Бурхн Багшин Алтн сүмд зуульчнр олар ирнә

02-08-2022, 12:20 | Общество, Таңһчин зәңгс

Җил болһн Хальмг хурлд кесг миңһн зуульч ирҗ, Бурхн Багшин Алтн сүмиг һәәхҗ, дотрнь орҗ, шар шаҗна авъясмудла таньлдна. Мөрн сарас авн мөчн сар күртл зуульчнрин то икднә.

Цутхлң хурлын музейин көдләчнрин келсәр, мөрн сарин дундурар хурлд нег өдр эдн 94 экскурьс кесмн. Тиигәд негхн өдрин дунд Бурхн Багшин Алтн сүмд 3,5 миңһн күн Хальмгин Цутхлң хурлд цәәлһвр авсн болҗана.

Экскурсоводмуд, волонтермуд ирсн әмтнд цәәлһвр өгч, цуг тоотыг үзүлнә. Эднә эврә сән дурар күцәҗәх көдлмш даңгин зөвтә кевәр үнлгднә. Экскурьс келһнд шишлң медрлтә экскурсоводмудла хамдан Хальмг ик сурһулин оютнр орлцна. Баһчуд эн кергиг ик даавртаһар күцәдгин тускар хурлд темдглнә. Харһлт болһндан белдәд, бурхн-шаҗна туск дегтрмүд умшад, әмтнә сурврмудт цәәлһвр өгхәр бийән агсна. Сурһулин цагтан тиигәд олна үүлдврт орлцад, баһчуд хальмг улсин тууҗин, сойлын болн шаҗна туск медрлән гүүдүлҗ авна. Әмтнлә харһҗ, теднд цәәлһвр өгдг дасмҗ авснь оютнрт иргч көдлмштнь туста болхнь маһд уга.
Баһчуд олн җил көдлҗ йовх экскурсоводмудыг дахад, яһҗ гиичнриг тосч авч, альд, ямаран цәәлһвр өгдгинь хәләһәд, дасч авна. Тиим дахулгч сурһуль зәрмдән кесг долан хонгт кегднә

Дамшлтта экскурсоводмудын тоод Ирина Бутаева йовна. Хөрн җилин туршарт Бурхн Багшин Алтн сүмиг һәәххәр ирсн улст Ирина цәәлһвр өгч, Цутхлң хурлын тууҗла болн шаҗна әрүн тоотла таньлдулна. Эн цагин дотр кедү олн күүнд Ирина Бутаева Цутхлң хурлын үлгүрәр дамҗад Хальмгт бурхн-шаҗна ном ямаран делгрлт авсинь үзүлҗ, тууҗла болн сойлла таньлдулсн болх. Энүнә күцәмҗтә үүлдвринь темдгләд, Ирина Бутаевад Күндллһнә һашг бәрүлҗ өггдв. «Серебряный гид» гидг төсвин сурһмҗлач, тууҗин номин кандидат Бадма Задваевин үүлдр чигн темдглгдв. Цутхлң хурлын үүлдврт олн җил шунмһа кевәр орлцҗ экскурьсмудыг ик медрлтәһәр, тодрхаһар цәәлһдг эрдмчнр Герля Нурова, Ольга Шарипова, Анастасия Убушаева, ахта Ханлтын бичгүдәр ачлгдв. Баһчудын үүлдвр чигн темдглгдв. Зуульчнриг тосч, теднә төлә соньн экскурсь бүрдәҗәдг баһчудын, волонтермудын дөң ик туста болҗахинь сән халхаснь Йонтен гелң үнлнә.
Ирсн зуульчнриг тосч экскурьсмуд келһн Цутхлң үүлдврин зуг нег халхнь болҗана. Энд музей, дегтрин саң, номта дегтр орчуллһна әңг, бурхн-шаҗна эклц медрл өгдг болн хальмг кел дасхдг курсмуд үүлднә. Тиигәд Бурхн Багшин Алтн сүм сойлын болн шагшавдын сурһмҗин йоста цутхлң болҗана.

УШКАНА Сувсн

Видео