Нерән мөңкрүлв

15-10-2022, 10:29 | Общество, Таңһчин зәңгс

1987-ч җилд һаха сарин 8-д Элст-Яшкуль хаалһд көдлҗ йовсн Хальмгин хәәртә үрн, таңһчин МВД-н ГАИ-н инспектор, ах лейтенант Владимир Лиджиев зөв-йос эвдҗәдг багиг зогсасн саамд әмнәсн хаһцв. Эн зөргтә йовдлын тускар тер цагт олн-әмтн соңссн билә. Тер зеткртә йовдл учрад һучн тавн җил давв. Владимир Лиджиев 1956-ч җилд киитн Сиврт Түмнә мүҗин Березово селәнд өрк-бүлдән ууһн үрн болҗ һарсмн. Хөөннь Владимир Татьяна Вера хойр дү күүктә болв. Бичкнәсн авн Володя эк-эцкдән нөкд болҗ, күнд көдлмшәс әәдго билә. Дунд сурһулян төгсәһәд, Элстин автомобильн-хаалһин техникумд орад сурв. 1976-ч җилд Төрскндән өрән өгдг цаг ирәд, цергт мордад, Казахстана Караганда балһснд тусв. Чаңһ-чиирг залу болҗ әәрмәс бууҗ ирәд Лиман поселкд «Түргн дөң» көлгнә залачар көдлсмн. 1979-ч җиләс авн Владимир Лиджиев таңһчин дотр-дундын органмудт экләд үүлдв. Түрүн өдрәсн авн Владимир Убушаевич бийән сән талас үзүләд, дааврта көдләчд тоолгдв. Кесг җилдән үнн-чик седклтәһәр көдләд МВД-н һардврин темдгүдәр ачлгдсн болдг. Давсн зун җилин далдгч-найдгч җилмүдт таңһчин ГАИ-н баахн инспектормудыг мана орн-нутгин кесг балһсар дамшлтан өөдлүлхин төлә шишлң сурһульд йовулдг бәәсмн. Тиигхд Владимир Лиджиев Ижевск балһснд сурһульд йовулгдв. Хөөннь Ижевск балһсна милицин школ МВД-н ик сурһульд хүврв. Келхәс, эн сурһулин бүрдәцд хальмг инспекторин зөргтә йовдлд нерәдсн самбр өдгә цаг күртл бәәнә.

В.У.Лиджиевла тер цагт хамдан көдлҗ йовсн олн үүрмүдин тодлсар, Володя цаһан седклтә, тевчңгү, өөрхн улстан кезә чигн нөкд болхар шундг билә. Өөрхн иньг, полковник Николай Манжиковин келсәр, эн Владимир Лиджиевла хамдан 1980-ч җилмүдт көдлҗ йовсн цагт милицин сән Өдриг болн шин җилин байриг хамдан тосдг билә. Ямр чигн төр учрхла эдн хамдан арһан олҗ нег-негндән дөңгән күргдг бәәсмн. Николай Николаевичин тодлсар, тер һундлта өдр эдн, ГАИ-н инспектормуд хаалһд һарч көдлв. Владимирт Элст-Яшкуль хаалһд көдлх даалһвр өггдсн билә. Үдин кемд радиозалһлдаһар Владимир Ар Кавказин региона тойгта маши көөлдәд йовсан медүлв. Эннь В.У.Лиджиевас ирсн сүл зәңг бәәҗ. Удл уга инспектор Александр Гончаров вертолетар тер ормд нисҗ ирәд шатсн маши болн өөрнь милицин хувцта кевтсн кү үзв. Һундл төрхд, эннь әмнәсн хаһцсн Владимир Лиджиев бәәҗ. Тиим зөргтә йовдл күцәһәд, әмнәсн хаһцсна хөөн 1987-ч җилд ах лейтенант В.У.Лиджиев Улан Одн орденәр ачлгдла.

Өдгә цагт таңһчин улс Владимир Лиджиевин туурмҗта йовдлыг мартад уга, гиҗ келх кергтә. Энүнә туурмҗин тускар дорас өсч йовх баһчудт, нег үлү ГИБДД-н баахн көдләчнрт даңгин үлгүрлҗ келнә. Темдглхәс, 1988-ч җиләс авн Хальмг Таңһчин дотр-дундын кергүдәр үүлддг министерствин седвәрәр В.У.Лиджиевин санлд нерәдсн мини-футболар марһан җил болһн давулгдна. Тер җилин бар сард Элст балһсна нег уульнцд Владимир Лиджиевин нерн өггдв. Өдгә цагт тер уульнцд ГИБДД-н гер бәәршлҗәхинь цуһар меднә. Немхәс, Москва балһснд МВД-н музейд В.У.Лиджиевин хувцнь бас әрүнәр хадһлгдҗана.

Шидр һаха сард В.У.Лиджиевин санлд нерәдҗ әмнәсн хаһцсн ормд тәвсн бумблвин өөр таңһчин МВД-н һардврин, хамдан көдлҗ йовсн үүрмүдин, элгн-саднаннь орлцлһтаһар митинг болв. Тенд олн-әмтн ирҗ, эңкр үрән тодлҗ, энүнә туурмҗта йовдлынь дәкнәс сергәҗ, ач-тусинь хәрүлв. Һучн тавн җил давсн бийнь, ах лейтенант Лиджиевин туурмҗ эндрк ГИБДД-н көдләчнрт болн дорас өсч йовх баһчудт даңгин үлгүр болҗ йовна.

КАРСАНА Евгения

Видео