«Барин нәр» әмтиг байрлулв

21-05-2022, 10:23 | Общество, Таңһчин зәңгс

Урҗ өдр Октябрьск районд “Барин нәр” керг-үүлдвр давулгдв. Эн җил “Хальмг үнн” газетин 105 җилин өөн болҗана, тегәд эн байриг угтад “Калмыкия” таңһчин зәңгллһнә агентств барт бичгдлһнә кемд шунмһаһар орлцсн райодт тиим нәр давулхар шиидв. Дәкәд болхла эн җил Октябрьск района 45 җилин өөн давулгдҗана, тегәд “Барин нәр” хойр дам байрта, өргмҗтә болв. Байрин керг-үүлдврмүд үдин хөөн эклсн билә.

Тогтсн авъясар Октябрьск района бәәрн улс олар “Хальмг үнн” болн “Байрта” газетмүд, “Байр” болн “Теегин герл” седкүлмүдиг бичүлҗ авад, хальмг кел хадһллһнд, Хальмг Таңһчин барин кергиг делгрүллһнд ик дөң-тусан күргҗәнә. Келхд, кезәнәс авн икцарңгахн хоорндан ни-негн бәәнә. Элстәс артистнр ирәд, концерт болх гиһәд әмтн хойр өдрин өмнәс медәд, шинрүлсн Ик Царңга Сойлын Герт олар цуглрв. Зәрмнь нам өрк-бүләрн ирцхәв. “Калмыкия” зәңгллһнә агентствин көдләчнр ирсн әмтиг тосад, халун җомбаһар, боорцгар тооһад, барин һарцсла таньлдулад, бичүлҗ авцхатн гиҗ үрвр кеҗ әмтиг өврүлҗ байрлулв. Газет эс гиҗ седкүл бичүлҗ авсн күн болһнд “Хальмг үнн” газетин ах редактор Бембин Евгений неринь болн бурхна ном тод үзгин урн-бичлһәр бичүлҗ белг бәрүлснь ончта.

Концерт эклхин өмн Октябрьск района толһачин дарук Бадмин Менгиян, “Калмыкия” зәңгллһнә агентствин ахлач Марила Хоңһр, “Хальмг үнн” газетин ах редактор Бембин Евгений үг авад, ирсн улсиг йөрәһәд, иим сән өдрлә района цуг өрк-бүлмүдт седклән медүләд, ик гидг ханлтан өргв.

Түүнә хөөн Аҗин Светлана концертиг эклҗ цааранднь һардв. Хальмг Танһчин баһчудын дунд билг-эрдмәрн, дуулсн дууһарн, хальмг кел меддгәрн ончрсн Шорван Феликс еңсг сәәхн ут ду дуулад, әмтиг тосв. Ик күчтә болн экин альхн мет бүлән байн зөөр болгч хальмг ут дууг олн улст күргж медүлж чадв. Хальмгин дун кесг зун жилмүдт унтршго алтн зөөр мет мана келн-улсиг байрлулж йовсмн. Танһчин ачта дууч, җаңһрч Мукөвүнә Кутлан хальмг улст таасгдсн “Сертн, сергцхәтн, хальмгудм” болн нань чигн олн дуд дуулад, билгән үзүлв. Баһ наста Мукан Санл домбр цокад, домбрт шавашмуд хаяд дуулв, нертә дууч Обшин Оксана, П.Чонкушовин нертә Элстин билг-эрдмин колледжин ул деер үүлддг “Байр” болн Ик Царңга “Миңһн байр” ансамбльмудын биичнр “Чичрдг”, “Ишкмдг”, “Катюша”, “Терг хальмгудын би” болн нань чигн би олна оньгт тусхав. Йосндан болхла, эн артистнр мана келн-улсин сойл делгрүлҗ, олн улсиг өөрхнәр таньлдулҗана. Иим билгтә улсин нилчәр мана сойлын тускар ик холд әмтн меддг болҗана. Хәрнь, давсн җилд коронавирусн гем учрсна ашт олн-әмтн орлцдг байрин керг-үүлдврмүд болсн уга. Тегәд эн концерт маш сән болсн учрар, олн-әмтнә чикнә хужр ханһав. Нәәрин сүүләр соньн марһан болн лотерей болв.

Цаааранднь “Барин нәәрин” хойр концерт: хөн сарин 26-д Лагань балһснд болн мөчн сарин 2-т Троицкое селәнд давулгдхмн.
Манҗин Намру

Видео