Әрәсән соңсхврт Хальмгин тускар

08-09-2022, 13:09 | Общество, Таңһчин зәңгс

Әрәсән медиа-аһуд шин көтлвр һарч ирв. «Национальность.ru» гиҗ тер нерәдгднә. Шин көтлврин түрүн һарцд Хальмг Таңһчин тускар келгдв.

«Хальмг Yнн» газетин ах редактор Бембин Евгений эн һарцд орлцснь темдгтә. Тод бичгиг йилһән сәәнәр меддг номт өөрд-хальмг бичлтин тускар келҗ өгв.
Соньн эн төсвиг ухалҗ белдсн түүрвәчнр баһ наста улс. Эдн мана ик төрскнд бәәх олн келн улсин тускар соньнар болн өвәрц тоотынь үзүлҗ келҗ өгчәнә.
Евгений Владимирович келсәр, эн соңсхврт баһчуд белдвр кеһәд, мана таңһчд бәәх хамгин соньн болн өвәрц тоотыг үзүлхәр шунла. Талдан улсас хальмгудын сойл юуһарн йилһрдиг үзүлхәр түүрвәчнр зүткснь сән йовдл болҗана.

«Национальность.ru» гидг төсв эн цагт ик чинртә болҗана, – гиҗ Евгений Владимирович Бембеев тоолҗана. – Өдгә цагт әмтн орн-нутган медҗ авхар дотр-дундын туризмин үүлдврт орлцад, эврә нутгт бәәх соньн һазрт күрч амрхар седҗәх әмтнд эннь нег үлү туста болҗана. Әрәсән ик нутгт бәәх олн келн улсин сойлла, бәәцлә, авъясмудла таньлдулҗах төсв олн хәләһәчнриг олхнь маһд уга». Эн җил Евгений Бембеев Әрәсән кесг регионд одсн билә. Владимирск болн Челябинск мүҗд болсн сойлын болн гегән-герлин халхар болсн керг-үүлдврмүдт Хальмг Таңһчин нерн деерәс эн орлцсмн. Зунар Евгений Владимирович Бурятьд одад ирсмн. Альднь болвчн номт болн седкүлч хальмг улсин билг-эрдмин болн сойлын тускар келҗ, цәәлһҗ йовв.

«Мана Әрәсәд үзх, хәләх тоотнь олн. Нутг болһна һазр эврәһәрн өвәрц, – гиҗ Евгений Владимирович келнә. – Мини тоолвр чик болҗахиг шин эн төсв медүлҗәнә. Эврә орн-нутгтан амрлһан тустаһар давулҗ болхиг, нег-негән сәәнәр медҗ, эвин бәәдлд бәәхд иим төсвс туслна».

Хальмгин туск соңсхврин хөөн дәкн 20 һарц белдҗ үзүлгдв. Эн соңсхврмудыг хәләһәд, олн хәләһәчнр Әрәсән дәкн 20 регионла өөрхн таньлдв. Олн келн улсин тускар, теднә бәәдл-җирһлиг болн бәәх һазринь үзүләд эн төсвин түүрвәчнр ик көдлмш кеҗәнә. Талдан олн программсас болн кесг невтрүлгәс йилһрхләрн эн төсвд әмтн бәәх һазрнь болн сойлнь үнн кевәрн, теднә бәәдл-җирһлин йовудт үзүлгдсәрн әмтнд таасгдна.

Әрәсәд ямаран олн келн улс бәәхинь, тедн юуһарн хоорндан йилһрдгинь медҗ авхар бәәхлә эн төсвин соңсхврмуд хәләтн. Хәләсн деерән тенд күрч амрад, шин олн тоотла таньлдтн. Шин олн һазрла болн соньн улсла таньлдх арһ эн төсв өгчәнә. Төсвин нег сәәхн онцнь энүнд тер әмтнә төрскн келнә тускар келгднә. Әрәсәд бәәх олн келн улсин келинь бичҗ авч, тер дотр мартгдҗах келиг бичҗ авч, зөөр гиҗ үлдәх ик күцл түүрвәчнр өмнән тәвсмн. Тер эс гиҗ талдан нег келн бүклдән ямаран болдгинь, һазр болһнар тер келн яһҗ келгддгинь чигн бичҗ соңсхвртан эдн орулҗана. Төсвин түүрвәчнр орн-нутгин регионмудар тасрхан уга йовна. Шидр эн төсвин кемҗәнд мордван, вепс келн улсин туск һарцс һарч ирв. Хөв-кишг гидг үг олн келәр яһҗ келгддгинь эн һарцсиг хәләһәд медҗ болхмн.
Орн-нутгар зуучлхар седҗәхлә, «Национальность.ru» төсвиг хәләтн.

ҖИРҺЛИН Кермн

Видео