«Өөрднр» бииһин театр

19-01-2023, 12:52 | Общество, Таңһчин зәңгс

Давсн җил цуг Әрәсәд улсин сойлын зөөрин җил болҗ Әрәсән тууҗд орв. Эн җилин туршарт кегдсн соньн болн кесг миңһн керг-үүлдврмүд дунд Хальмгин үүдәгч коллективс белдҗ үзүлсн тоот чигн эврәһәрн чинртә болн улсиг хамцулгч күчтә болв. Хальмг бииһин өвәрциг болн сойлын зөөр болҗах чинринь цуг орн-нутгт болн цуг делкәд медүлҗ үүлдҗәх үүдәгч коллектив – «Өөрднр» бииһин театр 2022-ч җилин туршарт зөвәр ик көдлмш кеҗ, хальмг улсин сойлын зөөриг тархалһнд зөвтә тәвцән орулв.

«Бидн – Әрәсә» («Мы – Россия») федеральн программд шунҗ орлцад, «Өөрднр» Йошкар-Ола, Чебоксары, Тольятти, Ижевск балһсдар йовҗ, концертмүд үзүлв. Эн балһсдын барин һарцсин зәңглсәр концерт болһн ик соньмслт үүдәҗ, хальмг артистнрин билг-эрдм ик тааслт олҗ, ниргҗ альх ташлһар тосхгдҗасмн. Өвкнрин эрдмиг әрүнәр хадһлҗ, цааранднь делгрүлҗ йовх коллективин үүлдвр тиим өөдәнәр үнлгднә. Бииһин театрин артистнр болхла, Әрәсән билг-эрдмин ачта үүлдәч, Хальмгин Баатр Петр Надбитовин һардврт улсин сәәхн эрдмиг орн-нутгин олн улст медүлҗ, үзүлҗ йовхарн ик даавр кеҗ үүлдҗәнә.

Санкт-Петербургд болсн ик концертд хальмг оютнр, эн балһснд көдлҗәх олн хальмгуд ирҗ, нер туурсн коллективин ду-бииг һәәхҗ, гертән ирснлә әдләр байрлв. Концерт болхас сар урдаснь әмтн цуг билетмүдиг хулдад авчксмн. Тиигҗ «Өөрднриг» энд күләсн билә.

Әрәсән сойлын министерствин гастрольн-концертн зураһар «Росконцертин» кемҗәнд эн коллективин гастрольн йовлһн күцәгдсмн. Хальмг улсин бииһин эрдмин хамгин сән гисн тоотыг «Өөрднр» билгтә кевәр деер заагдсн балһсдын тәәз деер үзүлҗ чадв. Эн ик гастролин йовудт «Өөрднр» үзүлсн тоотыг Зулын өдр элстихн чигн үзҗ чадла.

Давсн җил театрин коллективд бас нег йовдларн тодлгдв. КТК-Р социальн нөкцлтин кемҗәнд таңһчд йилһҗ өгсн көлгн-күчнәс «Өөрднр» театрт шин автобус таңһчин һардврин шиидврәр өггдсмн. Өдгә цага цуг таалта көлгәрн театрин артистнр «Золотое кольцо» гидг улсин үүдәлтин нарт-делкән фестивальд күрч орлцв. Эврә автобусарн коллектив орн-нутгар гастрольд йовсмн.

Әрәсән улсин сойлын зөөрин җил гиҗ зарлгдсн ик керг-үүлдвриг ашлсн ик хургт «Өөрднр» театрин директор Владимир Надбитов болн концертн үүлдврәр дарукнь болҗ көдлдг А.М. Эрктн орлцв. «Бидн – Әрәсә» ик программд бииһин театр орлцсна тускар эн ик товчлгч хургин орлцачнрт Владимир Петрович келҗ өгсмн. Владимир Надбитовин тоолврар, Әрәсән улсин сойлын зөөрин җил цуг келн улст йоста сән белг болв. Улсин авъясмудын чинриг Әрәсән һардвр өөдән өргҗ үзүлснь сойлын көдләчнрт ик урмдта болҗана.

Шин җилд чигн театр үүдәгч үүлдврән улм соньнар бүрдәхәр шунҗана. Театрин ах балетмейстер болн урн-билгин һардач Петр Надбитов «Медноволосая девушка» көгҗмин-бииһин шин наад белдҗәнә. Эн туст белдврин ик көдлмш кегдв. Наадна сценариг күцәлһн гүргүдән орв. Көгҗмнь белн, терүг көгҗмч Марат Файзуллин бичв. Наадна төлә шин хувцн уйгдв. Ода наадна кеерүл тәәз деер ямаран болхнь белдгдҗәнә. Цугтан артистнрас авн театрин белдврин цуг цехмүдин көдләчнр күртл ик шунлттаһар көдлҗәнә. Эднә шин наадыг әмтн күләҗәхиг медҗ, эдн ик дааврта кевәр көдлмшән күцәҗәнә.

ХӨӨЧИН Галина

Видео