Компьютерин туск медрлән гүүдүлхәр

21-01-2023, 20:43 | Общество, Таңһчин зәңгс

«Демографь» болн «Ах үйин улс» гидг келн-улсин төсвсин медлд батлгдсн керг-үүлдврмүд медәтнр ут нас наслҗ, олн җилдән олна бәәдл-җирһлд орлцҗ цаган сергмҗтәһәр давулхин төлә бүрдәгднә. Шидр компьютер олзллһна медрл хоршалһна туст пенсионермүдин күцәмҗин «Интернетд ханлтан өргҗәнәв-2022» Цугәрәсән марһана аш диглгдв. Терүнд мана таңһч «Хамгин шунмһа регион» номинацд 29-ч орм эзлв.

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, мана таңһчин медәтнрәс 29 эрлһн орҗ ирв. Марһанд ут тоодан 5 миңһн күн орлцв, 78 региона элчнр түрүн девсң давв, теднә көдлмшиг azbukainterneta.ru сайтд барлв. Ах үйин улсин интернет медрлиг делгрүллһнә зүүцүлгч төвин һардачин Виктория Коротаеван келсәр, марһанд орлцачнрин то өсчәхнь регионмудт пенсионермүдиг өдгә цага эв-арһсар соньмсуллһна, эдн удан цагт олн зүсн керг-үүлдврт орлцһиг урмдуллһна туст көдлмш күцәмҗтәһәр күцәгджәхиг медүлҗәнә.

Эн марһаг Әрәсән пенсионн саң болн «Ростелеком» ах үйин улсин интернет медрлиг делгрүллһнә зүүцүлгч төвин дөңгәр бүрдәсмн. Марһанд компьютер олзллһиг бийснь эс гиҗ шишлң сурһульд дассн пенсионермүд болн тәв һарсн улс орлцҗ чадҗана.

– Мана таңһчин медәтнр эн марһанд шунмһаһар орлцҗахиг темдглх кергтә. Бидн эднд ик ханлтан өргҗәнәвидн. 2022-ч җилд таңһчин әмтнә социальн теткврин комплексн төвмүдин улд 183 медәт компьютерн медрл хоршаҗ, өдгә цага эв-арһс олзлҗ интернетд кергтә зәңг олҗ авдгиг болн 2564 күн финансин халхар сурһуль сурв. Эн җил тиим кичәлмүд дәкәд бүрдәгдхмн, – гиҗ таңһчин социальн делгрлтин министр Өлзәтин Марина келв.

Таңһчин медәтнр шишлң кичәлмүдт орлцҗ, шин медрл хоршаҗ авч, интернетд олн зүсн зәңг олна, ниигмин сүлҗәнд үүрмүдләрн хәрлцнә, талдан регионмудт болн һазадын орн-нутгудт бәәдг элгн-садтаһан бат залһлда бәрнә, шаңһа туслмҗин порталд эрлһән орулна, жилищн-коммунальн туслмҗин мөңгән өгнә. Өдгә цага некврлә ирлцҗ үүлдхәр шундг медәтнрин җирһл сергҗмтә болна, эдн олна бәәдл-җирһләр соньмсна.

БАТАН Наталья
ЗУРГТ: медәтнр компьютер олзлдгиг дасчана

Видео