Өрк-бүлдән хәәртә, ачнр-зеенртән эңкр

07-07-2022, 12:57 | Общество, Таңһчин зәңгс

Бадан Борис Лидия хойр нег-негән дунд сурһульд сурчасн цагас авн меднә. Эдн Баһ Дөрвдә района Ханата селәнә дунд сурһулин интернатд таньлдв. Борисин эк-эцкнь Унһн Төөрәч бичкн селәнд малд көдлҗ йовсмн, Лидия болхла Зурһан селәнд өсәд-боссмн, тегәд эдн интернатд бәәҗ сурдг билә. Тер цагас авн җирн шаху җил давв, болв эндр күртл эдн баһ цагтан нег-негндән өгсн дуран әрүнәр хадһлҗ ниитә бәәнә.

Сурһулян төгсәснә дару Борис цергт мордв, Лидия арднь күләһәд үлдв. Хойр җилин эргцд баһчуд бичг авлцад, хамдан җирһлин хаалһар йовхин тускар ухалҗ, нег-негән бүлән үгәр дөңндг бәәсмн. Хойр җилдән нег-негнәсн холд бәәснь эднә дурна залиг улм батрулв гиҗ тәвн һар җилдән хамдан бәәдг Борис Нимгирович болн Лидия Пюрвеевна хойр келнә. Цергәс бууҗ ирснә дару баһчуд ханьцад, Элстд нег бичкн гер нәәмәдлҗ авч өрк-бүлән өндәлһв. Герин эзн «Одн» заводт күч-көлснә хаалһан экләд, өрк-бүлән теҗәдг болв. Лидия Пюрвеевна болхла 1-ч тойгта көгҗмин сурһульд дегтрин саңд көдлв. Баһ насн сәәхн цаг, кедү күнд болв чигн баһ наста улс бәәсәрн байн болҗ, мууһан дарад, сәәһинь өргәд, нег-негән дөңнҗ, олна хормад багтҗ бәәсмн.

– Өрк-бүл бат болхин төлә хойр иньг кен-негнәннь седкл медҗ, нег-негән дөңнҗ, ниитә бәәх зөвтә. Мана өвкнрин авъясар бәәх кергтә, тер цагт хойр күүнә дурн батрад, өрк-бүл хөвтә-кишгтә болна. Нег-негән тевчх, әмтнлә сән бәәх, керлдән-цүүгән уга, өр-өвч седклтә болх кергтә гиҗ мини хадм эк нанд сүв-селвг өгдг билә. Ода болхла би эврән хадм эк болнав, тегәд көвүд-берәчүдтән болн күүкн-күргндән бас нүдн-амн болҗ хамгин түрүнд нег-негән тевчтн гиҗ дасхнав. Бидн авальтаһан дөрвн үртә, зурһан ач-зеетә болн нег җичтә болнавидн, җирһлин байн дамшлтарн эднлә хувалцнавидн, – гиҗ Лидия Пюрвеевна келнә.

Ууһн Мергн болн отхн Нимгр көвүднь Москвад бәәнә, Валера көвүнь Сарпулин крайд эмчәр көдлнә, Саглр күүкнь Элстд өрк-бүлтәһән бәәнә. Ода деерән зуг отхн көвүнь гер авад уга. Эн өдрмүдт Нимгр дигтә хәрҗ ирв, тегәд эк-эцкднь «Дурна болн итклин төлә» гидг медаль бәрүлҗ өглһнә байрин хургт орлцхмн. Бадаевихн байрин өдрмүд болхла эк-эцкиннь герт цуһар цуглрна. Эдн эңкр экнь болн ээҗнь болһсн шимтә сенр хотд йир дурта. Ачнр-зеенрнь болхла ааван дахад ду дуулад, биилхдән эвтә. Келхд, Борис Нимгирович «Одн» заводт үүлддг ансамбльд орлцдг билә. Дима зень ааван дураҗ бас билгтә, сурһулян йилһән сәәнәр сурна, хальмг келндән хару көвүн болна.

Сул цаг учрхла аав-ээҗ хойр күүкн-күргндән одад, герин һаза олн зүсн цецгүд болн модд урһана. Бийснь эдн олн давхрта герт бәәнә, тегәд күүкн-күргндән одад, цевр аһар кииләд сад-һарудт сул цаган давулна. Күргнь хадм эк-эцк хойран тевчҗ күндлнә.

Бадан Борис болн Лидия дөрвн үрндән чик сурһмҗ өгч, олн җилдән үнн-чик седклтәһәр көдлҗ, олн дунд тоомср олсн күч-көлснә ветеранмуд болна. Темдглхәс, Лидия Пюрвеевна бичкдүдин билг-эрдмин сурһульд тәвн хойр җилдән көдләд, ачта амрлһнд һарсмн.

Тәвн һар җилдән хамдан ниитә бәәҗ, өлзәтә сән үрд өскҗ ачнр-зеенртән нүдн-амн болҗ йовх ачта улс өрк-бүлин, дурна болн итклин Өдрлә ирлцүлҗ «Дурна болн итклин төлә» гидг медаляр ачлгдхмн. Баһ цагтан таньлдҗ, байр-зовлңган әдл хувалцҗ, җирһлин хаалһар һар-һаран бәрҗ хамдан йовх Борис Нимгирович болн Лидия Пюрвеевна хойр дорас өсч йовх баһчудт зөвтә үлгүр-үзмҗ болҗана.


ДООҖАН Наталья

Видео