Хальмг теегт дуран олсн Салам

30-07-2022, 12:41 | Общество, Таңһчин зәңгс

2011-ч җилд ООН-а 65-ч сессин йовудт така сарин 30 – нарт-делкән иньгллтин Өдр гиҗ зарлгдсн билә. Эн өдр делкәд бәәдг олн келн-улс хоорндан ни-негн, үр-иньгин таалд бәәхин төлә батлгдсн болдг. Эндр делкәд амр биш цаг учрҗахас иштә Иньгллтин Өдр ончта, темдгтә ик чинр зүүҗәхнь лавта. Ик кезәнәс авн өдгә цаг күртл мана орн-нутг талдан нутгудын әмтнлә ни-негн бәәхәр даңгин зүткҗ йовдг.

Олн келн-улсин элчнр ханьцад тогтасн өрк-бүл эврә өвәрцтә болна. Юңгад гихлә эдн кесг келн-улсин кел, сойл, тууҗ, авг-бәрц әдләр тевчнә. Ямр чигн байр-нәр учрхла өрк-бүлд эк-эцкин авг-бәрц учртан авгдна.

Дагестанд һарсн Салам Омарбагаев дөчн шаху җил хооран хальмг теегт ирҗ, энд дуран олв. Тер цагас авн амрад-җирһәд бәәнә. Салам болн Ирина Омарбагаевихнә түрүн харһлт найдгч җилмүдт болв. Уулын һазрт өсч-боссн көвүн Салам Дагестан Республикин Акушинск района Усиши поселкас Хальмг Таңһчин Целинн района Троицкое селәнүр эгч талан гиичд ирв. Энд нег уульнцд эгчиннь өөр бәәдг Ирина Головковаг үзәд, дуран өгәд эн күүкн уханаснь һарлго бәәв. Иринала таньлдад, күүкнә ард йовад, удл уга баһчуд нег-негндән дуран өгәд, даргин-орс улсин авг-бәрцәр шуугатаһар хүрмән наадсн болдг. Салам уулын йоста залу болҗ муурсан медлго көдләд өрк-бүлән теҗәдг болв. Омарбагаевихн олн җилдән Целинн РЭС-т көдләд, үүрмүд дундан цаһан седклтә, тоомсрта, күндллһ олсн өрк-бүл болҗ тоолгддг мөн. Магомедсалам, Казбек, Алексей һурвн көвүһән өскҗ, цугтаднь сурһуль өгч җирһлин чик хаалһднь орулв. Өдгә цагт ууһн көвүнь Магомедсалам Шин Зеландин орн-нутгт бәәнә, энүнә авальнь хальмг күүкн Виктория мөн. Казбек Алексей хойр өрк-бүлмүдтәһән Москвад көдлҗәнә. Отхн Алексейин авальнь бас хальмг күүкд күн. Ах-дү хоюрн цергә үүлдвр шүүҗ авад, орн-нутгин хотл балһснд Росгвардьд көдлнә. Көдлмштән күцәмҗ бәрсн төләдән Күндллһнә һашгудар, Ханлтын бичгүдәр, талдан кесг темдгүдәр болн медальмудар ачлгдсн болдг. Терүнәс нань Омарбагаевихн дуулдг-биилдг билгтә улс гиҗ келҗ болхмн. Эцкнь көвүдтәһән гитар цокна болн талдан кесг көгҗмин зевсгүдт нааддг арһта. Ачнрнь холд бәәдг учрар ээҗ-аав талан хая нег ирнә, эднлә телефоһар эс гиҗ социальн сүлҗәнд даңгин күүнднә. Цол учрхла зуни кемд өрк-бүләрн хамдан амрна. Иим харһлтыг Омарбагаевихн теңкән угаһар күләнә. Көвүдән, ачнран күләҗ герин һулмт хадһлҗадг Ирина өөрхн улсан шимтә сенр хотар байрлулхар адһна. Эңкр эк, килмҗтә ээҗ кеҗ-һарсн хот даңгин әмтәхн болна. Харһсн цагтан көвүдн эк-эцкдән хол һазрт яһҗ бәәсән медүлҗ, байр-зовлңган келҗ, сүв-селвг авхар шунна. Тиим кевәр нег өрк-бүлд даргин, орс, хальмг келн-улс ханьцад, байрта-бахта бәәҗ олнд үлгүр болҗахнь лавта.

КАРСАНА Евгения

Видео