Москвад Хальмг Таңһчин Өдрмүд болв

09-06-2022, 10:19 | Общество, Таңһчин зәңгс

Мөчн сарин 7-8-д Москван үндсни Герт «Әрәсән олн өңг» нертә фестивалин йовудт «Хальмг Таңһчин Өдрмүд» давулгдв. Җил болһн Москван үндсни Герин седвәрәр тиим керг-үүлдвр болна. Тер мет Әрәсәд бәәдг олн келн-улсин элчнр эврә һәәхүл, номин «төгрг ширә» бүрдәҗ, билг-эрдмләрн таньлдулна. Эн җил мана хальмг улс эврә таңһчин тускар тиим кевәр олнд медүлҗәнә.

Эн фестивалиг «Содружество» Хальмг Таңһчин үндсни Гер бүрдәв. Эн ниицән нидн бар сард бүрдәгдсн билә. Ниицәнә ахлач Әрәсән ачта багш Шевкин Борис, энүнә һардврт Шевкин Ревмира болн Мукөвүнә Цаһан үүлдҗәнә. Җил болад уга цагин болзгт эн ниицән баһ биш көдлмш күцәв. Туула сарин чилгчәр эдн Москван үндсни Герт одад, хамдан көдлх зура тогтаһад, мөчн сард ирлцңгү фестиваль давуллһна туст шиидвр батлсн билә. Эн керг-үүлдврт Хальмг Таңһчас 51 күн орлцҗана. Урҗ өдр, мөчн сарин 7-д, фестивалин түрүн өдрт «Хальмг келн-улс Әрәсән тууҗд» гидг номин конференц болв. Москван үндсни Герин ахлач Ануфриенкон Сергей, Әрәсән Орн-нутгин Хүүвин депутат Башанкан Бадм, Москвад бәәдг Хальмг Таңһчин элчлтин ахлач Картин Андрей нүр үг келҗ хургиг секәд цугтаһинь йөрәв. «Хальмг үнн» газетин ах редактор Бембин Евгений конференцин көдлмшиг һардҗ давулв. Хальмгудын кезәңк тууҗин болн хальмг улс дәәнд орлцсна тускар тууҗин номин доктор Очра Уташ илдкл кев. Хальмг келнә, шар шаҗна болн бичлһнә тускар Бембин Евгений болн Бичән Баазр тодрхаһар келҗ өгв. Эн керг-үүлдврт орлцсн номтнр Баатрин Светлана болн Борлга Босха хальмг билг-эрдмин болн хальмг амн үгин тускар олнд цәәлһвр өгснь бас темдгтә болв.

Конференцин хөөн хальмг зурачнрин һәәхүл секгдв. Эн һәәхүлд Хальмгин нертә болн баахн зурачнрин, тер тоод Санҗин Дмитрийин, Пован Александрин, Каҗин Юрийин, Цонхлан Тимурин, үүдәврмүд үзүлгдв. Дәкәд болхла энд Милованован Татьянан «Хальмг тег» нертә зургудын һәәхүл бүрдәгдв.

Дарук өдртнь «Ноһан Дәркин тханк» фильм үзүлгдв. Эн фильмиг Ширина Нинан һардвртаһар цокч авсмн. Энүг үзсн улс цугтан гилтә мана бурхна йосна тууҗар соньмсҗ седклән тусхасн болв. Бас хальмг билгтнр мастер-классмуд давулад, эврә онц билгәрн олн әмтиг өврүлв. Фестивалин чилгчәр олн гиичнр «Өөрднр» театрин, «Бумбин орн» ансамблин, хальмг дуучнрин билг-эрдмлә таньлдснь басл бахмҗта йовдл үүдәв.

МАНҖИН Намру

Видео