Селәдт шин хаалһс тосхгдҗана

06-12-2022, 19:41 | Общество, Таңһчин зәңгс

Өдгә цагин сән чинртә көлгнә эдл-ахун делгрлт мана орн-нутгин хаалһин эдл-ахун көдләчнрин өмн тәвгдсн һоллгч төр болдг. Эн төр хаһлхин төлә Әрәсәд 2019-ч җиләс авн «Әәмшг уга сән чинртә хаалһс» нертә төсв күцәгдҗәнә. Келн-улсин төсвин йовудт орн-нутгин хаалһин эдл-ахун халхар үүлддг федеральн болн региональн ведомствсин мергҗлтнр нөкцлтҗ хамдан көдлмшән күцәҗ йовна. Келхәс, «Әәмшг уга сән чинртә хаалһс» төсв Әрәсән 84 субъектд күцәгдҗәнә.

Хальмг Таңһчд эн төсв сән йовудтаһар күцәгдҗәхиг онц темдглх кергтә. Шидр Целинн района муниципальн бүрдәцин толһач Эрднь Опиев Хар-Булг селәнд хаалһ тосхлһна көдлмш ирҗ бүрткв. Эрднь Алексеевичин келсәр, өдгә цагт Целинн района Троицкое, Вознесеновка, Хар-Булг болн Деед Яшкуль селәдт шин хаалһс тосхгдҗана, зәрмнь болхла ясгдҗана. Хар-Булгт 3,73 дууна һазрт хаалһ тосхгдв, эн хаалһс поселкин социальн бүрдәцсин өөр давҗана, гиҗ темдглх кергтә.
– Ода болхла көдлмш төгсхдән өөрдҗәнә, бүрдәгдсн шишлң комиссин гешүд нааран ирҗ кесн көдлмшиг үнлхмн. Немхәс, долан хонг болһн района бәәрн улс нан тал ирҗ, иим төсв күцәгдҗәхд орн-нутгин, нег үлү таңһчин Толһач Хаска Батуд ханлтан өргҗ медүлнә, – гиҗ Целинн РМО-н толһач Эрднь Опиев темдглв. Хар-Булгин СМО-н толһач Вячеслав Гучиновин үгәр болхла, хату девскртә хаалһ тосхгдад, поселкин бәәдлнь оңдарв. Хар-Булгт бәәдг баһчудын ик зунь Элстд көдлнә, тегәд өдр болһн шин хаалһар агчмин зуур балһснд күрдг болв, юңгад гихлә урднь намрин-үвлин кемд хур-цасн орад, бальчг һардг билә. Хар-Булг поселкд «Әәмшг уга сән чинртә хаалһс» төсвин йовудт көдлҗәдг «Строй Импульс» ООО-н участкин һардач Евгений Водопьяновин келсәр, көдлмшән эдн һаха сард экләд ода дуусчана. Хату девскртә хаалһ тосхлһнд эрк биш өдгә цагин некврлә ирлцҗәдг техник болн кергсл олзлгдв. Немхәс, Хар-Булгин дунд сурһулин тус светофор углҗ тәвәд көдлмшән төгсәхвидн, гиҗ Евгений Анатольевич келв.

Тер мет Вознесеновка селәнд «КИЦ» ООО-н көдләчнр эн җилин мөрн сард хаалһ экләд тосхв. Эн селәнә муниципальн бүрдәцин толһач Ренат Аккочкаровин цәәлһсәр, 4 шаху дуунад хаалһ тосхгдв. Тер мет көлгнә зогсал, әмтн йовдг хаалһ болн дунд сурһулин шидр шам углҗ тәвгдв.
Терүнәс нань эднә СМО-н өөр Төрскән харсгч Алдр дәәнә цагт әмнәсн хаһцсн нег һазра дәәчнрин санлын бумблв ясгдҗана, гиҗ Ренат Рустемович келв. Мел эн ормд 32 салдсин цогц оршагдсн билә. Өдгә цагт бумблвин ширнь хүврәд өңгән сольҗана. Нег һазра улс нааран ирҗ аавнран, эцкнрән тодлҗ, эднә баатр йовдлмудын тускар дорас өсч йовх үйнртән келнә, гиҗ Ренат Аккочкаров темдглв.

Тиим кевәр Келн-улсин төсвс мана таңһчд күцәгдҗ йовна. «Әәмшг уга сән чинртә хаалһс» нертә төсв 2030-ч җил күртл күцәгдхмн. Хальмг Таңһчин талдан райодын селәдт бас шин хаалһс тосхгдҗ, әмтнә төлә сән кец-таал бүрдәгдхнь лавта.

КАРСАНА Евгения

Видео