Дурна болн итклин төлә

16-07-2022, 13:14 | Общество, Таңһчин зәңгс

Таңһчин Росгвардин әңгүдт найн һар олн үртә өрк-бүлмүдин элчнр көдлнә. Тедн дунд олн үртә Довгановихнә баахн өрк-бүлиг зааҗ болхмн. Шидр давсн өрк-бүлин, дурна болн итклин Өдрлә эдниг элгн-саднь, өөрхн үүрмүднь болн хамдан көдлҗәдг улс йөрәв.

Басң болн Виктория Довгановихн хоюрн Росгвардин ведомственн биш харуллһна әңгд көдлҗәнә. Полицин лейтенант Басң Довганов зурһан һар җил ОВО-н ах юрисконсультар үүлднә, аваль Виктория болхла канцелярин ах мергҗлт болна. Эдн көдлмштән таньлдҗ, нег-негндән дуран өгч, өрк-бүлән өндәлһв. Дөрвн җил хооран баахн өрк-бүлд ууһн үрн Алина күүкн һарв. Удл уга Алина хойр икр дү көвү дахулад, Довгановихн олн үртә бүл болсмн. Эндр эдн сул цаган хамдан давулхар зүткнә. Алина күүкнь зурлһна эрдмәр соньмсна, энүнә түрүн зургуднь эднә патьрин эрсмүд кеерүлнә. Герин эзн даңгин спортын залд цогц-махмудан батрулна, хамдан көдлдг үүрмүдтәһән футбол, волейбол наадхдан бас дурта. Виктория шимтә, сенр хот кеҗ, авалян болн үрдән байрлулна. Энүнә келсәр, авальнь болн үрднь хальмг бөөрг-боорцгт, һуйрта махнд йир дурта.

Басң Довгановин келсәр, эн җил Әрәсән Президент Владимир Путинә зәрлгәс иштә өрк-бүлин, дурна болн итклин Өдр орн-нутгин шаңһа байр болҗ батлгдснь темдгтә. Юңгад гихлә күн болһнд хамгин эңкр, әрүн, өөрхн болдгнь өрк-бүл мөн. Өрк-бүлдән бидн чик сурһмҗ авч, җирһлин хаалһд орнавидн. Бидн авальтаһан хамдан эврәннь һурвн үрән өскәд, сурһад, тааста эрдмәр сурһуль сурхд туслх күслтә бәәнәвидн, гиҗ олн үртә эцк ухан-тоолврарн хувалцв. Өрк-бүлин, дурна болн итклин Өдрлә мана таңһчин улсиг әрүн цаһан седкләсн йөрәҗәнәвидн, үрдән өскҗ, дуран хадһлҗ, нег-негән дөңнҗ йовтн, гиҗ Басң болн Виктория Довгановихн кен-негнднь дурдҗана.

КАРСАНА Евгения

Видео