Әрүн чинртә бадм цецг минь...

02-08-2022, 12:12 | Общество, Таңһчин зәңгс

Давсн бемб өдрлә Лаганя районд бадм цецгин фестиваль байрин бәәдлд секгдв. Энүнә тускар таңһчин Толһач Хаска Бату эн җил Петербургск экономическ форумин йовудт зәңглсн билә. Бату Сергеевич фестивалиг долан хонгин туршарт давулхар шиидв. Тегәд эн керг-үүлдвр Хальмг Таңһчин зәрлгәс иштә така сарин 30-ас авн ноха сарин 6 күртл давулгдҗана. Темдглхәс, фестиваль Хальмг Таңһчиг, Аһшин болн Әәдрхнә мүҗсиг хамцулҗадг йовдл болҗана.

Бемб өдрлә өрүн эрт Лагань балһсна Дарделинг хурлд ик мөргүл болв, энүнд бәәрн улс олар ирв. Келхәс, 1992-ч җилд Дала Ламин Гегән Хальмгт хойрдад баралхҗ ирсн цагт эн хурл босхгдсн ормиг әрвслсн бәәҗ. Лаганя района һардврин болн бәәрн улсин дөңгәр хурл босхгдад 1995-ч җилд секгдсн болдг.
Фестивалиг секлһнә һол керг-үүлдвр Джалыково селәнд бүрдәгдв. Үдин хөөн олн гиичнр, зуульчнр экләд хурв. Энд темән деер сууһад довтлдг арһ учрв. Кесгнь бадм цецгин цецгәрлтиг онһцар йовҗ һәәхв. Тер мет Джалыково селәнд бәәдг Галсанг хурлд ирсн улсин төлә һәәхүл болн экскурсь бүрдәгдсн билә. Кесг арһлачнр эд-тавран ширә деер тәвҗ хулдв. Хальмгин һарин эрдмчнрин гильдийин гешүн Екатерина Адьяеван келсәр, эн Элстәс эврәннь кегдлмүдән хулдхар авч ирв. Эннь болхла олн зүсн наадһас, хальмг махлас, мөрд, темәд болн талдан кегдлмүд мөн. Зуульчнр соньмсад, кегдл болһна тускар цәәлһвр өгч хулднав, гиҗ Екатерина Лиджиевна келв.

Өдр йир халун болв, тегәд асхн 19 часла серүн орсн кемд фестивалиг секв. Керг-үүлдвриг «Бадм цецгин туск домг» нертә театрализованн наадар эклв. Энүг «Җаңһр» нертә наадна театрин һардач, ах режиссер Алексей Сарангов тәвсн билә. Нааднд 100 һар күн орлцв. Келхәс, энүнд нертә артистнр бәәтхә, Лаганя района эврә дурар үүлддг билгтнр бас орлцсмн. Алексей Владимировичин келсәр, бадм цецгин фестиваль өргмҗтә сәәхн керг-үүлдвр болҗана.
– Би эврән Лаганя районд өсч-боссн күн, тегәд мини төлә эн фестивальд орлцлһн хойр дам байрта. «Бадм цецгин туск домгт» хальмгуд Иҗлин болн Көк теңгсин көвәд яһҗ ирснә тускар келгдҗәнә. Бадм цецг мини медсәр цевр, сәәхн, әрүн чинртә темдг мөн. Тегәд фестиваль җил болһн давулгдҗ, мана таңһчин тускар зуульчнр медәд, нааран олар ирхнь лавта гив.

Лаганя района муниципальн бүрдәцин һардач Очр Очиров тәәз деер һарч хурсн әмтиг ончта йовдлла йөрәв.
– Күндтә нег һазра улс, цуг таанрт халун мендән күргҗәнәв! Бадм цецг шар шаҗнд шүтдг улсин төлә әрүн темдг болна. Ирсн олн гиичнр, зуульчнр фестивалин йовудт кесг керг-үүлдврмүдт седкләрн орлцҗ чадҗана, – гиҗ Очр Степанович келв. Хальмг Таңһчин Залврин Ахлачин дарук Андрей Чиджиев фестивалин чинриг темдглҗ, бәәдл-җирһлд тохрх шин авъясин темдг болҗана гив. Хаврар давсн бамб цецгин фестиваль Әрәсән сән гисн керг-үүлдврмүдин тоод орсн билә, тегәд бадм цецгин фестиваль бас батрад олн зуульчнриг соньмсулҗ, Әрәсән зуульчллһна шин хаалһин негнь болхд маһд уга, гиҗ Андрей Улюмджиевич темдглв. Тер мет бадм цецгин фестивалин секлһнд ирсн автозуульчллһна ассоциацин һардач Сергей Лобаревин келсәр, эн мана регионд бәәдг соньн тоотла таньлдхар, үзхәр, шинҗлхәр ирсн болв. Әрәсән ханьд ордг өвәрц тууҗта, онц сойл-авъяста регионмудыг темдглҗ, иргчдән автозуульчнр ирәд таңһчиг хәләхмн гиҗ келв.

Байрин концерт эклхин өмн Джалыково селәнә бәәрн күн, шүлгч, көгҗмч Иван Убушаевиг хурсн әмтн тевчҗ альхан ташҗ тосв. Цааранднь таңһчин болн Лаганя района сойлын көдләчнр бүрдәсн концерт болв. Энүнд «Хәдрис», «Олимп», «Лагань» ансамбльмудт орлцачнр, җаңһрч Андрей Очир-Гаряев, нертә дуучнр Анна Очкаева, Эдуард Бурлаков, Кутлан Мукабенов эдн билг-эрдмән олнд белглв. Асхн ора олн гиичнрт болн орлцачнрт хальмг шимтә махнас белдсн күр амсх арһ учрв. Бадм цецгин фестиваль ноха сарин 6 күртл Лаганя районд давулгдад, маңһдуртнь Әәдрхнд цаарандан болхмн.

КАРСАНА Евгения

Видео