Дурна залян хадһлҗ ниитә бәәнә

09-06-2022, 10:31 | Общество, Таңһчин зәңгс

«Җилин сән гисн өрк-бүл» Цугәрәсән марһана региональн девсңд «Баахн өрк-бүл» номинацд Үстин района Цаһан Амнд бәәдг Кегдышевихн диилвр бәрв. Герин эзн Эрнцн – малын эмч, Саглр авальнь талын келнә багшар Цаһан Амн селәнә 2-ч тойгта дунд сурһульд көдлнә. Эдн Иляна болн Алтн күүкн-көвү асрҗадг баахн эк-эцк болна. Баһчуд арвн җил хооран таньлдад, нег-негнәннь седкл медҗ өрк-бүлән өндәлһсмн. Эн җилмүдин эргцд эдн дурна залян хадһлҗ, хойр эңкр үрндән чик сурһмҗ өгч ни-негн бәәнә.

Эрнцн Цаһан Амн селәнд өсәд-боссмн, Саглр болхла Баһ Дөрвдә района Зурһан поселкас мөн. Герин эзн номһн, сән заңта, дала үг уга залу күн болна, Саглр бичкнәсн авн ду-биид дурта, седвәртә болн шулун-шудрмг болдмн. Тер төләд эдн нег-негнләһән сәәнәр таарч, кен-негнәннь седкл болн авг-бәрц медҗ ниитә бәәнә. Эн марһанд белдвр кесн цагт эдн өрк-бүлиннь туск видеопрезентац белдв, тегәд Эрнцн авалян дахад билг-эрдмән үзүлснь энүг меддг улст өврмҗ болв. Келхд, эдн давсн җилд эн марһанд бас орлцсн билә, зуг диилвр бәрхд эднд нег балл күртсн уга. Тегәд эн җил эдн диилвр бәрснь эднд бәәтхә, олн элгн-саднднь болн үр-иньгүдтнь хойр дам байрта йовдл болв.

Саглр Сергеевнан келсәр, марһанд белдвр кесн цагтан эдн билг-эрдмән үзүлҗ, үүдәгч кевәр үүлдҗ хоорндан улм ниитә болснь лавта. Йирин эдн сул цаган хамдан давулхдан дурта. Эднә тоолврар, нег өдр болв чигн өрк-бүләрн хамдан амрх, эс гиҗ нег керг күцәх кергтә. Эдн селәнә паркд эс гиҗ Иҗл һолын көвәд хамдан амрна, хам-хоша бәәдг Әәдрхн балһснд одна, Аһш балһснур зуульчлад Баһ Дөрвдә районд бәәдг олн элгн-садндан золһна. Үвлднь эдн күүкдтәһән хамдан һаза наадна, цанар дошна. Хамдан давулсн цагиг бичкдүд кезә чигн мартхш, тегәд эдн өсәд-босхларн тер хөвтә цагиг бүләнәр тодлхнь маһд уга.

Эрнцн Викторович болн Саглр Сергеевна эврәннь чик авг-бәрцәрн, ухан-тоолврарн күүкдтән үлгүр болхар шунна. Эдн өвкнриннь авъясар бәәҗ, ах улсиг күндлҗ тевчнә, талдан улст үлү үзхш, бәәсәрн хувалцҗ цаһан седкләсн дөң-тус күргхәр зүткнә. Күүкн-көвүнь тедниг дахҗ өлзәтә сән үрд болҗ өсчәнә. Иляна 2-ч класс төгсәв, эн сурһулян йилһән сәәнәр сурна. Күүкн экән дахад бас еңсг сәәхнәр дуулна, эн көгҗмин сурһульд билг-эрдмән гүүдүлҗәнә. Бичкн Алтн эн җил сурһульд орхмн. Саглр Сергеевна сул цагтан үүл бәрхдән дурта, эн ке-сәәхн хувц өлгнә болн уйна. Дәкәд эн 8-ч классин һардач болна, тегәд көдлмш дала болад тааста керг күцәх цол учрхш. Эн олна нүүрт йовдг төләдән олн зүсн керг-үүлдврт орлцна, селәнә сойлын Герт болдг байрт билг-эрдмәрн әмтиг байрлулна. 2016-ч җилд Кегдыша Саглр «Җилин багш» гидг района марһанд 2-ч орм эзлв, 2019-ч җилд эн профсоюзн җисәнә нүүрләчнрин таңһчин марһанд 3-ч орм эзлв. Эн җил болхла нертә шүлгч Көглтин Даван 100 җилин өөнд нерәдгдсн района марһанд диилвр бәрәд, Амр-Санана нертә Келн-улсин дегтрин саңд болсн керг-үүлдврт бас орлцв.

– Өрк-бүлмүд дунд болсн марһанд белдвр кехд маднд кесг күн дөң болв, бидн цугтаднь ханлтан өргҗәнәвидн. Марһанд диилвр бәрсн өрк-бүлмүдиг Элстд цуглулад, байрин керг-үүлдвр бүрдәснь маднд бахмҗта болв. Бидн талдан өрк-бүлмүдлә таньлдҗ, теднлә сергмҗтәһәр цаган давулвидн. Иим марһас билг-эрдмән делгрүлхд, өрк-бүлин күч батрулхд, эк-эцкнр болн күүкд хоорндан ниитә болхд туслна. Бидн мана района нериг өөдән бәрҗ таңһчин марһанд диилвр бәрснь цааранднь чигн седвәртәһәр болн үүдәгч кевәр үүлдхд урмд өгв, – гиҗ Саглр Сергеевна келв.

ДООҖАН Наталья
ЗУРГТ: Кегдышевихнә өрк-бүл

Видео