Фельдшерин нөкднр

14-01-2023, 11:45 | Общество, Таңһчин зәңгс

Таңһчин эмнлһнә бүрдәцст кадрмудын төр эркн чинртә болҗана. Давсн җилин чилгчәр Хальмг Таңһчин Толһач «Шуд залһлдана» эв-арһар болсн күүндврт эн төриг бас босхҗ, бәәрн мергҗлтнриг белдлһнә тускар онц келсн билә. Нидн Б.Б.Городовиковин нертә Хальмг ик сурһульд секгдсн медицинск дацң эн чинртә төр хаһллһнд туслх гиҗ таңһчин Толһач темдглв. Т.Хахлынован нертә медицинск колледжд болхла дунд медицинск көдләчнриг белднә, таңһчин эмнлһсин көдләчнр тенд мергҗлтән өөдлүлнә. Хальмг Таңһчин эрүл-менд харлһна министерств белдсн «Фельдшерин нөкд» гидг шишлң төсвин медлд гемтә улсиг асрдг баһ медицинск эгчнриг дасхдг болв.

ктябрьск района эмнлһнә ах эмч Эльдән Викторин келсәр, давсн зунар эн Северный, Чарлакта болн Босхач нертә бичкн селәдт күрәд, бәәрн улсла харһҗ күүндәд, эн төсвин тускар цәәлһсн билә. Харһлтын йовудт бәәрн улс эн төсвд орлцх күүкд улсиг бийснь шүүҗ авад, шиидврән медүлв. Келхд, төсвд эн селәдт бәәдг улс орлцх зөвтә бәәсмн, юңгад гихлә эдн дарунь түрүн нөкд күргх болҗана. Тиигәд, эн селәдин улсин шиидврәр Хамзина Евгения, Эльдика Римма болн Болдра Любовь Элстд Т.Хахлынован нертә медицинск колледжд дөрвн сардан сурад, фельдшерин нөкднрин эрдмтә болв.

– Эн бичкн селәд Иҗл болн Цаһан Нуура селәдин муниципальн бүрдәцсин медлд бәәнә. Энд һучн шаху күн бәәнә, нурһлҗдан эннь наста улс болна. Ижл селәнд олн җилин эргцд Хүрмчин Наталья эмчәр көдлҗәнә, эн байн дамшлтта мергҗлт, көдлмшән сәәнәр меднә. Олн җилин эргцд үнн-чик седклтәһәр көдлҗәх төләдән-шидр Хальмг Таңһчин ачта эмчин нер зүүв. Северный селән Ижлин ферм болна, тегәд Наталья Мантелеевна тиигәрән күрәд, дөңгән күргнә. Ода селәнд энүнә нөкд бәәнә. Чарлакта болн Босхач селәд болхла Цаһан Нуура фермс болна. Селәнд олна дамшлтын офис үүлднә, тенд хойр медицинск эгч көдлнә, эмч ординатурт сурчана, удл уга сурһулян төгсәһәд нааран ирхмн. Таңһчин эрүл-менд харлһна министерствин шишлң төсвин медлд бәәрн күүкд улс шин эрдм дасад, фельдшерин нөкднр болҗ көдлҗәхнь темдгтә йовдл болв. Эдн эн җилин эклцәс авн мана района эмнлһнә көдләчнрин тоод орв, тегәд һурвн күн көдлмшәр теткгдснь бас ик чинртә болҗана. Ода деерән эдн 10-12 миңһн арслңга җалв авхмн, тегәд эдн өрк-бүлән теҗәх арһта болснь бас байрлулна, – гиҗ Виктор Церенович келв.

Фельдшерин нөкднр гемтсн улст гертнь түрүн дөң күргҗ, цусна дарлтынь, халуһинь шинҗлхмн, эм авч ирхмн, эмнлһнд күргх кергтә болхла дахад йовхмн, нань чигн дөң күргдг болхмн. Хол болн бичкн селәдт эрүл-менд харлһна көдләч бәәхнь бәәрн улст икәр таасгдҗана. Цаһан седклтә, дааврта, әмтнлә тевчңгү күүкд улсиг нег һазра улс шүүҗ авад, тедн шин эрдм дасч авхд туслснь темдгтә. Эдн эрүл-менд харлһна көдләчнр болҗ шинкән күч-көлснә хаалһан эклҗәдг болв чигн ах үүрмүднь эднд дөңгән күргҗ дамшлт хоршахд туслх гиҗ ицҗәнә.

Района эмнлһнә ах эмчин келсәр, 2018-ч җилд Хошуд селәнд, 2020-ч җилд Җаңһр болн Мирный селәдт ФАП секгдсн билә. Нидн Восход селәнд олна дамшлтын эмчин офисин тосхлт эклв, эн җил объект эдлврт орулгдх зөвтә. Района эмнлһнә һардвр федеральн болн таңһчин көтлврмүдәр дамҗад эрүл-менд харлһна көдләчнриг белдҗ, шин ФАП тосхҗ, эмнлһнә бүрдәцсин материальн-техническ улынь батрулҗ, әмтнд күргҗәдг медицинск дөңгин чинр ясрулхар шунҗ көдлҗәнә.

ДООҖАН Наталья
Зургт: Босхач селәнд көдлҗәдг фельдшерин нөкд Болдра Любовь

Видео