Хагрин – өдгә хальмг көгҗмин баг

13-08-2022, 12:09 | Общество, Таңһчин зәңгс

Этно-электро-панк көгҗмиг татдг баг Элстд үүдсинь көгҗмд дурта улс сән меднә. Өдгә цага көгҗм татдг баһчуд одахн «Нүүдл улсин дун» гидг нарт-делкән фестивальд орлцсн зәңг чигн һарла. Улан Удэ балһснд болдг көгҗмчнрин ик марһанд ирсн олн улс дунд ик тааслт «Хагрин» олв. Делкәд чинртә билгтнрин хәләврт тиигҗ түрүн орлцснасн авн тааслт олснь өргмҗтә болҗана. Бүрдәд дала цаг болад уга баг тиигәд нарт-делкәд чинртә фестивалиг секх зөвтә болв. Олн хәләһәчнр хальмг баһчудын көгҗмиг тассан альх ташлһарн медүлҗ, эднә нердиг медҗ авв.

Эн наадмин урн-билгин һардач Наталья Уланова фестивалин тускар интервью өгхләрн олн меддг коллективс дунд төрүц күн соңсад уга көгҗмчнр чигн орлцсна тускар келв. Коллективиг соңсснань хөөн фестивальд орлцулдг авъясан эвдәд, видео илгәсн «Хагрин» багиг фестивальд орлцулад, чик шиидвр авснань тускар тер темдглв.

Хальмг көгҗмчнрәс түрүнкнь болҗ эн фестивальд орлцсн «Хагрин» багин орлцачнр нертә олн артистнрла хамдан эстрадн көгҗмин тәәз деер билгән үзүлсндән ода күртл итклго бәәнә. Билгтә көвүдин нерднь иим – Руслан Дуляев, Руслан Джумагалиев, Мазан Поштаров (зургт).

Ик фестивалин үүмән давад уга бәәтл хальмг көгҗмчнр Осетин һазрт ирв. Кезәнк хальмг хувцна янзиг дуралһҗ уйсн сценическ хувцта баһчуд тер дарунь әмтнә оньгиг авлна. Июль сарин 30-31-д хойр өдрин туршарт хальмг көгҗмчнр Ар үзгин Осетин хотл балһснд хойр концерт үзүлв. Әмтн ямаран һазрт бәәнү йилһл уга, наснь чигн әдл биш болвчн көгҗмд дурта. Седклин сергмҗ үүдәдгнь көгҗм болдгнь ил йовдл. Урдк цага көгҗмин айсмудыг өдгә цагин неквриг дахулҗ, техническ шин тоотыг олзлҗ дуулсн тоот кенә чигн седклд күрдгинь эн багин көгҗм медүлнә. Элстд болдг концертмүд, Улан-Удэд, Владикавказд болсн концертмүд терүгинь дәкн илдкҗ медүлв.

Ар үзгин Осетин һазрт көгҗмин баг Элстин зургудын галерейин һардач Людмила Мошулдаеван үрврәр одсмн. Людмила Осетин болн Хальмгин зурачнр хоорнд залһлда тогтаһад, хойр җилин туршарт тавн һәәхүл бүрдәҗ чадв. Элстд Ар үзгин Осетин Алания республикин зурачнрин һәәхүлмүд бүрдәгдҗ, олн әмтиг цуглулсмн. Хоша бәәх республикин сойлла тиигҗ зурачнрин үүдәврмүдин дөңгәр таньлдх таалыг Людмила тогтаҗ чадв. Осетин урн һарин эрдм ямаран соньн болҗахинь осетинск наадһасла таньлдулсн һәәхүл олн әмтнд кесгтән тодлгдв. Хальмг зурачнрин үүдәврмүдлә, бииһин эрдмлә, хальмг хувцнла чигн Осетин әмтн Людмила Мошулдаеван дөңгәр таньлдв.

Эн йовлһндан Людмила осетинск хәләһәчнриг өдгә хальмг көгҗмлә таньлдулхар шиидв. Тиигәд «Хагрин» баг Владикавказд билгән үзүлв.
Хальмг көгҗмчнр Осетин телеүзлд болсн харһлтд орлцв. Людмила Мошулдаева улс хоорндк хәрлцәнд сойлын залһлдан ик чинр зүүдгин тускар келв. «Хагрин» багин орлцачнр татдг көгҗминнь тускар тодрхаһар келв. Эднә татҗах көгҗмин нернь этно-электро-панк гиҗ келгддгинь сәәнәр медгдлго бәәхинь зааһад, тернь әмтнд медгдг угаһарнь соньмсснд, Руслан Дуляев: «Дала нәрн юмн уга - энтн өдгә улс улсиг залһҗах көгҗм - гиҗ келв. - Улсин дууна ул деер төрҗ, шин цага зевсгүдт орулгдҗ татгдҗах көгҗм. Кедү зун җил давучн күүнә седкл сольгдҗахш, күн тер кевәрн бәәнә».

«Күн болһна чееҗд бәәх тоотыг көгҗм илдкнә. Айсин дөңгәр мана көгҗм ухан-седклиг медүлх күцлтә», – гиҗ Руслан Джумагалиев немв.
«Этно-рейв» гисн тегәд эн цагт ямаран седкл әмтиг хамцулҗахиг көгҗмин дөңгәр медүлхәр шунсн седклин залмҗ болҗана», – гиҗ Мазан Поштаров эврә хөв үгән келв. Осетин телеүзлд болсн харһлтд Мазн Поштаровин дуулсн «Ээҗин дун» – кедү цаг даввчн, күн альд йовдг болвчн экиннь килмҗ угаһар ю чигн кеҗ чадшгоһинь медүлнә. Иим дуд әмтиг негдүлнә.

Баг болҗ үүлдхин өмн көвүд эврә көгҗмин хаалһар йовсмн. Болв концертд харһад, хамдан наадад бәәҗ, хамцулгч тоотнь икдәд бәәв. Городовиковин нертә дачд үүдәгч баһчуд цуглрҗ, хоорндан дөрлдҗ, чадсан үзүлҗ үүлдәд, кен-негән медлцәд, хамцу үүлдх болв. Тиигәд «Хагрин» баг төрәд, этно-электро-рейв гидг янз эднә үүлдврт шиңгрв.

Хальмгт бадм цецгин фестивалин йовудт эн баг бас орлцҗ, ирсн туристнрин болн бәәрн улсин байрт сергмҗ орулҗ, билгән үзүлв.
Тиигәд «Хагрин» гисн – өдгә цага нүүдл улсин көгҗм болҗана. Соңстн, медтн – Руслан Дуляев, Руслан Джумагалиев, Мазан Поштаров – энтн хальмг теегин сергмҗтә шин салькн болҗ седкл авлҗах «Хагрин».


ХӨӨЧИН Галина

Видео