Цергчнриг болн өрк-бүлмүдинь дөңнх

29-09-2022, 17:35 | Общество, Таңһчин зәңгс

Һаха сарин 21-д Әрәсән Президент Владимир Путин орн-нутгин әмтнд дуудвр кеҗ, әәрмд урднь церглҗ йовсн улсиг дәкнәс цергт авх зәрлг батлсна тускар медүлв. Тер өдрәс авн орн-нутгин регион болһнд эн дааврта керг эклсн бәәнә, цергә комиссариатмуд церглсн залу улсин багмуд бүрдәҗәнә. Мана таңһчд чигн түрүн өдрәс авн эн керг-үүлдвр эклв, Хальмгин залус цергә даалһвран күцәхәр һарч йовҗана. Арднь үлдсн өрк-бүлмүднь теднд зовҗ, әмд-менд болн бүрн-бүтн хәрҗ иртхә гиҗ зальврҗана. Эн күнд болн ик дааврта цагла цергчнриг болн эднә өрк-бүлмүдиг дөңнлһнә керг-үүлдврмүд күцәгдҗәнә.

Әрәсән Президентин зәрлг һарсна дару мана таңһчд ведомствс хоорндк комиссь бүрдәгдсмн, терүг Хальмг Таңһчин Толһач Хаска Бату бийнь һардв. Шидр Элстд болсн Хальмг Таңһчин Залврин өргн сүүрт таңһчин Толһач Хаска Бату цергт мордсн залу улсиг болн теднә өрк-бүлмүдиг дөңнҗ, социальн теткврин туст зәрлг батлв. Тиигәд, цергт мордсн күн болһн нег дәкҗ 50 миңһн арслңга дем авхмн гиҗ Бату Сергеевич зәңглв.

- «Негдсн Әрәсә» партин Хальмг региональн әңгин седвәриг дөңнҗ, цергт мордсн залу улсиг көлгн-күчнә алвнас сулдххин, эднә үрдиг халун хотар тетклһнә һаруһин өрәлинь таңһчин бюджетәс даахин, бичкдүдин садт ормар, эрүл-мендән батруллһна болн амрлһна путевкар чеерүд угаһар теткхин, гер-бүүрин коммунальн туслмҗин һаруһин һурвдгч хүвинь бас таңһчин бюджетәс даахин туск селвгиг чик гиҗ тоолҗанав. «Негдсн Әрәсә» партин Хальмг региональн әңгин сегләтр болҗ таңһчин Улсин Хуралын (Парламентин) сүүрт эн төрмүдиг дарунь хәләҗ дөңнх кергтә гиҗ зака үүдәгч органд үүлддг фракцд даалһвр өгчәнәв. Тер мет Элст балһсна болн райодын муниципальн бүрдәцсин толһачнрт цергт мордсн улсин күүкд-көвүд өңгәр бичкдүдин садт орхиг теткхиг даалһҗанав, – гиҗ таңһчин Толһач келв.

Әрәсән заканла ирлцәтәһәр дәкнәс цергт мордсн улс бооца батлҗ церглҗәх улсла әдл туслмҗ олзлх зөвтә болна. Эн өдрмүдт объясняем.рф гидг порталд цергчнрт болн эднә өрк-бүлмүдт ямаран туслмҗ өггдхин тускар цәәлһвр өггднә. Тиигәд, шишлң цергә кергт орлцач сард баһ гиснь 195 миңһн арслңга җалв авхмн. Цергә цол болн немр демин мөңг ямаран болснь җалвин кемҗәнь тоолгдна. Тер мет цергчнр хувц-хунрар, хот-хоолар теткгднә, цергәс бууҗ ирснә хөөн деед болн дунд шишлң сурһульд орх зөв авна, нань чигн туслмҗ олзлна. Шишлң цергә керг-үүлдврт орлцҗах улс «Цергә кергин ветеран» гидг цол зүүнә.

Эндр күн болһн мөңг өгъялҗ авч гер-бүүр, көлг хулдҗ авна, нань чигн төр хаһлна. Тегәд ода зәрм банкуд шишлң цергә кергт орлцҗах улсин төлә онц зөвин завср бас батлҗана. Һар цаас кех саната улсин төлә бас шишлң таал тогтана. Тиигәд, ЗАГС-ин региональн заллтын һардач Басңга Еленан зәңглсәр, цергт мордҗах залу күн һар цаас кех эрлһән орулсн болхла, тер өдртнь өрк-бүлән өндәлһҗ чадҗана. Цергә комиссариатас цаасн ирсн болхла, эрлһән орулсн улсин һар цаасиг тер өдртнь кеҗ болхин туск шиидвр мана таңһчд батлгдв. Эн өдрмүдт Элстд болн таңһчин райодт әмтн эрлһән орулҗана, 5 өрк-бүл һар цаас кев.

Эн өдрмүдт таңһчин райодт болн Элстд цергт мордҗах залу улсиг дөңнҗ, буйнч седклин керг-үүлдврмүд давҗана. Әмтн цергчнрт керглгдх эм, дулан хувц-хунр, хот-хол белдҗәнә. Намрин-үвлин кемд церглхиг учртан авад, күүкд улс өөмс болн беелә өлгҗәнә, эднә һарар кесн кегдлмүд эдниг дулалх гиҗ эдн санҗана. Цергә даалһвр күцәх залу улст урмд өгхин төлә сурһульчнр бичг бичҗ, бүлән үгәрн омг өгчәнә. Одахн шишлң цергә кергт орлцсн Хальмг отрядыг һардсн Җаңһан Чимд цергт мордҗах улст ямаран хувц-хунр, нань чигн тоот авхин тускар видео белдҗ, сүв-селвгән өгснь туста болснь лавта. Авъяст тохрсар, күнд цаг ирхлә мана орн-нутгин улс негдәд, нег-негән дөңннә. Тегәд эндрк үүмәтә цагла ниитә бәәҗ, цергт мордҗах залу улсиг дөңнҗ, әмд-менд хәрҗ ирхин тускар зальврх кергтә. Зөрмг өвкнриннь нериг өөдән бәрҗ, хортыг уга кеҗ диилвр делдҗ хәрҗ иртн!

ДООҖАН Наталья

Видео