Селәнд шин эмнлһн секгдв

20-10-2022, 10:18 | Общество, Таңһчин зәңгс

«Эрүл-менд харлһн» гидг келн-улсин төсвин медлд мана таңһчд зурһан районд 9 фельдшерск-акушерск пункт болн эмчин 3 амбулаторь тосхлһна көдлмш төгсхдән өөрдҗ йовна. Тер мет нәәмн районд олн дамшлтын эмчин 9 әңг тосхгдҗана гиҗ таңһчин эрүл-менд харлһна министерств зәңглҗәнә. Эн җил түрүн медицинск дөң күрглһиг ясруллһна региональн төсвин медлд Приютна района эмнлһнә материальн-техническ ул батруллһна төр күцәмҗтәһәр хаһлгдҗана гиҗ темдглх кергтә. Тиигәд эмнлһн шин кергсләр болн шишлң көлгәр теткгдхмн, Приютное селәнд шин поликлиник тосхгдхмн, Песчаный болн Первомайский селәдт олн дамшлтын эмчин офис секгдхмн. Шидр болхла Нарын селәнд шин ФАП секлһнә байрин керг-үүлдвр болв.

Хальмг Таңһчин правительствин Ахлач Босхмҗин Гилән, таңһчин эрүл-менд харлһна министр Саран Булат селәнә бәәрн улсиг ончта йовдлла йөрәв. «Эрүл-менд харлһн» гидг келн-улсин төсвин халхар күцәгдҗәх керг-үүлдврмүд регионмудт федеральн төв күргҗәх дөң болҗана. Әмтнә эрүл-менд батруллһн келн-улсин һоллгч кергүдин негнь болна. Нег үлү селән һазрт бәәдг улсин төлә түрүн медицинск дөң күрглһнә чинр өөдлүллһн, сән таал тогталһн эркн чинр зүүнә. Эн төриг хаһлхин төлә бидн көдлмшән шунмһадулхвидн. Райодын эмнлһс өдгә цага шишлң көлгәр теткгднә, терүнд түрүн дөң күргхин төлә сән кергсл бәәнә. Эмнлһнә бүрдәцсин материальн-техническ ул батруллһна, кадрмудар тетклһнә төрмүд хаһллһна болн түрүн дөң күрглһнә халх шинрүллһнә көтлвр әмтнд сән чинртә медицинск дөң күрглһнд туслх зөвтә», – гиҗ Гилян Герасимовна темдглв.

Эндр Нарн селәнд 420 күн бәәнә, тер тоод 91 бичкн болн эрмдгтә 25 күн болна. Тегәд эднә төлә селәнд ФАП секгдснь ик чинртә болн ончта йовдл болв. Энд фельдшерин кабинет, тәрлһ келһнә, гемтә улсин эрүл-менд шинҗллһнә, эм хадһлдг хорас бәәнә. Һарч ирдг хорад гемтә-шалтгта улсин төлә сән таал тогтагдв. Фельдшер Наталья Трапездникова эрүл-менд харлһна халхд тәв шаху җилдән үнн-чик седклтәһәр көдлҗәнә. Сүл дөчн дөрвн җилд Наталья Петровна Нарн селәнә фельдшер болҗ бәәрн улст түрүн дөң күргнә. Эн җилмүдин эргцд эн кесг күүнә әм аврҗ, өдр-сө уга түрүн сурврар дөңгән күргҗәнә.

- Мана селәнә бәәрн улсла хамдан шин фельдшерск-акушерск пункт секгдхиг теңкән уга күләсн биләв. Ода мана селәнд шин ФАП бәәнә, терүнд өдгә цага некврлә ирлцдг цуг таал тогтагдв, кергсл бәәнә. Тегәд ода мана селәнәхн цевр-цер сәәхн бәәрнд медицинск туслмҗ авч, эрүл-мендән цаглань шинҗлҗ, кергтә тәрлһ авч чадхмн. Сүл җилмүдт бидн эврә бәәрн уга болад түрҗәләвидн. Шин бүүр өлзәтә болтха, мана селәнә улс ик байрта бәәнә. Ода көдлмшән улм сәәнәр күцәхин төлә чидл урһсн болҗ медгдв, – гиҗ Наталья Петровна келнә.

Селәнәхн шин ФАП секлһнә керг-үүлдврт орцлҗ, гиичнрт билг-эрдмән үзүлҗ, ик байрта бәәхән медүлв. Ода намрин-үвлин кемд гемтшгон төлә әмтн хальдврта гемәс саглуллһна тәрлһ авчана, эрүл-мендин бәәдл шинҗллһнә керг-үүлдврт орлцҗана. Эднә селәнд шин бәәрн тосхгдснь ик бичкн угад ик байрта йовдл болв. Медәтнр, бичкдүдиг асрҗах эк-эцкнр нааран ирҗ, сән таалд чинртә дөң авч чадхмн.

Таңһчин эрүл-менд харлһна министр Саран Булатын темдглсәр, эн җилин чилгч күртл түрүн медицинск дөң күрглһнә 13 объект эдлврт орулгдх зөвтә. Селән һазрт бәәдг күн хамгин түрүнд нааран ирҗ дөң күргхиг күләнә. Тер төләд эн зөрүллтд региональн болн федеральн йосн ик оньган тусхана. Хальмг Таңһчин Толһач Хаска Бату, таңһчин правительств болн федеральн төв мана эрүл-менд харлһна халхд дөң күргҗәхд ик ханлтан өргҗәнәв, гиҗ министр келв.

ДООҖАН Наталья

Видео