«КТК-Р» дөңгән күргҗәнә

20-08-2022, 11:34 | Общество, Таңһчин зәңгс

Шидр Элстд «Өөрднр» театрт «MAN» тамһта автобус, Ик Буурла болн Хар Һазра райодын сурһуль-эрдмин 10 бүрдәцд ус цеврлдг болн экологическ төсвин төлә шишлң кергсл хулдҗ авлһна сертификатмуд бәрүлҗ өглһнә керг-үүлдвр болв. Эн йовдлыг «КТК-Р» АО бүрдәсн болдг.

Керг-үүлдврт Хальмг Таңһчин Толһач Хаска Бату болн «КТК-Р» АО-н һардачин дарук Михаил Гришанков орлцв.
«Өөрднр» бииһин театрт «MAN» тамһта автобус хулдҗ авлһнд 28 шаху сай арслң йилһгдв. Көлгнә түлкүр керг-үүлдврин йовудт үүдәгч коллективин урн-билгин һардач Петр Надбитовд бәрүлҗ өггдв.

- Ямр чигн йовдл сойлас эклдг. Эннь хара келчксн үгмүд биш. Мана келн-улсин сойлын халхд тәвцән орулҗадг улсиг эрк биш дөңнх кергтә. РСФСР-ин болн Чечено-Ингушетин билг-эрдмин ачта үүлдәч, таңһчин ачта артист, Хальмгин Баатр Петр Тимофеевич Надбитов болн энүнә һардврт бәәдг «Өөрднр» бииһин театр Хальмгин сойлын йоста зөөр болна, – гиҗ Хаска Бату темдглв.
«Төрскн нутгин йиртмҗиг хадһлхмн» КТК-н төсвин йовудт хулдҗ авсн квадрокоптер, радиостанц, зург цоклһна болн талдан кергсл таңһчин онц хәләврт бәәдг эргндк һазрин дирекцин һардач Владимир Бадмаевд өггдв. Эн таңһчин йиртмҗин көрңгин болн эргндк бәәдл харслһна министерствин онц оньгт бәәнә.
Тер мет Ик Буурла болн Хар Һазра райодын сурһулин 10 бүрдәцд хулдҗ авсн ус цеврллһнә кергслиг таңһчин сурһуль-эрдмин болн номин министр Булган Ангировад бәрүлҗ өггдв.

Бату Сергеевич «КТК-Р» АО-н һардврт ханлтан өргҗ, иргчдән сойлын, зуульчллһна, хулд-гүүлгәнә, сурһулин халхар олн төсвсиг хамдан күцәхиг темдглв. Мана күндтә үүрмүд кесг төрмүд хадһллһнд тусан күргәд дөңндгиг региона Толһач бас онц темдглсн билә.
Келхәс, җил болһн «КТК-Р» АО-н нилчәр таңһчин бюджетд 2,5 җува арслң орна. Эн җилд таңһчин Толһач Хаска Бату болн «КТК-Р» АО-н һардач Николай Горбань цааранднь хамцу үүлдхин туск нөкцлтин бооца батлв. Эн бооцана медлд таңһч болн акционерн ниицән тавн җилин туршарт нөкцҗ көдлхәр зуралҗана. Батлсн бооцаһар «КТК-Р» АО Хальмг Таңһчин эрүл-менд харлһна, сурһулин, сойлын, спортын болн талдан онц халхсар цаарандан дөңгән күргхмн.


ОЛЬДАН Цаһан

Видео