Цугнь – диилврин төлә

24-11-2022, 19:14 | Общество, Таңһчин зәңгс

Шишлң цергә керг-үүлдврт орлцачнриг болн теднә өрк-бүлмүдиг дөңнхин төлә мана орн-нутгт #БиднХамдан гидг керг-үүлдвр бүрдәгдсн бәәнә. Орн-нутгин регион болһнд ик-бичкн уга терүнд орлцҗ, мана цергчнриг дөңнхәр шунна. Нертә улс, депутатнр, медәтнр болн сурһульчнр цергә даалһвр күцәҗ йовх улст килмҗән тусхаҗ, арһ-чидләрн дөңгән күргҗәнә, билг-эрдмәрн болн бүлән үгәрн урмд өгнә.

Одахн Хальмг Таңһчин Улсин Хуралын (Парламентин) депутат Саңһҗин Дмитрий Ар Осетьд Әрәсән харслтын министерствин сурһулин Төвд цергә белдвр кеҗәх мана нег һазра улст одад ирв. Депутатын темдглсәр, шишлң цергә керг-үүлдврт белдвр кеҗәх улс ямаран таалд бәәхинь эврә нүдәрн үзҗ, эдниг үүмүлҗәх төрмүд хаһллһнд дөң болхар эн тиигәрән одв. «Орн-нутгин харсачнриг болн теднә өөрхн улсиг дөңнҗ, эндрк амр биш цагла килмҗән тусхаҗ дөң күрглһн энтн мана һоллгч төр болҗана. Мана нег һазра улс төрскнә дуудврар шишлң цергә керг-үүлдврт орлцҗахиг сәәнәр медҗәнә, тегәд эдн ик даавртаһар терүг күцәхдән белн бәәнә. Эдн зөрмг өвкнриннь авг-бәрцәр үнн кевәр церглҗ, хальмг баатрмудын нериг өөдәнәр бәрх саната. Би күн болһнла күүндәд, цергә керг-үүлдврт орлцачнриг дөңнлһнә туст федеральн болн региональн онц зөвмүдин тускар цәәлһҗ өгләв», – гиҗ Саңһҗин Дмитрий келв. Одахн болсн сүүрт депутатнр шишлң цергә керг-үүлдврт орлцачнриг өңгәр һазрин участкар тетклһнә зака батлв. Тегәд эннь гер-бүүр тосхлһнд болн онц эдл-аху бүрдәлһнд туслхмн.

Хальмг Таңһчин бүртклһнә-тооцана Палатын, таңһчин йиртмҗин көрңгин болн эргндк йиртмҗ харлһна министерствин болн эднә медлд бәәдг бүрдәцсин көдләчнр буйнч седклин керг бүтәҗ, цергчнрт махна зүүтә хот-хол, даалһвр күцәхднь керглгдх кегдлмүд болн эв-арһс, дулан хувц цуглулҗ илгәв. Таңһчин йиртмҗин көрңгин министр Җамбин Очрин келсәр, эдн хамгин түрүнд шишлң цергә керг-үүлдврт орлцҗадг ведомствин һурвн көдләчиг дөңнхәр шиидв. Тер мет цергчнрин өрк-бүлмүдт дем күргҗ, амр биш цагла теднд килмҗән тусхав.

Шидр ОНФ-н региональн әңгин зәңглсәр, шишлң цергә керг-үүлдврт орлцҗах хальмг цергчнр Элст балһснд бәәдг Муевихнә өрк-бүлд ик ханлт болн халун менд илгәв. Нүүдлә Васильевна болн Юрий Егорович гер деерән асрдг такан нуһсна мах болн олн зүсн зер-земш эд-бод кеҗ, цергчнрт 200 шил илгәсмн. Тиигчкәд эдн шилин бүркә деер цергчнрт бүлән үг нерәдҗ бичҗ. «Әмд-менд хәрҗ иртн!», «Халун менд илгәҗәнәвидн!», «Диилвр бәрҗ хәрҗ иртн!» гиҗ эднә бичсн үгмүд мана цергчнрт ик урмд өгч чидл урһав гиҗ эдн темдглв. Цергә белдвр кеҗәх болн СВО-д орлцҗах залу улс эднә цаһан седклд байрлҗ, ик ханлт күргхиг сурв.

Хальмг Таңһчин Толһач Хаска Батун темдглсәр, шишлң цергә керг-үүлдврт орлцач болһна өрк-бүлд дөң күрггдхмн. «#БиднХамдан» гидг региональн штабин эврә сән дурар үүлддг улс цергчнрин өрк-бүлмүдин бәәдл-җирһләр соньмсҗ, ямаран төр учрсиг медҗ авч, терүг хаһлхд ач-тусан күргнә. Тиигәд, СВО-д орлцҗах нег залу күүнә авальнь саата болад, герин эргндк һазриг хог-богас цеврлҗ сән таал тогтахиг сурв. Сән дурар үүлддг баһчуд күүкд күүнә төрт орлцад, сад-һарудт хамтхасд хураһад, моддыг үвлзлһнд белдҗ, герин һаза-дотакинь ахулв. Нег күүкд күүнә сурврар волонтермуд күүкинь бичкдүдин садт өрүнднь күргҗ, асхнднь болхла герүрнь авч ирнә. Цергә даалһвр күцәҗ йовх баахн залу күүнә эцкнь хаша-хаацинь ясхд дөң болхиг бас сурв. Тегәд медәтин сурврар һаңначнр ирәд, хаша-хаацинь ясв.

ДАВАН Наталья
ЗУРГТ: эврә сән дурар үүлддг баһчуд цергчин өрк-бүлд герин эргндкиг ахулҗах кем

Видео