Малчнр үвлд белдҗәнә

22-10-2022, 11:16 | Общество, Таңһчин зәңгс

Малчнрин төлә 2022-2023-ч җилмүдин дааврта амр биш кем эклҗәнә. Үвлзлһнә кемиг сән аштаһар давулхар таңһчин фермермүд малын теҗәлән эртәснь белдҗәнә. Эдн малын хаша-хаацан ясад үвлд дааврта кевәр белдврин көдлмшән күцәҗ йовна. Таңһчин селәнә эдл-ахуст цуһар белдврин көдлмшән эклсн бәәнә. Хальмгин селәнә эдл-ахун министерствин зәңглсәр, таңһчин эдл-ахуст 420,4 миңһн тонн малын хот керглгдҗәнә. Эндр болхла 424,8 миңһн тонн белдсн теҗәләс 380,4 миңһн тонн өвсн болн 44,4 миңһн тонн салм болв. Тиим кевәр фермермүд 101 процентд үвлин теҗәлән белдв. Келхәс, урдк җилмүдт һаң халун болсн ашт таңһчин дорд үзгин райодын эдл-ахус һарута болв, эн җил болхла эдн үвлин теҗәлән 100 процентд белдв, эннь 2021-ч җиллә дүңцүлхлә 24 процентд икдв, гиҗ темдглх кергтә. Келхәс, үвлзлһнд сәәнәр белдсн эдл-ахус дунд Октябрьск района «50 лет Октября» АО, Хар Һазра района Б.Б.Городовиковин нертә болн С.М.Буденна нертә хойр МУП нүүрләчнрин тоод йовна.

Немхәс, шидр Әрәсән селәнә эдл-ахун министерствд болсн селвлцәнд Әрәсәд хамгин элвг урһц хурагдсна тускар министр Дмитрий Патрушев онц темдглсн билә. Эн җил урһц хуралһна ашар мана таңһчин селәнә эдл-ахун көдләчнр бас ончрсн билә.

Шидр үвлзлһнә дааврта кемд ямаран белдвр кегдҗәхин тускар медхәр Приютна района КФХ-н һардач Якуб Атаевла харһҗ күүндвидн. Энүнә келсәр, мал өсклһнә халхар эдн өрк-бүләрн көдлҗәнә. Урднь Якуб Эльбековичин өвкнрнь бас малын ард йовсн бәәҗ. Өдгә цагт үрдән орлцулад эн көдлхәр шунна. Мал өсклһнд Якуб Атаевд Ильяс дүнь нөкд болна. Эн өдр-сө уга хошт бәәһәд малан хәләнә. «Бичкнәсн авн бидн малын ард йовҗ, эк-эцкдән нөкд болҗ, хошт өссн биләвидн. Өдр болһн хальмг тохма малын мах, үс, тос идәд өсвидн. Иргчдән малан цааранднь өскҗ, эн кергиг үрдтән үлдәхәр зүткҗәнәвидн», – гиҗ фермер Ильяс Атаев темдглнә. Немхәс, эдн хоюрн олн үртә эцкнр болна.

– Тер мет хошт такас-нуһсд бәрхәр седхлә, теегт бәәдг дала арат, чон харшлҗана, зуг гер деерән цөөкн така бәрәд өндг цуглулнавидн, – гиҗ ах-дү Атаевихн келв. Үвлзлһнә кемд эднә крестьянск-фермерск эдл-аху сәәнәр белдв. Малын хотан эдн эртәснь хулдҗ авад белдчксн бәәнә. Терүнәс нань хошт кергтә техник зогсчахинь бас үзвидн, эннь трактор, үс зөөдг машин болн талдан кергсл мөн.

Приютна района АПК-н делгрүллһнә әңгин мергҗлт Анатолий Кукаевин келсәр, районд нәәмн селәнә эдл-ахун үүлдврт, хойр СПК-д, йирн нәәмн КФХ-д ут тоодан һучн миңһн толһа бод мал, 98 миңһн шаху хөн асргдҗана. Керглгдх 27 миңһн тонн малын хотас эндр 28 миңһн һар тонн белдгдв. Тегәд үвлзлһнә кемиг һару угаһар давулхар шунҗанавидн, – гиҗ Анатолий Иванович темдглв. Җил болһн малчнр олн зүсн көтлврмүдт орлцҗ, шаңһас мөрә авна, эннь кергән делгрүллһнд эрк биш тусан күргнә. Терүнәс нань эн җил Приютна районд һучн һар аһу гектар һазрт намрин тәрә тәрсн билә, үвлд икәр эс киитрхлә ирх җилд буудян урһц сән болх гисн иткл бәәнә.

КАРСАНА Евгения

Видео