Баһчудт соньн эрдм дасхдг болв

08-10-2022, 11:33 | Общество, Таңһчин зәңгс

Одахн Элстд дунд профессиональн сурһулин өдриг өргнәр темдглв. Байрин хургт орлцачнр дунд Петр Чонкушовин нертә билг-эрдмин колледжин һардач Лилия Сергеевна ЭРЕНДЖЕНОВА эднә салврин өдрин чинрин болн энүнә һардҗадг коллективин өдр-бүрин тускар тодрхаһар келҗ өгв.

- Мана салврин байрин Өдриг нам невчк оратад зарлҗана гиҗ келхәр седләв. Яһад гихлә дунд эрдмин сурһулин бүрдәцст көдлмшчнриг, багшнриг, эмнлһнә дунд көдләчнриг болн социальн халхин төлә ик чинртә мергҗлтнриг белднә. Тегәд тиим ончта өдр кезә чигн кергтә билә, ода бидн терүг темдглҗәнәвидн, ашлвр кенәвидн, давсн җилин тускар ухан-тоолвран келнәвидн, делгрлтин шин эв-арһ хәәнәвидн. Мана салврт орн-нутгин һардвр тиим ик оньг өгчәх йовдлд бидн ханлтан өргҗәнәвидн.

- Ода тана колледжин бәәдл-җирһлд юн сольгдҗана?
- Өдгә цагт шин юм эклх арһ икдәд бәәнә. Тер шин тоотар бидн хоорндан хувалцнавидн, тернь йир сән, цугтаднь туста юмн болна. Үлгүрнь, мана эн сән Өдрин өмн өргнд мадниг эмнлһнә колледжд дуудла, энд эмнлһнә кергин шин мастерскоймуд секгдлә. Мана СПО-н бүрдәцс төрүц талдан керг күцәнә, төрүц талдан эрдм дасхна, тиим болв чигн мана үүрмүд тиим шин кергсл авчана, шин мастерской секчәнә, оютнрин медрлинь гүүдүлҗәнә, шин эв-дов эднд дасхна гиҗ бидн байрлҗанавидн.
Эднд эмнлһнә шин технологий дасхх, шин кергсләр теткхин төлә йир сән таал үүдәнә. Тиигҗ баһ-саһар болв чигн мана үүрмүд күчр-күндиг диилҗ, эврә оютнрин медрлинь гүүдүлх шин эв-арһ олҗ авчана. Тиим кевәр эдн цааранднь уралан йовҗ йовна. Мана билг-эрдмин колледж бас тиигҗ саалтг-боомтган уга кеҗ күцәмҗд күрх гиҗ ода нанд бас бат ицг үүдҗәнә. Тиигҗ бидн нег-негән дөңнҗәнәвидн. Бәәдл ямаран күнд болв чигн кергән кеҗ, күцәмҗд күрч болҗана гиҗ санҗанав. Эн өдр сән учр-утхта, тегәд ут тууҗта болхмн гиҗ санҗанав.

- Колледжд ода ямаран сән таал тогтв ?
- СПО-н заведеньст өгдг медрл, ах сурһуль-эрдм авлһн күртл өггднә гихлә тернь эндүтә тоолвр гиҗ санҗанав. Мана колледжмүд төгсәсн баһчуд, мергҗлтнр мана орн-нутгт бәәтхә, цуг делкәд йоста эрдмчнр болҗ көдлнә.
Ода бидн креативн индустрийин сурһуль делгрүлҗәнәвидн, энтн йир сән шин төсв болҗана, терүнлә мадниг Москван мергҗлтнр таньлдулла. Тиигәд бидн эн төсвиг бәәдл-җирһлд тохраҗадг 32 региона тоод орлавидн. Удл уга эн сурһуль секгдх. Өдгә цагин кергслиг маднд Москваһас илгәнә, түүнә ул деер бидн хамгин шин технологийиг олзлҗ чадҗанавидн, тер төсвин кемҗәнд шин эрдм дасхҗанавидн. Энд ода 13-17-та арвтнр сурчана.

- Ямаран эрдм эдн дасх?
- Дөрвн эрдм: ә орулдг режиссер, анимац, графикин дизайн, зургин болн видеомонтаж кедг мергҗлтнр эдн болх. Тиим кевәр эдн кинематографин вузмудт дасхдг тоотыг медҗ авх. Тиим юм бидн төрүц дасхдго биләвидн, тиим эрдм мана колледжд нам уга билә.

- Кадрмудын төр яһҗ хаһлгдҗана?
- Манад тиим кергсл меддг, терүг олзлдг кесг мергҗлтнр, баһчуд бәәнә. Эдн тиим эрдмиг шишлң вузмудт дасҗ авла. Манад Б.Б. Городовиковин нертә Хальмг ик сурһулин багшнр көдлҗәнә.
Арвтнр хойр җилдән мана колледжд сурад диплом авх. Ода бөдүн улсин төлә чигн тиим әңг секхәр зуралҗанавидн, болв эдн мөңгән өгәд сурх. Бидн ода деерән 120 арвтиг сурһульд авлавидн, болв теднәс үлү то күүкд-көвүд орсн бәәнә. Тиим кевәр бидн цуг баһчудт дурта эрдм дасх арһ өгхәр седҗәнәвидн.
Теднәс нань манад зурачнрин, сиилвр кедг эрдмчнрин, дизайнермүдин әңгүд бәәнә. Тиим кевәр иргчдән мана колледжд сурдг баһчудын то немгдәд бәәх гиҗ санҗанав, колледж чигн өргҗәд бәәх гиҗ бат ицгтә бәәнәв. Зөргтә улс күцәмҗтә болна, мана шин керг бас сән ашта болх гиҗ санҗанав.

Күүндснь ТҮРВӘН Һуна

Видео