Бәәсн һазран сәәхрүлх кергтә

16-08-2022, 10:22 | Общество, Таңһчин зәңгс

Ноха сарин 22-с авн Хальмг Таңһчин РМО-син балһсдын болн селәдин, хотл Элст балһсна муниципальн бүрдәцс социальн чинртә төсвсин марһаст эрлһән орулҗ чадҗана гиҗ таңһчин Залврин барин цергллт зәңглҗәнә. Эн марһанд йилһгдҗ авсгдсн төсвсин медлд 2023 җилд әмтнә седвәрәр муниципальн бүрдәцд селәнә эс гиҗ балһсна делгрлтд туслх керг-үүлдврмүд күцәгдхмн.

Эн көтлвр мана таңһчд 2019 җиләс авн бәәдл-җирһлд тохрагдҗана. Эн ахр цагин эргцд мана таңһчд 44 төсв күцәгдсн бәәнә. Муниципальн бүрдәцс социальн чинртә төсв күцәлһнд таңһчин шаңһас дөң авна, бийснь чигн мөңгән немнә. 2021 җилд мана таңһчд эн марһанд 17 эрлһ йилһҗ авгдад, терүнд заагдсн керг-үүлдврмүд күцәлһнд региональн бюджетәс мөңг авсмн. Җил ирвәс эн көтлврт орлцх муниципальн бүрдәцсин то икдҗәхнь темдгтә. Тиигәд, 2022 җилд 23 социальн төсв йилһгдҗ авгдв, терүг тохралһнд 15 сай арслң олзлгдв. Эн җил болхла дәкәд 20 төсв күцәгдхмн. Городовиковск, Ик Буурла, Баһ Дөрвдә, Үстин, Яшкулин, Лаганя, Яшалтан, Октябрьск болн Целинн райодын муниципальн бүрдәцс 15,3 сай арслңга дөң авад, спортивн болн бичкдүдин талвңгуд, санлын мемориалмуд, амрлһна парк тосххмн.

Хальмг Таңһчин Толһач Хаска Бату темдглсәр, җил ирвәс бичкдүдин нааддг болн спортивн талвңгудын, әмтн амрдг парксин то икдәд йовна. – Эннь зуг йосна органмудын нилч гиҗ келҗ болшго, энтн әмтнә седвәрәр олн зүсн төсв күцәгдснә аш болҗана. Дөрвн җил дарандан бидн әмтнә седвәрәр белдсн төсв күцәлһнә көтлвр бәәдл-җирһлд тохраҗанавидн, терүнд таңһчин бюджетәс субсидь йилһҗ өгчәнәвидн. Ут тоодан дөрвн җилин эргцд таңһчин шаңһас эн кергт 25 сай арслң йилһгдв. Эн көтлврин некврәр селәдин болн балһсдын муниципальн бүрдәцс, бәәрн улс болн арһлачнр мөңгән немнә. Эн көтлвриг бидн эрк биш цааранднь күцәхвидн гиҗ үгән өгчәнәв. Селәдин әмтн шунмһаһар эн көтлврт орлцҗахнь байрта, бидн эдниг дөңнҗ цуг халхарн тусан күргхвидн, – гиҗ Бату Сергеевич келв.
Эн көтлвр күцәлһн эклсн цагт таңһчин финансин министерств Октябрьск, Ик Буурла, Үстин болн Яшкулин райодт күцәгдх йисн төсв дөңнв. Тер цагт эднд 5,3 сай арслң йилһгдсн билә. Эн райодт көтлврин керг-үүлдврмүд күцәмҗтәһәр күцәгдснә ашт талдан муниципальн бүрдәцс бас терүнд орлцхар шиидв. Тегәд 2020 җилд долан РМО-н 18 төсв йилһҗ авгдад, 9,6 сай арслңга дем авв. Таңһчин райодын муниципальн бүрдәцс дунд Үстин район нүүрт һарсмн. 2019 җилд районд һурвн төсв күцәгдв, эннь Цаһан Амн, Эрднихн болн Бергин селәдин муниципальн бүрдәцсин төсвс билә. Эднд таңһчин шаңһас 2 сай 53 миңһн арслң йилһгдв, эдн бийснь 807,2 миңһн арслң немв. Давсн җилд энд тавн социальн төсв күцәгдсн билә. Бергин болн Үст селәдт паркст сән таал тогтагдв, Таталд бичкдүдин нааддг талвң тосхгдв, Барун селәнд бәәрн үкәр хашалгдв, Эрднихн болхла уудг усна худг тосхв.

Бәәрн улс эврә седвәрәр ямаран керг күцәхиг шиидәд, селәндән эс гиҗ балһсндан бичкдүдин нааддг эс гиҗ спортивн талвң тосхна, амрлһна парк бүрдәнә. Эн көтлврин медлд күцәгддг керг-үүлдврмүд эклхлә, бәәрн улс тосхлтын көдлмшиг бийснь күцәнә, сән кец-таал тогтана, нег һазра улст нерәдсн санлын самбр болн мемориал тосхна. Селәнә улс нег керг күцәҗ хамдан ниитә кевәр үүлдҗ, зуралсн тоотан күцәнә, дорас өсч йовх баһ үй эднәс үлгүр авч төрскнч седклтә болҗ өснә. Эн көтлвр бәәсн һазр-усндан дурта болхд, төрскн селәндән цевр болн сән таал тогталһнд туслна.


ДООҖАН Наталья

Видео