эднә хәләврт баһ тетквртә болн олн үртә өрк-бүлмүд, гемтә-шалтгта, һанцарн бәәдг медәтнр бәәнә. Төвд һурвн әңг үүлднә, эннь гер деер социальн тетквр күцәлһнә, өрк-бүлин болн бичкдүдин, түргн социальн дөң күрглһнә әңгүд болна. Эндр энд 26 күн көдлнә, цуһар эдн ик дааврта, көдлмштән дурта, үнн-чик седклтәһәр кергән күцәдг мергҗлтнр болсн деерән цаһан седклтә, күн болһнд килмҗән тусхадг әмтн болна гиҗ темдглх кергтә.
Комплексн төвин көдләчнрин дөң-тусар баһ тетквртә, җирһлин күнд таалд туссн улс гер-бүүрин, социальн дем авлһна, эмнлһнә болн нань чигн төрмүд хаһлна. Тиигәд, 2016-ч җиләс авн Ик Буурл селәнд дулаһар тетклһн автономн кевәр күцәгддг болв. Зәрм өрк-бүлмүд гертән дулаһар тетклһнә кергсл углҗ тәвҗ чадсн уга, тегәд КЦСОН района һардврин дөңгәр 85 кергсл хулдҗ авад, тедниг теткв. Экин региональн сертификатын болн социальн демин мөңгиг олзта-тустаһар олзлхд эдн бас дөң болна. Дәкәд комплексн төвд баһ тетквртә улс кергтә хувц-хунр, башмг-һос болн нань чигн эд-тавр авч чадна. Нааран буйнч седклтә әмтн иим улст керглгдх кергтә тоот авч ирнә, зәрмдән шин хувц-хунр чигн белглнә. Одахн Донбассас ирсн өрк-бүлин бичкдүдиг эдн хувцлад, кергтә эд-таврар теткв.

Ах үйин улст – онц килмҗ
Дәәнә болн тууврин зовлң үзсн, җирһлин хаалһнь адрута болсн ах үйин улст социальн көдләчнр нег үлү килмҗән тусхаҗ, ач-тусинь хәрүлхәр шунна. «Ах үйин улс» гидг келн-улсин төсвин керг-үүлдврмүд иим улст социальн дөң күрглһнд туслна. Эндр 16 социальн көдләчин хәләврт 96 медәт болн эрмдгтә күн бәәнә. Медәтнрин эрүл-менд батруллһна, эдн дунд чик авг-бәрц делгрүллһнә төлә комплексн төвд «Девясил» гидг клуб бүрдәгдв. Терүнә гешүд Бадм-Һәрән Ларисан һардврт йоган, скандинавск йовлһнд орлцҗ цогц-махмудан батрулна.
Селән һазрт бәәдг 65 наснас ах улсиг эмнлһнә бүрдәцст күрглһнә керг-үүлдвр күцәхин төлә Ик Буурла КЦСОН «Лада Ларгус» тамһта көлгәр теткгдв.

һартан өөтә Бичкдүд
2020-ч җилд Ик Буурла комплексн төв җирһлин күнд таалд туссн бичкдүдиг дөңнлһнә саңгин төсвсин марһанд диилвр бәрәд, «Ориентир» өрк-бүлин диспетчерск» гидг немр әңг секв. Давсн җиләс авн экләд күцәгдсн эн төсв намртан төгсхмн. Болв, Светлана Владимировнан келсәр, эдн эн халхар үүлдврән цааранднь гүүдүлхәр зуралҗана. Эн әңгиг Манкира Ольга һардна. Шүүҗ авсн мөңгәр эдн мод эд-бод кедг болн олн зүсн хот-хол болһдг кергсл хулдҗ авад, мастерской болн « Умелая хозяйка» гидг кружок секв.

– Бидн 1 сай һар арслң шүүҗ авад мод эд-бод кеҗ олн зүсн кегдлмүд кедг болн шимтә һуйрин зүүтә хот-хол болһдг, хувц уйдг эрдм дасхҗанавидн. Урч Пүрбән Олег көвүдиг сурһна, Буван Ирина болхла күүкдиг дасхна. Мана күүкд сенр хот-хол болһад, көвүдиг тоона, эдн хамдан цәәһән ууһад, цаган сергмҗтәһәр давулна. Көвүд-күүкд цуһар баһ тетквртә болн олн үртә өрк-бүлмүдәс, тегәд эднд дассн эрдмнь эрк биш керглгдхмн, – гиҗ Светлана Владимировна келв.
Күүкдиг хувц уйдг болн хот-хол болһдгиг дасхҗадг Буван Ирина төвд психолог болҗ көдлнә, тегәд эн бичкдүдт ямр нег төрәр селвгән өгч дөң болна. Бийнь эн һурвн үртә эк болна, тегәд бичкдүдлә сәәнәр таарна. Ирина Пантелеевна бичкндк цагтан ээҗән дахад, үүл бәрдг дассмн. Эн кружок секхин төлә хойр беш, һуйр элддг, олн зүсн кегдл болһдг кергсл, юм уйдг машинкс хулдҗ авсмн.

Чадмг һардачин нилчәр
Самхан Светлана Ик Буурла района әмтнә социальн теткврин комплексн төвд 2006-ч җиләс авн көдлҗәнә, арвн һурвн җилдән терүг һардҗана. Чадмг һардачин һардврт района әмтнд социальн туслмҗ күрглһнә, баһ тетквртә болн җирһлин күнд таалд туссн улсиг дөңнлһнә көдлмш дигтә-даратаһар күцәгдҗәнә. Светлана Владимировна «2020-ч җилин Әрәсән социальн цергллтин «Алтн үзг» гидг Цугәрәсән марһана лауреат болв.


ДООҖАН Наталья

Видео