Өрк-бүлд өгсн сурһмҗнь бахмҗта

20-10-2022, 10:12 | Общество, Таңһчин зәңгс

Хальмг кел болн сойл, тууҗ хадһллһна җисәг мана таңһчд олн улс дөңннә. Болв ода деерән хальмгаһар келдг улсин то икәр немгдҗәхш. Тегәд тер олна керг-үүлдврин йовудыг өргҗүләд бәәх кергтә, тиигхлә бидн сойлан болн келән хадһлҗ дәкәд цааранднь төрскнч кергиг делгрүлҗ чадхвидн.

Тиим олна күндтә үүлдвриг Хальмг Таңһчин Толһачин «Келни билг» мөрән лауреатнр күцәҗәнә. Тер тоод «Хамгин сән өрк-бүл – хальмг кел тархаһач» гидг номинацд Яшкуль селәнд бәәдг Лиджиевихнә өрк-бүл күндтә мөрә авсн деерән мана төрскн келнә чинринь өөдлүллһнд ик нилчән күргҗ йовна.
Герин эзн Александр Боушевич ода ачта амрлһнд бәәнә, авальнь Цаһан Аркадьевна – эклц классин багш, шалтгта бичкдүдиг сурһна.
- Мана күүкн Зинаида ода 11-ч класст гвардин майор Санчировин нертә сурһульд сурна, Зина мадниг хальмг келнә кесг керг-үүлдврт орлцулна. «Аавин Байруш» гидг марһанд бас нүүрт һарв. Тер мет хальмг келәр шүлг бичлһнә марһанд чигн Зина нүүрләчин өөдән нер зүүв. Давсн җилд орс болн хальмг келнә таңһчин олимпиадмудт бас призер болв.

Тиигчкәд бидн олна марһанд чигн орлцнавидн. Үлгүрнь, Яшкулин района дегтрин саң бүрдәсн «Җаңһриг» өрк-бүләрн умшнавидн» гидг керг-үүлдврт бидн бас ончрад нүүрлгч орм эзлләвидн. Тана «Хальмг үнн» газетин нег дөрлдәнд би бас орлцлав, – гиҗ Цаһан Аркадьевна тодлна. Тиигхд олнд темдгтә Омар Хаям шүлгчин 200 җилин өөн болҗасмн, тер ончта йовдлд нерәдәд бас шүлгүдинь орсас хальмг келнд орчуллһна керг-үүлдвр болв, би түүнд бас орлцлав, зуг нүүрлгч орм эзлсн угав, – гиҗ Цаһан Аркадьевна келнә.

Гертән чигн эдн хальмгар күүнднә. Александр Боушевич һоллгчдан төрскн келәр күүнднә. Бичкндән аав-ээҗтәһән бәәһәд, теднә һарт өсәд, хальмгар күүндҗ йовсмн. Эднә ик күүкнь Заяна ода Хальмг ик сурһуль төгсәлә, филологин эрдмтә, болв эрдмәрн көдлҗәхш, үүдәгч кесг керг күцәҗ авальдан дөң болна. Школдан сурчасн цагла бас хальмг келнә багш Валентина Болхаджаевна Очирован селвгәр кесг хальмг авъяст, сойлд нерәдсн марһанд орлцҗала.

Эднә ууһн көвүн Андрей анестезиолог-реаниматолог болҗ Элстд бичкдүдин эмнлһнә герт, дәкәд санавиацд көдлҗәнә, медколледжин оютнрт чигн сурһна. Бас нег көвүнь Боуш ода Яшкулин района эрлһәр Хальмг ик сурһульд физикин багшин эрдм дасчана, сурһулян төгсәһәд, района школд көдлх. Ода сул цагтан «Кванториум» Төвин эсвин кружок һардҗана.

Эдн цугтан хальмг кел меднә, күүнднә. Тиим медрл эдн өрк-бүлдән авла. Цаһан Аркадьевнан эцкнь Аркадий Алексеевич Петреев Улан Эрг селәнд бәәлә, «Җаңһрин» кесг бөлгиг чееҗәр меддг бәәсмн, зуг дуулҗ чаддго билә, чееҗәр келдмн. Хальмг бичәчнрин болн шүлгчнрин барас һарсн цуг шин дегтрмүдиг хулдҗ авчасмн, «Хальмг үнн» газетиг болн «Теегин герл» седкүлиг бичүлҗ авчала. Эднә ээҗнь орсар меддго билә, бас ачнр-зеенртәһән хальмгар күүндҗ йовла.
Ода Цаһан Аркадьевна болн Александр Боушевич ач көвүһән өскчәнә, түүнлә бас хальмгар күүнднә. Ачнь келсиг дарунь медәд авчкна.

Цугәрәсән «Җилин өрк-бүл» гидг марһанд эдн күүкдтәһән бас орлцҗ, шишлң мөрәһәр ачлгдла. Регионмудын девсңд эднә өрк-бүл тиигҗ йилһрҗ олнд үлгүр болсмн. Он-лайн хойр девсңгәр эн болв, тегәд Лиджиевихн эврәннь роликән, видеофильмән жюрин хайгар йовулҗасмн, тиигхд пандемий болад бәәсн цагт тиим гетлгч үүлдвр күцәҗәсмн.

Ода эднә өрк-бүлиг «Эк-эцкин туурмҗ» гидг медаляр ачлх зура бәәнә. Цуг талдан райод чигн кандидатнран йилһҗ авх. Бүклдән таңһчас болхла нег өрк-бүл ачлгдх. Тиим болв чигн бидн Лиджиевихнә өрк-бүлд күцәмҗ дурдҗанавидн, бас нег ончрад нерән дуудулад йовтха!

ТҮРВӘН Һуна

Видео