Күн болх баһасн...

25-06-2022, 14:31 | Общество, Таңһчин зәңгс

Җил болһн мөчн сарин 27-д мана орн-нутгт баһчудын Өдр темдглнә.

Күн болх баһасн, күлг болх унһнасн гиҗ хара келчксн үлгүр биш. Баһ болн дүүвр насн күн болһна җирһлд онц орман эзлнә. Мел эн саамд баһчуд сурһулян төгсәҗ, кергтә эрдмән олҗ, күч-көлснә хаалһан эклҗ, өрк-бүлән өндәлһнә. Эндрк сурһульчнр, оютнр, баахн арһлачнр, номтнр чигн Әрәсән өөрхн иргчин делгрлтин төлә тәвцән орулҗ йовна. Өдгә цагт Әрәсәд (2020-ч җилин то-дигәр) 14-әс авн 35 нас күрсн һучн йисн һар сай баһчуд бәәнә. Җил ирвәс мана орн-нутгт баһчудын төлә олн эв-арһс бүрдәгднә. Эднә хәләциг, ухан-тоолвриг оньгтан авхин туст баһчудын шишлң политик үүлдҗәнә. Тер мет орн-нутгт баахн өрк-бүлмүдиг дөңнхин туст олн зүсн көтлвр бәәдл-җирһлд тохрагдна. Баһчуд сән сурһульта болтха гиһәд дунд болн ик сурһуль сурхин төлә бас цуг таал тогтагдсн бәәнә. Тиим кевәр 2018-ч җилд Әрәсән Президент Владимир Путинә седвәрәр «Әрәсә – олн эв-арһта орн-нутг» нертә шишлң төсв бүрдәгдәд күцәгдҗәнә. Эн төсв баһчудын социальн болн сурһуль-эрдмин халхар орн-нутгар бүрдәгдсн цуг төсвсиг негдүлсн болдг. Баһ наста күн болһнд эврәннь эрдмән, билгән, кергән бәәдл-җирһлд тохралһн төсвсин һол күслнь болна. Тер мет сүл җилмүдт баһчуд дунд волонтермудын җисән делгрлт авчана. Эдн кесг форум бүрдәҗ, дамшлтарн хувалцҗ, төрскнч седклтә улс болҗ өсхәр шунна. Терүнәс нань Әрәсәд баахн өрк-бүлмүдиг дөңнхин туст шишлң көтлвр бүрдәгдәд бас көдлҗәнә. Эднә төлә патьр эс гиҗ гер хулдҗ авлһнд дөң күрггднә. Дәкәд болхла таңһчин бүрдәцсин һардачнр көдлмшт нурһлҗдан баһ наста мергҗлтнриг авхар седнә, гиҗ келх кергтә.

Маңһдур Элст балһснд баһчудын Өдрт нерәдсн кесг керг-үүлдврмүд давулгдхмн. Асхн тавн часин алднд балһсна Диилврин Паркд дунд-профессиональн болн ик сурһулин бүрдәцсин оютнр, арһлачнр, волонтермуд, спортсменмүд хурхмн. Көтлврин йовудт кесг талвңгуд үүлдхмн, тедн дунд Әрәсән сурһульчнрин җисән, Спидкубингин федерац, зургудын олн зүсн бәәрн көдлхмн. Тер мет Диилврин волонтермуд, Юнармия, цергә-төрскнч седклтә клубмуд, хәәврин отрядмудын ассоциац билг-эрдмән үзүлх. Керг-үүлдврин йовудт «Әрәсән оютнрин хавр» фестивалин болн 2022-ч җилин Дельфийск нааддын дииләчнр билгәрн олн-әмтиг байрлулхмн. Асхар Сити Чессин өөр «Свобода. Молодость. Лето» зургин марһан болх, харвачнр болн нәрн шинҗин тәәлвринь олдг улс эрдмән үзүлх. Дәкәд арһлачнрин талвң бас үүлдҗ, олн зүсн зургуд, гипсас кесн кегдлмүд, хорһн шам, келн-улсин хатхмр кегдҗ баһчудт үзүлгдхмн. Тер мет «Зеленая точка» залһлдана «Тинькофф банкин» мергҗлтнр эврәннь туслмҗин тускар тодрхаһар келҗ өгх. Байрин концертд Mono, Evolution, APIGs, Rotten, Дур-н-дан, D-Axe болн нань чигн багмуд орлцхмн.


КАРСАНА Евгения

Видео