Хальмг Баатрин зөрмг йовдл

27-09-2022, 17:26 | Общество, Таңһчин зәңгс

Өдр болһн гилтә төв телеүзләр Украинд болҗах шишлң цергә керг-үүлдврин йовудт залу-зөрмг йовдл һарһсн салдсмудын тускар келнә. Бачм бәәдлд зөрмгән үзүләд, үүрмүдән харсҗ хортыг уга кесн йовдлмудын тускар соңсхларн бахмҗ үүдҗ, мана цергчнр менд-амулң йовтха гиҗ дотран зальврнавидн. Одахн нег тиим соңсхврт көлгн-күчнә ротын әңгин командир ах сержант Эрднь-Һәрән Баатрин тускар келв. Мана нег һазра улс хальмг цергчин тускар төв телеүзләр келснә тускар нег-негндән күргҗ йосндан бахтв.

Эрднь-Һәрән Баатр Әрәсән цергин әңгүдин тылыг техникәр, зер-зевәр тетклһнә даавр күцәҗ йовсн саамд, националистнрин артиллерин дәврлһнлә харһв. Әрәсән харслтын министерствин зәңглсәр, ах сержант бачм бәәдлд зөрмг кевәр бийән бәрәд, зер-зев зөөҗ йовсн көлгиг дарунь әәмшг уга һазрт һарһҗ авв. Ах сержант Эрднь-Һәрән Баатрин орлцлһтаһар зер-зевиг, цергә өлг- эдиг болн техникиг бүрн-бүтн кевәр хадһлҗ болв. Энүнә зөрмг йовдлын ашт Әрәсән әңгүд цаглань кергтә тоотар теткгдҗ, мана цергин төлә ик чинр зүүҗәсн ормиг хадһлҗ, цергә даалһвран бүклднь күцәҗ чадв.

Нег һазра күн зөрмг кевәр бийән бәрҗ, хамдан церглҗәх үүрмүдиг кергтә зер-зевәр теткснь, даалһвран ик даавртаһар күцәснь эн йоста баатр болҗахиг иткүлв. Баатр гисн нерән эн өөдән бәрснь цуг маднд ик бахмҗ үүдәв. Энүнә элгн-саднь, таньл-үзлнь бас энүнә тускар соңсад, ик гидгәр байрлснь лавта. Эрднь-Һәрән Баатр Сарпан района Баһ Малан селәнд олн үртә өрк-бүлд һарсмн. Эн деерән Үлмҗ ахта болн Делгр эгчтә. 1996-ч җилд Шарнута дунд сурһуль төгсәһәд, 1997-ч җилд әәрмд мордсмн. Цергәс бууҗ ирх цагнь ирхлә, эн бооца батлад, хөрн тавн җилдән церглҗ йовна. Тегәд әәрм энүнә җирһлин һол керг болв. Эн хол 1999-ч җилд Югославьд болсн цергә керг-үүлдврт бас орлцсн билә. Ода эн Украинд болҗах шишлң цергә кергт орлцҗ, көлгн-күчнә ротын әңгин командир болна.

- Баатр бичкнәсн авн көлгн-күчәр соньмсдг бәәсмн. Аркадий дүм селәнд җолачар көдлдг билә, тегәд отхн көвүнь эцкән дахад, ямр нег зи сольдгиг, көлгиг ясдгиг дассмн. Эн бичкнәсн авн маши залдг дасв, тегәд дамшлтта җолач гиҗ келҗ болҗана. Селән һазрт өссн төләдән көдлмшч, ик дааврта, бәрсән кедг арһта залу болв. Баатр өр-өвч седклтә, әмтнлә тевчңгү, сәәхн заңта, энүнд олн һазрт үүрмүднь бәәнә, хамдан церглҗәх улс энүг күндлнә. Бичкнәсн авн эн спортар соньмсҗ, цогц-махмудан батрулҗ чик авг-бәрцәр бәәдмн. Темдглхәс, мана ач көвүн аавнь, Эрднь-Һәрән Үлмҗ Саволгиевич церглҗ йовсн ВДВ-н 7-ч гвардейск дивизьд тусснь энүнд болн цуг маднд ик дааврта болв. Арвн җилдән тенд дәкәд нег ач көвүн, Эрднь-Һәрән Арслң церглҗ йовна. Аавнь Төрскән харсгч Алдр дәәнә цагт 1942-1943-ч җилмүдт тенд церглҗ йовсмн. Хойр ачнь аавин нериг өөдән бәрҗ, цергә даалһвран үнн кевәр күцәҗ йовна. Мана көвүд сәәнәр цергләд, әмд-менд хәрҗ иртхә гиҗ бидн дотран зальврнавидн, – гиҗ һаһань Клара Улюмджиевна келнә.

Төв телеүзләр Эрднь-Һәрән Баатрин тускар үзүлснә хөөн энүг меддг улс бәәтхә, нег һазра улс цуһар хальмг баатрт цаһан хаалһ дурдв. «Маднд бичә зовтн, бидн эрк биш диилхвидн!» гиҗ Баатр элгн-садндан келгнә. Гертнь энүг экнь, олн элгн-саднь, авальнь болн күүкн-көвүнь теңкән уга күләҗәнә.

ДООҖАН Наталья
ЗУРГТ: көлгн-күчнә ротын әңгин командир ах сержант
Эрднь-Һәрән Баатр

Видео