Немр сурһуль өңгәр сурв

19-01-2023, 20:39 | Общество, Таңһчин зәңгс

«Демографь» гидг келн-улсин төсвин «Көдлмшәр тетклһнд туслһн» гидг федеральн төсвин медлд 2022-ч җилд мана таңһчд 255 күн шин эрдмтә болв гиҗ Хальмг Таңһчин социальн делгрлтин, күч-көлснә болн көдлмшәр тетклһнә министерств зәңглв.

Немр сурһуль сурад шин эрдмтә болсн улсин ик зунь 50 һарсн болн көдлмш уга иргнмүд болна. Сурһулян төгсәсн 211 күн шин эрдмәрн көдлмш олҗ авв. Таңһчин әмтн тоочин, замчин, медицинск эгчин, багшин, тьюторин, социальн көдләчин, программистин эрдм дасхдан таасна.

- Әрәсән правительств немр сурһуль сурлһна көтлвриг дәкәд хойр җилдән күцәхин туст шиидвр батлв. 2023-2024-ч җилмүдт «Көдлмшәр тетклһнд туслһн» гидг федеральн төсвин медлд иргнмүд өңгәр сурһуль сурч шин эрдм сурхд шаңһ туслхмн. Кемр мана таңһчин әмтн шин эрдм дасх саната болхла, көдлмшәр тетклһнә цергллтд ирх кергтә, мана мергҗлтнр эдниг соньмсулҗах эрдм олҗ авхд дөң болхмн. «Көдлмш Әрәсәд» гидг порталд онлайн кевәр күн болһн таасгдсн көтлвр шүүҗ авч чадҗана, – гиҗ таңһчин социальн делгрлтин министр Өлзәтин Марина келв.

Көдлмш уга, 50 һарсн улс, бичкдүдиг асрҗах күүкд улс, көдлмш уга үлдх гисн әәмшг учрҗах көдләчнр, Украинәс нүүҗ ирсн әмтн өңгәр сурһуль сурч шин эрдм дасч чадҗана. «Демографь» гидг келн-улсин төсвин «Көдлмшәр тетклһнд туслһн» гидг федеральн төсвин медлд Әрәсән WorldSkills, Томск ик сурһуль болн РАНХиГС немр эрдм дасхна. Хальмг Таңһчин социальн делгрлтин, күч-көлснә болн көдлмшәр тетклһнә министерств эн һурвн операторла нөкцлтин бооца батлсмн.

Видео