Көтчнрәхн барин һарцсиг дөңнв

03-12-2022, 19:33 | Общество, Таңһчин зәңгс

Эн җил үкр сарин 15-д таңһчин «Хальмг үнн» газет 105 җилин өөнән өргмҗтәһәр темдглв. Эн ончта өөниг угтҗ, «Калмыкия» РИА-н көдләчнр Хальмгин нертә артистнрлә хамдан соньн көтлвр белдҗ таңһчин кесг райодар барин нәәрән давулҗана. Тер мет «Барин нәр» мел бичгдлһнә кемлә ирлцҗ болна.
Урҗ өдр Көтчнр селәнә муниципальн бүрдәцин ик залд ирлцңгү керг-үүлдвр болв. Нааран көдлмшин хөөн олн-әмтн адһв. «Калмыкия» РИА-н көдләчнр халун улан зандн цәәһәр болн шимтә боорцгар тооһад, таңһчин барин һарцсла таньлдулҗ, ирсн улсиг бичгдлһнә кемд орлцулхар шунсмн.

Концерт эклхин өмн Көтчнрә района муниципальн бүрдәцин толһач Санл Годжуров тәәз деер һарч ирсн гиичнрт халун-мендән медүлв. Санл Вадимовичин келсәр, төрскн келәр һардг «Хальмг үнн» болн района «Алтн булг» газетмүдән эрк биш цуһар дөңнх зөвтә. Өдгә цагин баһчуд олн зәңгсиг ниигмин сүлҗәнд умшна. Эннь сән биш йовдл гиҗ санҗанав, юңгад гихлә тенд худл зәңг чигн олар тарна. Тегәд мана таңһчд ямаран соньн болн чинртә йовдлмуд болҗахиг бидн цуһар мана барин һарцсас медҗ авнавидн гив. Тер мет РМО-н толһач барин көдләчнрт ханлтан өргҗ цаһан хаалһ дурдв.

Концертд таңһчин нертә болн баахн артистнр орлцад, билг-эрдмәрн олыг байрлулсмн. Хальмг Таңһчин ачта артистнр Байрта Шанхаева, Кутлан Мукубенов, Б.Б.Городовиковин нертә Хальмг ик сурһулин «Бумбин орн» ансамбль, баахн дуучнр Нина Музраева, Феликс Шорваев, Санл Мукаев сәәхн еңсг дууһан дуулҗ селәнә бәәрн улсиг байрлулв. Зәрмнь нам ормдан сууҗ чадад, босад дуучнриг дахад биилв. Келхәс, концертд Моңһлас ирсн гиич Дашин Нарс орлцад, «Җаңһрин» алдр дуулврин 12 баатрмудын домбрт хәәлҗ өгв. Барин нәәрин йовудт «Хальмг үннә» ах редактор Евгений Бембеев үг авч, газетин тууҗд Көтчнрә һазра күңкл ухата номт Очра Номтын тәвцинь онц темдглв. Терүнәс нань көтчнрәхн хальмг уул келән, сойлан, авъяс-заңшалан сәәнәр меддг, әрүнәр хадһлдг төләд бас ик ханлтан өргсн болдг. Ик дамшлтта седкүлч, Хальмг Таңһчин сойлын ачта көдләч Көтчнрә һазрт өсч-боссн Раиса Манжилеева бичгдлһнә кемд шунмһа кевәр орлцдг нег һазра улсан магтҗ, цааранднь чигн барин һарцсиг бичүлҗ, дорас өсч йовх үйнрт үлгүр болҗ йовтн гив.

Барин нәәрин чилгчәр Көтчнрә КЦСОН-а һардач Татьяна Мацакова тиим керг-үүлдвр бүрдәсн улст болн концертд орлцсн артистнрт ханлтан өргв. Хальмг келән дастн, хальмгар бичтн, умштн гисн дуудвр кев. Көтчнрә района Көк Булг селәнә хургин депутат Нимә Шерахтеев олн җилдән «Хальмг үнн» газетиг бичүлҗ авна, олн зүсн төрмүдәр барлсн зәңгсиг умшад, мана таңһчд юн, альд учрсиг меднә. Тер мет газетин көдләчнриг ончта өөнләнь йөрәҗ, көдлмштнь күцәмҗ дурдв.
Хальмгин Келн-улсин телеүзлд көдлҗәх Светлана Аджиева барин нәәриг хальмг келәр чадмгар һардҗ давулв. Ирх долан хонгин пүрвә өдрлә иим керг-үүлдвр Хар Һазра районд болхмн.

КАРСАНА Евгения

Видео