Луганск театрин наадд

22-11-2022, 19:10 | Общество, Таңһчин зәңгс

Хальмгин хәләһәчнрт олн театрмудын нааддыг хәләх таал эн җил учрҗана. Иигәд үкр сарин 18-д Луганск академическ көгҗмин-драматическ театрин гастрольмуд эклсмн. «Ик гастрольмуд» гидг федеральн төсвин кемҗәнд болҗах эн театрин нааддыг Басңга Баатрин нертә Келн-улсин театрин тәәз деер әмтн хәләҗәнә.

Луганск театр Хальмгт 18-әс авн 21 күртл «Последняя любовь Деда Мороза» болн «Спасти камер-юнкера Пушкина» гидг наадд үзүлсмн.

«Спасти камер-юнкера Пушкина» гидг наадн олн хәләһәчнриг соньмсулв. Йириндән Пушкинә нер соңсхларн бидн даңгин оньган өгнәвидн. Тегәд режиссер, Украинә ачта артист, Луганск улсин республикин улсин артист Александр Редя тәвсн наадн олн элстихниг соньмсулв.

Келхәс наадн дәкн нег нер зүүнә. «Эс учрсн залу-зөргин тууҗ» гиҗ тер бас нерәдгднә. Тер эс учрсн йовдлын тускар харм төрлһн наадна хойр дүриг хамцулна.
Питунин болн Пушкинә хойриг медҗ авх әмтн наадыг ирҗ хәләсн болхла сән билә. Нааднд орсн тоотыг әмтн медсн болҗ медгднә. Цуг йовдлмуд шог орулҗ, билгтә кевәр үзүлгднә. Наадна һол дүрнь эгл көвүн Миша Питунин болна. Болв күн болһн нег билгтә гиһәд, Миша олн-зүсн болх-болшго йовдлд ордг бәәсинь медхмн. Акад эс гиҗ шогта йовдлд көвүн тусдгарн бичкнәсн авн талдан бичкдүдәс йилһрҗ йовла. Тиигчкәд тер йовдлмуднь көвүнд мел зовлң үүдәҗ йовсмн. Энүнд заавр өгдг тоотд көвүн йир дурго бәәсмн. Энүнә зовлңгин учрнь Пушкинд бәәнә гиҗ көвүн иткҗ. Иим акад хәләцтә Питунин яһҗ өсҗ, босҗ, төлҗлтин хаалһд орсинь театрин артистнр үзүлҗәнә. Цагин йовудт медрл авад, өөрк тоотан шинҗләд, көвүнә хәләцнь сольгдна. Җирһлин хаалһд орҗ йовх күүнә хәләц, заң-авц яһҗ сольгддгинь олн хәләһәчнр наадна йовудт меднә. Эврә цагин бәәдләс Пушкинә цагиг оньган өгч шинҗләд, үнндән бәәдл ямаран бәәсинь наадна һол дүр медҗ авна. Пушкинә җирһл тер әәмшгтә үклин өмн ямаран бәәсинь, терүнә өөр бәәсн әмтн – Дантес, Геккерн, Наталья Гончарова бийән яһҗ бәрснь наадар дамҗад медҗ авч болхмн. Кен медхв, невчк талданар бәәдл учрсн болхла, өөркснь талданар үүлдсн болхла, Пушкиныг харсч чигн болхмн гисн уха наадн орулна.
«Последняя любовь Деда Мороза» гидг наадыг Украинә улсин артистк Наталия Коваль белдҗ тәвсмн.

Шин җилин өмн күүнә җирһлд юн эс учрна? Амр төвкнүн бәәсн күүкд күүнә җирһлд соньн нег йовдл учрв. Шин җилин өмн эн күүкд күн эврәннь түрүн дурнла харһна. Орҗах җиллә йөрәхәр ирсн Киитн Аав терүнә дуран өгсн түрүн күн болҗ һарна. Ямаран җигтә харһлт! Иим йовдл зуг Шин җиллә болдгнь үнн эсий?
Луганск көгҗмин-драматическ театр тиим соньн наадд авч ирҗ, таңһчин олн хәләһәчнрт үзүлв.

ҖИРҺЛИН Кермн

Видео