Өвкнрин туурмҗин хаалһар йовҗ…

26-07-2022, 13:39 | Общество, Таңһчин зәңгс

Урҗ өдр Элстд 110-ч ОККД-н туурмҗин 80 өөнд нерәдсн мөртә йовлһнд орлцачнриг тосв. Керг-үүлдвр эклсн өмн хур асхад орв. Эннь сән йорта темдг гиҗ келдг. Тер бийнь балһсна төвд олн-әмтн хурв. Тууҗлгч йовлһна орлцачнриг күлән бәәҗ тууҗин номин доктор Уташ Очиров тәәз деер һарч 110-ч мөртә хальмг онц дивизин тускар тодрхаһар келҗ медүлв. Удл уга Ленинә нертә уульнцар барун үзгәс мөртә цергчнр аашснь үзгдв. Олн-әмтн альхан ташҗ эдниг тосв. Цергчнр һартан тугмуд бәрҗ, «Уралан!» гиҗ хәәкрҗ тәәзин өмн ирәд зогсв.

Таңһчин Залврин һардачин үүлиг цаг зуур дааҗадг Очр Шургучеев мөртә цергчнрт тиим тууҗлгч чинртә керг-үүлдврт орлцснднь ханлтан өргҗ, хойр субъектин эргндк һазрар йовҗ, мана өвкнрин санлынь тевчҗ ирсиг темдглв.

Келхәс, эн йовлһн кесг үй улсиг хамцулсн болдг. Хамгин ик наста орлцач Андрей Оконов далн негтә, хамгин баахнь Байр Музраев арвн нәәмтә көвүн мөн. Андрей Нюрмяевичин келсәр, тууҗлгч йовлһнд орлцсндан байрта-бахта бәәдг болв. Ростовск мүҗин бәәрн улс мадниг бүләнәр тосад, сән гидгәр тооһад, мана өвкнрин туурмҗин санлынь хадһлҗ, эндр күртл тевчҗ йовна, гиҗ Андрей Оконов темдглв.

– Би эврән Талтахна әәмгин көвүмб. Эн керг-үүлдврин тускар нанд ахм Аршан Нуров медүлҗ тегәд йовхар шиидүв. Тууҗлгч хаалһар йовҗ, кесг соньн орм үзҗ, хурт норад һаң халунд шаргдад, цуг йовснь бийнь маднд харшлт болсн уга. Баһ наста арвтнр тиим тууҗлгч керг-үүлдврмүдт эрк биш орлцх зөвтә, – гиҗ хамгин баахн орлцач Байр Музраев ухан-тоолврарн хувалцв.

– Күндтә ахнр-дүүнр, улан залатнр, өвкнрин хаалһар арвн дөрвн хонгтан йовҗ, мана аавнр мадна төлә әмән өгч, цусан асхҗ йовсн һазрт күрәд хәрү ирвидн. Арһта залус болад, мөрдән унад Баһ Дөрвд селәнәс һарад, Ростовск мүҗин Раздорская станиц күртл тавн зун дууна һазрт йоввидн. Хамдан йовсн үүрмүдт ханлтан өргҗәнәв, оньдин дөрвн цагт олна хормад багтҗ, зу нас наслҗ йовтн, – гиҗ бас нег орлцач Олег Болдырев сәәхн хальмг келәр йөрәлән нерәдв.

Элстин төвд хурсн улс бас ухан-тоолврарн хувалцв. «Дорас өсч йовх баһчудт эн йир сән үлгүр, аавнрин туурмҗиг бидн мартх зөв угавидн, тиим керг-үүлдвр бүрдәгдснь сән йовдл», – гиҗ балһсна бәәрн күн Владимир Настинов келв. Медәт Николай Манджиевин темдглсәр, Советин Союзин Баатр Делгә Эрднин туурмҗар бидн бахмҗ кеҗ баһчудт энүнә тускар медүлх зөвтәвидн. Энтн кесгәс нааран күләҗәсн керг-үүлдвр болҗана, тегәд энүнд орлцсн улс дааврта кергән күцәҗ, эрүл-менд гертән хәрҗ ирснд байрлҗанав гив.

Тууҗлгч йовдлд нерәдсн концерт болв. Таңһчин сойлын көдләчнр сәәхн еңсг дудуулҗ хальмг би биллҗ олн-әмтиг байрлулв.


ОЛЬДАН Цаһан

Видео