Көк теңгсин медиафорум

13-09-2022, 12:31 | Общество, Таңһчин зәңгс

Давсн долан хонгин чилгчәр Әәдрхн балһснд Көк теңгсин доладгч медиафорум болв. Келхәс, эн өргн керг-үүлдвриг давулхар Көк теңгсин Әрәсән, Казахстана, Азербайджана, Ирана болн Туркменистана тавн орн-нутгин 2014-ч җилд болсн саммитд шиидв. Тегәд 2015-ч җиләс авн эн форум эклцән авна.

Медиафорумиг Әрәсән Президентин һардврин болн орн-нутгин то-дигин, залһлдана болн олна коммуникацин министерствин дөңнлтәр Әәдрхнә мүҗин залвр бүрдәв. Эн җил доладгч медиафорум һаха сарин 8-д көдлмшән эклв. Нааран 500 һар элч ирв. Көк теңгсин тавн орн-нутгин элчнр бәәтхә Узбекистана, Белоруссин болн Молдован телеүзлин болн барин көдләчнр бас орлцсн билә. Маңһдуртнь, һаха сарин 9-д, Көк теңгсин 2022-ч җилин медиафорум байрин бәәдлд секгдв. Әәдрхнә мүҗин губернатор Игорь Бабушкин медиафорумд орлцачнриг тосҗ, халун мендән илгәв.

- Көк теңгсин орн-нутгудын нөкцлтнриг темдглҗ, өдгә амр биш цагт Әрәсәг дөңнҗәснд ханлтан өргҗәнәв. Өдгә цагин баһчудт эврә кергән күцәхин төлә олн эв-арһ бәәнә, делкәд кезә урдк цагин бәәдл тогтхиг күләх керг уга, эндрк бәәдлиг учртан авч мел өмәрән зүткх кергтә, гиҗ Игорь Юрьевич келв. Тер мет форумин секлһнд регионмудын болн делкән орн-нутгудын хоорндк сойлын халхар Әрәсән Президентин заллтын референт Алексей Власов, Әрәсән то-дигин, залһлдана болн олна коммуникацин министрин дарук Бэлла Черкесова ахта орлцв.

Алс-зәәһин эв-арһар Әрәсән МИД-ин зәңгллһнә болн барин департаментин һардач Мария Захарова медиафорумд орлцачнрт халун мендән медүлҗ, ах үйин мергҗлтнр дорас өсч йовх баһчудт дамшлтан өгүлх зөвтә гив. Тер мет Көк теңгсин медиафорум долан җилин туршарт җил ирвәс өсәд-өргҗәд ик онц керг-үүлдврт хүврв, – гиҗ Мария Владимировна темдгләд, форумин көдлмшт күцәмҗ дурдв.

Темдглхәс, форумин йовудт олн зүсн төрәр хөрн шаху талвң көдлв. Энүнд нарт-делкән болн Әрәсән нертә седкүлчнр көдлмшиннь тускар тодрхаһар келҗ, дамшлтарн хувалцв. Тедн дунд седкүлч болн режиссер Алексей Лысенков, «Россия-24» телеканалын шишлң зәңгч Александр Лукьянов, Әрәсән седкүлчнрин ниицәнә һардачин дарук Алексей Вишневецкий болн талдан мергҗлтнр орлцв. Алексей Константиновичин келсәр, давсн форумин йовудт нертә седкүлчнр, телеүзлин болн барин олн көдләчнр харһад күүнддг арһта болв. Сүл җилмүдт пандемийәс көлтә тиим арһ уга билә, тегәд доладгч медиафорум мадниг негдүлҗ, тиим харһлтд орлцсндан байрта бәәнәв гиҗ эн темдглв.

Көк теңгсин доладгч медиафорумд Хальмг Таңһчас йисн күн орлцв. Тедн дунд таңһчин Толһачин медлд бәәдг дотр-дундын политикин заллтын мергҗлтнр, Б.Б.Городовиковин нертә Хальмг ик сурһулин, таңһчин тосхлтын, көлгнә болн хаалһин эдл-ахун министерствин барин цергллтин элчнр болн «Калмыкия» РИА-н көдләчнр орлцв. Таңһчин зәңгллһнә агентствин һардач Хоңһр Мариловин келсәр, Көк теңгсин көвәд бәәдг седкүлчнриг эн форум негдүлв. Керг-үүлдврин йовудт һанцхн седкүлчин көдлмшин тускар бәәтхә зуульчллһна, кинон делгрлтин тускар бас төрмүд босхгдв, мана регионар олн-әмтн соньмсҗахиг медүв, тегәд ирх җилин хаврар бамб цецгин фестивальд иртн гиҗ, олнд үрвр кесн биләв, гиҗ Хоңһр Анатольевич темдглв. Хальмг келн-улсин телеүзлин көдләч Җирһл Хейчиеван темдглсәр, эн Әәдрхн балһснд түрүн болҗ одв. Медиафорум балһсна оперин болн балетын театрин ке-сәәхн бәәшңд давулгдв. Эн бәәрн олнд өврмҗ болад бәәв. Олн зүсн төрмүдәр давулгдсн мастер-классмуд, тренинг нанд йир таасгдв, эн форумд орлцад, авсн медрлән эрк биш көдлмштән олзлнав, гиҗ Җирһл келв. «Калмыкия» РИА-н сайтын көдләч Екатерина Долгина эврәннь ухан-тоолврарн бас хувалцв. Энүнә келсәр, Көк теңгсин медиафорум седкүлчин кергт түрүн ишкдлән кеҗәдг маднд сән дамшлт болна. Форумин йовудт баахн седкүлчнр туста медрл авч, интернетд барлгддг худл зәңгиг үнн зәңгәс яһҗ йилһхинь дасҗ аввидн, гиҗ Екатерина темдглв.

Ашлад келхд, Көк теңгсин медиафорум «Каспийские медиа. Молодежные измерения» төрәр давулгдв. Баһчуд – мана иргч, эн үгмүдәр дамҗад, талвң болһна көдлмш бүрдәгдсн билә. Өдгә цагт дорас өсч йовх үйнр нурһлҗдан интернетд, ниитин сүлҗәнд таньлдад хоорндан күүнднә. Тегәд Әәдрхн балһснд давсн медиафорумд кесг орн-нутгин, регионмудын элчнр таньлдҗ, көдлмшин халхар яһҗ күүндвр тогтахинь медв.

КАРСАНА Евгения

Видео