Җирһлнь байрта-бахта болтха!

31-05-2022, 10:55 | Общество, Таңһчин зәңгс

Зун эклхиг бидн цуһар күләнәвидн. Бичкдүд болхла нег үлү амрлһна зуни кемиг сергмҗтәһәр давулхин тускар ухална. Сурһулин җил төгсәд, амрлһна кем эклсн зуни түрүн сарин 1-д бичкдүдиг харслһна нарт-делкән Өдр темдглнә. Тегәд күүкд-көвүдт эннь хойр дам байрта болн өргмҗтә өдр болна. Эн сән өдриг 1949-ч җилд Париж балһснд болсн нарт-делкән күүкд улсин демократическ федерацин шиидврәр зарлад, түрүн болҗ 1950-ч җилд темдглв.

Бичкдүд мана иргч, мана ицл болн орн-нутган өмәрән залх селгән гиҗ бидн келнәвидн. Эк-эцк болһн үрнь хөвтә сәәхн җирһл эдлҗ, сурһулян сәәнәр сурч, эрүл-менд өстхә гиҗ зальврна. Бидн бичкдүдтән цаһан седклән нерәдҗ, дуран болн килмҗән өгч, таалҗ өкәрлҗ өскхәр зүткнәвидн. Эндр болхла цуг нарт-делкәд әәмшгтә болн күнд цаг учрсн бәәнә, тегәд бидн дән-даҗг уга төвкнүн җирһлин тускар ухалҗ, мана бичкдүдин иргч тиньгр болтха гисн күсл зүүнәвидн. Харм төрхд, эндр дән-даҗг болҗах һазрт бичкдүд ик зовлң үзҗ, әәмшгтә таалд бәәнә, бу-селм һартан авсн улс эдн шав авч әмнәсн хаһцх гиҗ ухалҗахш.

Сүл җилмүдт бичкдүдин зөв харслһна, эднд күчән үзүлҗ әмнднь күрлһнә йовдлмудас хөрлһнә төрмүд ик чинр зүүҗәнә. Бичкндк цаг хамгин хөвтә гидг, күүкд-көвүд сурһуль сурхин, эрүл-мендән батрулхин, сергмҗтәһәр амрхин, билг-эрдмән делгрүлхин төлә бидн цуг таал тогтах зөвтә болҗанавидн. Цуг эн керг күцәлһнд мана орн-нутгт батлгдсн «Әрәсән бичкдүд» гидг көтлвр туслна. РФ-н Президент Владимир Путинә зәрлгәс иштә мана орн-нутгт «Десятилетие детства» гидг шишлң көтлвр бас батлгдсмн, терүнә медлд ямаран керг-үүлдврмүд күцәгдхиг Әрәсән правительств диглҗ авсмн. Дәкәд шидр Әрәсән Президентин даалһврар өрк-бүлмүдиг дөңнлһнә немр керг-үүлдврмүд батлгдснь мана орн-нутгт бичкдүдин зөв харслһна, эднә җирһлин таал ясруллһна төрмүд эркн чинртә болҗахиг иткүлнә. Баһ үйд килмҗән тусхаҗ дөң-нөкд болсн цагтан бидн мана ниигмин улынь батрулҗанавидн, гиҗ Владимир Путин темдглв.

Сән авъяст тохрсар, мөчн сарин 1-д мана орн-нутгт, тер тоод мана таңһчд, бичкдүдиг харслһна Өдрт нерәдсн байрин керг-үүлдврмүд болна. Элстд «Негдсн Әрәсә» партин Ахлач Дмитрий Медведевин региональн Олна приемн «Бичкдүд Фест» гидг керг-үүлдвр бүрдәҗәнә, эннь «Бат өрк-бүл» гидг төсвин медлд давулгдҗана. Күүкд-көвүдин төлә спортивн, билг-эрдмин марһас, робототехникин болн зурлһна мастер-класс болхмн, байрин концертд бичкдүдин коллективс орлцҗ билг-эрдмән үзүлхмн. Н.Пальмовин нертә Келн-улсин музейд бичкдүдиг харслһна Өдрт нерәдгдҗ маңһдур «Заясн бичг» гидг нарт-делкән һәәхүл секгдҗәнә, күүкд-көвүд дунд зургудын марһан болхмн. Таңһчин райодт эн сән Өдрт нерәдҗ бас байрин керг-үүлдврмүд бүрдәгдҗәнә. Дәкәд эн өдрмүдт таңһчин сурһульмудын улд өдрәр үүлддг лагерьмүд секгдҗәнә. Шидр таңһчин Толһач Хаска Батун зәңглсәр, эн җил бичкдүдин зуни амрлһна кемд 7 миңһн һар сурһульч амрад, цогц-махмудан батрулҗ сергмҗтәһәр цаган давулхмн. Эн җил түрүн болҗ IT-лагерь үүлдхмн, терүнд компьютерн эв-арһсар соньмсдг бичкдүд медрлән гүүдүлҗ шин эрдм дасч чадх.

Мана бичкдүд һурвн сарин эргцд сергмҗтәһәр амрад, цогц-махмудан болн эрүл-мендән батрулад, шин һазр үзәд, өдр болһн гилтә байртаһар давултха гиҗ дурдҗанавидн. Җирһлтн хөвтә болтха, сансн цуг тоот күцх болтха!

ДООҖАН Наталья

Видео