Нилхдт – таңһчин Толһачин белг

10-01-2023, 11:47 | Общество, Таңһчин зәңгс

Нилх төрҗ һарсн йовдл өрк-бүлд болн өөрхн элгн-саднд байрта йовдл болдгнь мөн. Шин җилин сөөһәр О.Шунгаеван нертә перинатальн төвд түрүләд күүкн, терүнә дару көвүн төрҗ һарв. Хөөннь өдрәр дәкәд нег күүкн төрҗ һарв. Темдглхәс, эдн өрк-бүлдән һурвдгч болн дөрвдгч үрд болв. Нилхд төрҗ һарсн өрк-бүлмүд өнр-өсклң болсн деерән, Хальмг Таңһчин Толһачин зәрлгәс иштә эн җиләс авн мана таңһчд эклсн «Нилхин белг» гидг керг-үүлдврин медлд белг авв.
Көтчнрә района Чкаловский селәнд бәәдг өнр-өсклң Гаряджиевихнә өрк-бүлд күүкн төрҗ һарснь хойр дам байрта болв. Юңгад гихлә эднә күүкн мана таңһчд эн җил түрүн төрҗ һарсн нилх болв. Гаряджиевихнә өрк-бүл һурвн күүктә, Амулң, Милана болн Элзәт дү күүкн төрҗ һархиг күләҗ, ээҗтәһән болн эцктәһән хамдан нилхд кергтә хувц-хунр белдв. Эдн герән ахулад, Шин җилд кеерүләд, дү күүкндән өлгәһинь белдәд, экнь Элстәс хәрҗ ирхиг күләв. Үлмҗ болн Цаһан арвн җил хооран өрк-бүлән өндәлһәд, төрскн селәндән бәәнә, ода эдн дөрвн үртә эк-эцк болв.

Эднә күүкнә дару Троицк селәнд бәәдг Гатциновихнә өрк-бүлд көвүн төрҗ һарв. Баахн эк-эцк Иван болн Антонина бас олн үртә болв, эдн Алтн болн Элина күүктә, төрҗ һарсн үрндән эдн Дольган гидг нер өгхәр шиидв. Герин эзн Иван авалян болн көвүһән герүрн авч хәрхәр ирәд, Шин җилин түрүн өдр эднә үрн төрҗ һарснь сән белг болв гив. «Көвүм намаг дураҗ, би ик байрта бәәнәв», – гиҗ баахн эцк келв. Антонина Гатцинова өрк-бүлиннь нерн деерәс нилхд төрлһнә төвин көдләчнрт ханлтан өргҗ, цаһан седклтә болн кергән сәәнәр меддг мергҗлтнрин хәләврт бәәсән темдглв.

Туула сарин 1-д үдин хөөн Саглр Мангилова цаһан төр болад, дөрвн үртә эк болв. Гертнь арвта Данзн, нәәмтә Эвелина болн дөнтә Арина эңкр экән болн Даяна дү күүкән күләҗәнә. Олн үртә экин келсәр, Хальмг Таңһчин Толһачин белг төрҗ һарсн нилхдт бәрүлҗ өгчәхнь байр үүдәв. Нилхд кергтә хувц-хунр, көнҗл, бийнь уһадг болн асрдг олн зүсн эв-арһс бәәнә.

– Давсн җилд мана төвд 2246 нилх төрҗ һарв, теднәснь 25 күүкн-көвүн икр болна. Эклсн шин җилин түрүн һурвн өдрин туршарт мана төвд 12 нилх төрҗ һарв. Эдн дунд нурһлҗ күүкд бәәнә. Туула сарин 1-д һурвн үрн төрв, эднд Хальмг Таңһчин Толһачин белг бәрүлҗ өгчәнәвидн. Давсн җилд экин Өдрт нерәдгдсн байрин хургт таңһчин Толһач Хаска Бату иим белг бәрүлҗ өгхин тускар зәңглсн билә. Бар сарин чилгчәр таңһчин Толһач 2023-2025 җилмүдт «Нилхин белг» гидг керг-үүлдвр давулгдхин туск зәрлг батлв. Нилх болһнд нерәдгдҗәх белг белдхд 20 миңһн арслң олзлгдна. Мана орн-нутгт олн үртә өрк-бүлмүдиг дөңнлһнә, нилхд төрлһиг урмдулһна керг-үүлдврмүд күцәгдҗәхнь темдгтә. Сүл цагт мана таңһчд һурвдгч, дөрвдгч, тавдгч бәәтхә, арвдгч үр һарһҗах өрк-бүлмүдин то өсчәнә, тегәд таңһчин Толһачин белг бәрүлҗ өглһн нилхд төрлһн икдхд бас урмд өгх гиҗ санҗанавидн. Мана төвд өөдән мерҗглттә болн байн дамшлтта көдләчнр көдлҗәнә, материальн-техническ ул батрулгдҗана, тегәд күүкд улс болн нилхд эрүл-менд болхин төлә цуг таал бәәнә. Талдан һазрт көдлҗ йовсн эмчнр төрскн таңһчурн хәрҗ ирҗәхнь байрта, – гиҗ төвин ах эмч Галина Динкиева келв.

Сән авъяст тохрсар, О.Шунгаеван нертә нилхд төрлһнә төв цаһан төр болсн күүкд улст эврәннь нерн деерәс бас белг белднә. Тегәд бар сарин 31-д төрҗ һарсн дөрвн нилхин баахн экнрт Галина Капитоновна белг бәрүлҗ өгәд, кинь агтҗ, көлнь шоратҗ өлзәтә үрд болҗ өсхиг дурдв.

ДООҖАН Наталья

Видео