Мана эдл-ахус ончрв

11-11-2022, 10:09 | Общество, Таңһчин зәңгс

Һаха сарин 30-ас авн хулһн сарин 9 күртл Москва балһснд «Алтн намр – 2022» келн-улсин гастрономическ наадм давв.

Эн керг-үүлдврин йовудт Әрәсән 58 регионас авч ирсн эдл-уушиг олн-әмтнд амсҗ болн хулдҗ авдг арһ учрв. Орн-нутгин селәнә эдл-ахун 300 һар үүлдврмүд махнас, заһснас, үснәс кеҗ һарһдг болн зер-земш, темс, бал, талдан олн зүсн эдл-ууш авч ирв. Тер мет наадмин йовудт Әрәсән фермермүд эврәннь үүлдврин тускар тодрхаһар цәәлһҗ олн зүсн мастер-класс үзүлсн болдг. Терүнәс нань селәнә эдл-ахун халхар үүлддг мергҗлтнр өдгә цагин некврлә ирлцҗәдг техникиг болн кергслиг яһҗ олзлҗахиг олнд үзүлв. Темдглхәс, наадмин йовудт Москван мүҗин «Патриот» төвд Цугәрәсән селәнә эдл-ахун һәәхүл бүрдәгдв. Энүнд Хальмг Таңһчин селәнә эдл-ахун министрин үүлиг цаг зуур дааҗадг Тимур Гаваев һардҗах делегац орлцв. Хальмгин делегацин ханьд ут тоодан 22 күн орв, тедн дунд таңһчин АПК-н көдләчнр мөн. Цугәрәсән АПК-н 24-ч һәәхүлин ашар мана таңһчин элчнр күцәмҗ бәрҗ, 11 алтн болн 4 цаһан мөңгн медаляр ачлгдв. Дииләчнрин тоод Приютна района «Агрофирма Уралан» ООО, Баһ Дөрвдә «КФХ «Альтаир» ООО, «Плодовитое» ООО, Яшкулин района «Улан хөөч» АО, «28-ч Әәрмин нертә тохма мөрд өскдг эдл-аху» АО, «Кировский» ООО, «Эркетени» ООО, Хар һазра «Черноземельский» АО ПЗ, «Первомайский» СПК ПЗ, Көтчнрә района «Сарпа» АО, Үстин района «Эрдниевский» СПК орв. Терүнәс нань таңһчин АПК-н зәңгллһнә цергллт алтн медаляр ачлгдв.

Келхәс, эн һәәхүлд орлцхар мана регионас ут тоодан 14 эрлһн орҗ ирсн билә. Немхәс, керг-үүлдврин йовудт селәнә эдл-ахун яарм бас бүрдәгдв.
Цугәрәсән АПК-н 24-ч һәәхүлд мана региона элчнр ик күцәмҗ бәрснлә болн селәнә эдл-ахун көдләчнрин сән Өдрлә таңһчин Толһач Хаска Бату эдниг йөрәв.
– Селәнә эдл-ахун халх мана таңһчин төлә ик чинртә болна. АПК-н халхиг улм өөдән һарһх күслтәвидн. Эн җил мал өсклһнд өгдг мөңгнә кемҗәг 100 сай арслңд икдүлвидн. Тер мет инвестормудын орлцлһтаһар дөңнлһнә эв-арһс олҗ, хальмг бор мах болвсруллһна төсвст йилһҗ өгдг мөңгиг икдүлхәр зүткҗәнәвидн, – гиҗ Бату Сергеевич келв.

Терүнәс нань таңһчин Толһач эн җил мана малчнр Цугәрәсән тохма хөөнә болн ямана XXII һәәхүлин ашар 16 медаляр ачлгдсиг бас темдглв. Буудя хуралһна көдлмш бас күцәмҗтә болсиг темдглсн билә. Таңһчин Октябрьск районд болхла тутрһ тәрлһнә һазрин аһуг икдүлх санатавидн. Энд урһҗ авсн тутрһ ПРОДЭКСПО-2022 эдл-уушин нарт-делкән һәәхүлд негдгч девсңгин дипломар ачлгдснь темдгтә, – гиҗ Хаска Бату ашлв. АПК-н цуг көдләчнрт эрүл-менд, цаһан хаалһ дурдҗ, цааранднь чигн таңһчин экономикд тәвцән орулҗ, күцәмҗ бәрҗ йовтн, гиҗ региона Толһач йөрәв.

КАРСАНА Евгения

Видео