Хол Чукоткд ончрв

22-11-2022, 19:06 | Общество, Таңһчин зәңгс

Мана нег һазра улс Москвад чигн, орн-нутгин регионмудт чигн олар көдлдгнь нуувч биш. Нег үлү баһчуд ик сурһулян сурч йовсн балһсдтан үлдҗ, тенд тааста көдлмшән олна. Мана нег һазра баһчуд нурһлҗдан эрүл-мендин, багшин полицин халхар Әрәсән ар үзгин регионмудт олар көдлҗ йовна. Тедн дундас кесгнь көдлмштән күцәмҗ бәрәд, олн зүсн марһаст ончрсн саамд тер дарунь гилтә сән зәңгиг Интернетәс, ниигмин сүлҗәнәс бидн медҗ авнавидн.

Одахн Чукоткин Автономн округд полицд көдлдг хальмг көвүн Владимир Бадма-Халгаев «Народный участковый – 2022» региональн девсңд диилвр бәрҗ ончрв. Эн сән зәңг Интернетд дарунь тарҗ нег һазра улст байр үүдәв. Шидр бидн Владимирла телефоһар күүндҗ, эн эврәннь болн көдлмшин тускар келҗ өгв.

Владимир Бадма-Халгаев Лагань балһснд өсч-боссн көвүн мөн. 2001-ч җилд дунд сурһулян төгсәһәд, Хальмг ик сурһульд юристын эрдм дасхар орв. 2007-ч җилд хату цаасан авад, Элст балһсна дотр-дундын кергүдәр үүлддг әңгд күч-көлснә хаалһан эклв. Энд арвн җилдән дамшлт хоршаҗ, 2017-ч җилд дунд сурһульдан хамдан сурч йовсн нәәҗин үрврәр Владимир Чукоткин Автономн округд йовҗ эндр күртл тенд көдлнә.

Владимир Бадма-Халгаев Чукоткин һазрт яһҗ ирснә туск шогта келврән келҗ өгв. Орн-нутгин киитн һазрт йовхар шиидәд, түрүләд Әәдрхн балһсна аэропортд ирв. Келхәс, Владимир самолет нисч һарх цагтнь арвн минут үлдхлә ирсн бәәҗ, диспетчер уурлад, хойр час хооран ирх зөвтә биләт гиҗ келәд, авч йовсн хувцан болн талдан тоотан Әәдрхнд үлдәчкәд, Москва темцәд нисч һарв. Орн-нутгин хотл балһснд энүг үүрмүднь тосҗ дарунь полицин шишлң хувц хулдҗ авад, Чукоткур йовулсн болдг. Хулһн сарла Чукоткд үвл эклҗәх кем билә. Владимириг тенд бәәдг нег һазра улс тосҗ шин дулан хувц, һосн-башмг хулдҗ авад энүнд нөкд болв. Чукоткин хальмгуд эн тууҗиг тодлад, хоорндан Владимириг «сын полка», гиҗ харһхларн даңгин наад бәрәд инәлднә. Владимир Москвад, Чукоткин һазрт бәәдг хальмгудт күнд цагт энүг дөңнснд даңгин ик ханлтта бәәнә.

Тавн җилдән Владимир Бадма-Халгаев Эгвекинот балһсна округин Рыркайпий селәнд көдлв, 2020-ч җиләс авн болхла полицин әңгин дааврта көдләчәр үүлднә. Владимирин келсәр, даалһсн селән аһуһарн мана Хальмг Таңһчла әдл, зуг энд нег миңһн күн бәәршлнә, эдниг цугтаһинь чирә-зүсәрнь меднәв. Ах лейтенант Бадма-Халгаев көдлмшән даавртаһар күцәнә, иргнмүдин олн төриг хаһлна, бүтәгдсн дөрвн керг болн зөв-йос эвдсн 49 керг илдкв. Тер мет бичкдүдиг спортд орлцулхин төлә Владимир бас ик көдлмш кенә. Хойр җилин туршарт бичкдүдт оньган өгсн учрар зөв-йос эвддг арвтнрин то баһрв.

Одахн Владимир Александрович «Народный участковый – 2022» региональн девсңгин марһанд орлцад, Чукоткин хамгин сән гисн полицин дааврта әңгин көдләчин цол зүүв. Нег һазра улс Интернетд эн зәңгиг соңсад теңкән уга байрлв. Көдлмшин халхар ах лейтенант Бадма-Халгаев Ар Кавказин һазрт хойр дәкҗ йовҗ шишлң кергт орлцв. Көдлмшән үнн-чик седклтәһәр күцәсн төләднь Г.Жуковин нертә, «За урегулирование осетино-ингушского конфликта», «За ратную доблесть» медальмудар болн Күндллһнә һашгудар ачлгдсн болдг.

Киитн Чукоткд бәәдг хальмгуд тиигәрән түрүн болҗ ирсн нег һазра улсан халунар тосҗ, эн һазрин авг-бәрцлә таньлдулҗ, көдлмш олхд нөкд болҗ туслна. Нанд ик тусан күргсн улст даңгин ханлтан өргнәв, гиҗ Владимир дәкн тодлулна.

Эндр Владимир зурһан үртә эцк болна. Өөрхн элгн-садна болн үрдиннь төлә эн бахмҗ үүдәнә. Хальмг теегәсн улм холд бәәвв чигн төрскн һазран мартхшвидн, нег һазра улстаһан харһҗ байрин өдрмүдән хамдан давулхар шуннавидн, гиҗ В.Бадма-Халгаев келнә.

КАРСАНА Евгения

Видео