Баатр болсн сурһульчин нер мөңкрүлхәр

29-11-2022, 11:58 | Общество, Таңһчин зәңгс

Шишлң цергә керг-үүлдврт орлцад, залу-зөрмг йовдл һарһсн төләдән Әрәсән Баатрин нер зүүсн Лиҗин Мингиян таңһчин бәәтхә, цуг орн-нутгин баһчудт үлгүр болхнь маһд уга. Өөдән ачлвринь экднь бәрүлҗ өглһнә керг-үүлдвр Мингиян сурч йовсн Очра Лиҗ-Һәрән нер зүүдг Лаганя 3-ч тойгта дунд сурһульд болснь багшнрт болн сурһульчнрт темдгтә болн дааврта йовдл болв. Дорас өсч йовх баһ үй Төрскән харсачин залу-зөрмг йовдлын тускар медхин болн неринь әрүнәр хадһлхин төлә энүнә сурһульднь Әрәсән Баатр Лиҗин Мингияна парт болн энүнд нерәдсн экспозиц секх шиидвр авгдв.

- Хальмг Таңһчин Толһач Хаска Бату зөрмг йовдл һарһад әмнәсн хаһцсн Лиҗин Мингиянд Әрәсән Баатрин нер зүүлһхин седвәриг татад, эн кергиг күцәснд бидн ханлтан өргҗәнәвидн. Бату Сергеевич бийнь мана 3-ч тойгта сурһуль төгсәсмн, тегәд Лиҗин Мингиянд мана орн-нутгин өөдән ачлвр зүүлһх керг күцәлһн хойр дам ик дааврта болв. Мингияна санлд нерәдгдсн болн экднь Байр Владимировнад Әрәсән Баатрин ачлвринь бәрүлҗ өглһнә керг-үүлдвр мана сурһульд болснь чик гиҗ тоолҗанав, – гиҗ дунд сурһулин һардач Мукөвүнә Татьяна келв.

Энүнә келсәр, сурһуль-эрдмин бүрдәц болһнд сурһульчнрин күцәмҗ ик бахмҗ болдг. Сурһулян сәәнәр сурад, тааста эрдмәрн олнд тусан күргдг, төрскн һазр-уснаннь нер туурулҗ йовдг улс эндр сурчах күүкд-көвүдт үлгүр-үзмҗ болҗ, урмд өгдг. Әрәсән Баатрин өөдән нер зүүсн Лиҗин Мингиян эврәннь залу-зөрмг йовдларн Очра Лиҗ-Һәрән нер зүүдг Лаганя 3-ч тойгта дунд сурһулин нер туурулв. Тегәд багшнрин болн сурһульчнрин седвәрәр Мингиян сурч йовсн классин һардач Анна Джимбеевна Дорджиеван кабинетд Баатрин парт секгдв. Ода эн кабинетд 10-ч классин сурһульчнр сурна. Сурһулян сәәнәр сурдг, олна бәәдл-җирһлд шунмһаһар орлцдг, седвәртә, Цугәрәсән сурһульчнрин болн Диилврин волонтермудын җисәнә гешүд Шавана Алина болн Дадаша Марат Мингияна партын ард суух зөв авв.

– Мана сурһульд һучн җил хооран хальмг келнә багш Авдотья Цагановна Очирован седвәрәр музей секгдсн билә. Мана музей сурһуль-эрдмин бүрдәцсин музеймудын тоод орулгдсн бәәнә. Музейд мана төрскн һазр-усна тууҗин, хальмг улсиг цааҗла харһулсна, Төрскән харсгч Алдр дәәнд орлцсн мана нег һазра улсин, ачта багшнрин болн сурһулян йилһән сәәнәр сурад, ик күцәмҗ бәрсн сурһульчнрин туск экспозицс бәәнә. Шишлң цергә керг-үүлдврт орлцсн мана сурһульчнрин туск шин экспозиц одахн олна оньгт тусхагдв. Мана сурһульчнр дунд СВО-д орлцад, залу-зөрмгән үзүләд, цергә даалһвран үнн кевәр күцәхин төлә әмән әрвллго цергчнр бәәнә. Тиигәд, Акужан Айрат болн Мунян Евгений әмнәсн хаһцад, Залу-зөрмгин орденәр ачлгдв. Лиҗин Мингиян Әрәсән Баатрин өөдән нер зүүв. Одахн дәкәд нег мана сурһульч капитан Озан Константин Залу-зөрмгин орденәр ачлгдв. Иим көвүд мана сурһульчнрт бахмҗ болҗ, төрскндән үнн кевәр цергллһнә үлгүр болхнь лавта, – гиҗ Татьяна Михайловна келв.

Музейин үүлдврт сурһульчнр шунмһаһар орлцна. Эдн сурһуль-эрдмин бүрдәцсин музеймүдин Цугәрәсән марһанд орлцҗ, ик күцәмҗ бәрнә. Келхд, сурһульчнр өдгә цага эв-арһ олзлҗ виртуальн экскурсь давулна. Авдотья Цагановнан һардврт олн җилдән музей үүлдсмн, ода эн кергиг хальмг келнә багш Манҗин Елена цааранднь чадмг кевәр давулҗана. Елена Андреевна 6-ч классин сурһульчнрла музейин үүлдвриг делгрүлҗәнә, күүкд-көвүд экскурсь давулна, шин экспозиц белднә. Тегәд СВО-д орлцсн мана сурһульчнрин, тер тоод Әрәсән Баатр Лиҗин Мингияна стенд эдн белдҗ кесг материал цуглулв. Мингияна өрк-бүлнь энүнә Күндллһнә һашгуд, девтр, хоккей нааддг кергсл болн нань чигн тоот белглв. Удл уга эднә сурһульд бат ясвр кехмн гиҗ зуралгдҗана.

Очра Лиҗ-Һәрән нер зүүдг Лаганя 3-ч тойгта дунд сурһулин һардач Мукөвүнә Татьянан келсәр, багшнр болн сурһульчнр Әрәсән Баатр Лиҗин Мингияна нериг өөдән бәрҗ, залу-зөрмг йовдлнь мартгдшгон төлә цугинь кехмн. Төрскән харсхин төлә әмән өгсн баатрмуд Лиҗин Мингиян, Акужан Айрат болн Мунян Евгений дорас өсч йовх бичкдүдт үлгүр-үзмҗ болх зөвтә. Эднә наснь ахрхн болв чигн зөрмг йовдлнь мартгдшго гиҗ Татьяна Михайловна иткүлв.

ДООҖАН Наталья

Видео